Yi Ndzi Pfunile Loko Ndzi Nyikela Xiviko eXikolweni

Le Jarimani ku ni xikolo xa ntirho wa mavoko lexi nga ni vana vo tala lava humaka ematikweni mambe. Va huma laha Afrika Dzonga, Furwa, Georgia, Indiya, Lebanon, Poland, Rhaxiya, Ukraine, Vietnam ni laha khale a ku vitaniwa Yugoslavia.

Xichudeni xin’wana xi te: “Ndzi pfumele ku nyikela xiviko xo karhi exikolweni. Ndzi hlawule nhloko-mhaka leyi nge ‘Tinhlamulo Leti Tirhaka Eka Swivutiso Leswi Vantshwa Va Swi Vutisaka’ leyi sekeriweke ebukwini leyi nge Vantshwa Va Vutisa—Tinhlamulo Leti Tirhaka. Vantshwa va swi tsakerile leswi buku leyi a yi vulavula ha swona ni swiringanyeto leswi yi swi nyikeleke.

“Loko ndzi heta ku vulavula emahlweni ka swichudeni, swi tlangerile hi ku phokotela mavoko. Leswi swichudeni hinkwaswo a swi dyondza tindzimi to hambana-hambana naswona swi tivaka Xilungu, ndzi kote ku swi nyika tikopi ta 30 ta Xinghezi ta buku leyi nge Vantshwa Va Vutisa, ndzi tlhela ndzi nyika ni mudyondzisi kopi yin’we ya Xijarimani.”

Eka masiku lama landzeleke, xichudeni lexi xi ye emahlweni xi chumayela swichudeni-kulobye hi Bibele naswona swi amukele rungula ra xona. Xi swi siyele tibuku leti sekeriweke eBibeleni ta Xiarab, Xibengali, Xigeorgian, Xipolixi, Xirhaxiya, Xipaniya ni Xivietnam.

Kumbexana na wena u tiva muntshwa un’wana loyi a nga vuyeriwaka loko a hlaya buku leyi nge Vantshwa Va Vutisa. Tindzima ta yona ta 39 ti katsa leyi nge: “Ndzi Nga Va Endlisa Ku Yini Vanghana Va Xiviri Ke?,” “Ku Vuriwa Yini Hi Rimbewu eMahlweni Ka Vukati?,” ni leyi nge “Ndzi Swi Tivisa Ku Yini Loko Ri Ri Rirhandzu Ra Xiviri?” U nga tikombelela kopi hi ku tata xiphephana lexi nga laha hansi kutani u xi rhumela eka adirese leyi kombisiweke kumbe eka leyi faneleke eka leti longoloxiweke eka tluka 5 ra magazini lowu.

□ Ndzi kombela mi ndzi rhumela buku leyi kombisiweke laha.

□ Ndzi kombela mi tihlanganisa na mina malunghana ni dyondzo ya mahala ya le kaya ya Bibele.