Goza Ra Vumbirhi
Endla Kaya Ra Wena Ri Tsakisa
Ha yini goza leri ri ri ra risima? Vana va kula kahle loko va rhandziwa. Hi va-1950, mutivi wa ta mahanyelo ya vanhu, Ashley Montagu u tsarile a ku: “Vanhu hi ntumbuluko va lava ku rhandziwa; rirhandzu hi rona xihlovo xa rihanyo lerinene, ngopfu-ngopfu loko n’wana a ri ehansi ka malembe ya tsevu.” Vakambisisi va manguva lawa va phindhe marito yo gimeta ya Montagu loko a ku, “vana a va kuli kahle loko va nga rhandziwi.”
Xiphiqo lexi nga kona: Ku hanya emisaveni leyi, leyi pfumalaka rirhandzu ni ku va ni vutianakanyi swi tshikilela mindyangu. (2 Timotiya 3:1-5) Vatekani va nga kuma leswaku swiphiqo swa timali ni ntshikilelo lowu vangiwaka hi ku kurisa vana swi endla leswaku swiphiqo leswi nga kona evukatini swi nyanya. Hi xikombiso, loko mpatswa lowu tekaneke wu ri ni mavonelo lama hambaneke emhakeni yo tshinya vana ni ku va nkhensa hi ku va nyika swo karhi loko va tikhoma kahle, swi nga ha ya swi tikisa ndlela leyi va vulavurisanaka ha yona.
Ntlhantlho: Hlela nkarhi wo va swin’we ni ndyangu wa wena. Vatekani va fanele va hlela nkarhi wo va swin’we. (Amosi 3:3) Wu tirhiseni hi vutlhari nkarhi lowu vana va nga etlela. Mi nga pfumeleli TV yi mi dyela nkarhi wa n’wina wa risima. Kombisanani rirhandzu nkarhi ni nkarhi mi kufumetana. (Swivuriso 25:11; Risimu Ra Solomoni 4:7-10) Ematshan’weni yo tshamela ku ‘vona swihoxo,’ lava tindlela to bumabumela munghana wa wena wa vukati.—Pisalema 103:9, 10; Swivuriso 31:28.
Byela vana va wena leswaku wa va rhandza. Yehovha Xikwembu u vekele vatswari xikombiso lexinene hi ku byela Yesu, N’wana wa yena hi ku kongoma leswaku wa n’wi rhandza. (Matewu 3:17; 17:5) Fleck, tatana la tshamaka eAustria, u ri: “Ndzi kume leswaku vana va fana ni swiluva. Swiluva swo tala swi kula kahle loko swi kuma masana ya dyambu, vana na vona va langutele rirhandzu ni ku tiyisiwa hi vatswari va vona.”
Ku nga khathariseki leswaku u mutswari un’we kumbe mi mpatswa, loko u pfuna ndyangu wa wena leswaku wu hlakulela ku rhandzana ni ku rhandza Xikwembu, vutomi bya ndyangu wa wena byi ta tsakisa.
Kambe, xana Rito ra Xikwembu ri ri yini mayelana ni ndlela leyi vatswari va lawulaka vana va vona ha yona?
[Nkomiso eka tluka 4]
“Rirhandzu . . . i xiboho lexi hetisekeke xa vun’we.”