Dyiribye Ledyikulu

HI MUTSARI WA XALAMUKA! LE CANADA

I KHALE vaphasi va tinhlampfi ni vavalangi va tirhisa ribye leri tanihi mfungho lowu tshembekaka. Vatlhokovetseri, vatsari ni vampfampfarhuti va swifaniso va vulavule hi rona. Encyclopedia yin’wana yi hlamusela ribye leri tanihi “nchumu lowu hlamarisaka swinene.” Exiphen’wini xa le vuxa bya Nhlonhle ya Gaspé le Nsonga-nkulu wa St. Lawrence, ku ni dyiribye dyo saseka ledyi vitaniwaka Percé Rock, ledyi nga le xikarhi ka mati ya wasi ya Lwandle ra Atlantic. Dyiribye ledyi dyi lehe 433 wa timitara, dyi aname 90 wa timitara naswona ku tlakuka ka dyona i 88 wa timitara.

Minkarhi yin’wana vaaki va kwalaho lava nga ni xivindzi a va khandziya ribye leri va ya lava mandza ya swinyenyana. Kambe, hi 1985, leswaku hulumendhe ya le Quebec yi sirhelela ndhawu leyi, yi yirise leswaku ku nga hlotiwi ePercé Rock ni le Xihlaleni lexi nga ekusuhi lexi vitaniwaka Bonaventure, a yi katsa ni swinyenyana leswi kumaka vutumbelo kwalaho. Xihlala xa Bonaventure i vutumbelo bya sekwa ra vumbirhi hi vukulu emisaveni hinkwayo naswona ri tshikela ni ku hlayisa swiciwana swa rona kwalaho.

Van’wana va vula leswaku khale koloko Ribye ra Percé, a ri khomane ni ribuwa naswona a ri ri ni mimbhovo ya mune leyi a yi languteka ku fana ni vurha. Kambe namuntlha ko va ni mbhovo wun’we ntsena naswona wu aname 30 wa timitara, wu kumeka hi le tlhelo ra le lwandle. Loko lwandle ri nga ri na magandlati yo tala, ku ni sava leri sukelaka eribyeni ku ya eribuweni. Hi nkarhi lowu lavaka ku ringana tiawara ta mune, vavalangi lava nga ni xivindzi a va famba va ya fika lomu ribye leri ri helelaka kona, kutani va ri ambamba ku ya fika lomu ku nga ni mbhovo lowukulu, naswona swi va teka 15 wa timinete ku fika kwalaho.

Lava va nga ni xivindzi xo khandziya ribye leri va fanele va tivonela. Muvalangi un’wana la khandziyeke maribye lama weke, a ya fika laha ku nga ni mimbhovo ya kona u ri: “Eka timinete ti nga ri tingani ku twakala ku dlomu, ku nga maribye lama welaka ematini, ma endla pongo leri fanaka ni bomo leyitsongo. Maribye man’wana ma wela ehenhla ka man’wana, ku twakala huwa yo fana ni ya xibalesa.”

Hilaha vaendzi vo tala va xiyeke hakona, Ribye ra Percé ri xongile hakunene. Kambe lexi ko va xiphemunyana xa tindhawu to xonga leti nga kona laha misaveni ya hina. Tindhawu leti ti tele naswona ti saseke ngopfu! Loko u ti vona kumbexana na wena u boheke ku “yima u tiyile, u rhiya ndleve u yingisa mintirho leyi hlamarisaka ya Xikwembu.”—Yobo 37:14.

[Laha Xifaniso Xi Humaka Kona eka tluka 23]

© Mike Grandmaison Photography