Vuswikoti Bya Wena Byo Twa Nantswo

Xana Byi Lo Endliwa?

◼ Loko u cakunya swakudya leswi u swi rhandzaka ngopfu, ririmi ra wena ri hatla ri twa nantswo wa swona. Kambe xana swi ta njhani leswaku u twa nantswo wolowo?

Xiya leswi: Ririmi ra wena swin’we ni swiyenge swin’wana swa nomu ni nkolo wa wena swi ni mintlawa ya tisele ta nhlonge leti vuriwaka switwi swa nantswo. Swo tala swi le henhla ka ririmi. Switwi swa nantswo swi ni tisele ta dzana, leti ha yin’we ya tona yi kotaka ku twa yin’wana ya mixaka ya mune ya minantswo, ku nga ku twa swo bava, swa munyu, swo tsokombela ni swo dzunga.a Switwi leswi twaka swinandzihisi swa biriviri swi hambanile. Swinandzihisi swa biriviri swi pfuxa tisele tin’wana leti endlaka u twa ku vava ku nga ri switwi swa nantswo! Switwi hinkwaswo swa nantswo swi fambisana ni tisele ta misiha, leti loko u dye swakudya leswi bavaka, misiha yo twa yi byela byongo leswaku ku ni leswo bava enon’wini.

Hambiswiritano, a hi nomu wa wena ntsena lowu twaka nantswo. Tisele ta kwalomu ka ntlhanu wa timiliyoni enhompfini ya wena, leti ku pfunaka leswaku u kota ku twa nun’hwelo ni masema ya kwalomu ka 10 000 yo hambana-hambana ti pfuna swinene loko u ri karhi u nantswa. Ku ringanyetiwe leswaku 75 wa tiphesente ta leswi hi swi vulaka nantswo swi huma eka leswi hi ngo swi nun’hwetela hi tinhompfu.

Van’wasayense va tiendlele nhompfu ya gezi leyi kotaka ku twa nun’hwelo hi ku pfuniwa hi tikhemikhali. Hambiswiritano, John Kauer ku nga dokodela loyi a dyondzeleke ndlela leyi fambiselo ra misiha ri tirhaka ha yona, la tshahiweke eka magazini lowu nge Research/Penn State u vule marito lawa: “Nchumu wihi ni wihi lowu nga riki wa ntumbuluko lowu nga endliwa hi vanhu swa olova ku wu twisisa loko wu pimanisiwa ni lowa ntumbuluko hikuva wona wa hlamarisa swinene naswona wu rharhanganile.”

Ku hava loyi a nga alaka leswaku vuswikoti byo twa nantswo byi endla leswaku munhu a tsakela swakudya. Hambileswi valavisisi va nga dyondza swo tala hi vuswikoti byo kota ku twa nantswo, kambe a va si swi twisisa leswaku swi ta njhani leswaku vanhu va rhandza nantswo wo karhi ku tlula wun’wana. Science Daily yi te: “Van’wasayense va nga ha tiva swo tala hi miri wa munhu, kambe leswaku swi ta njhani leswaku hi kota ku nun’hweta a va si swi twisisa hi ku helela.”

Hi rihi vonelo ra wena? Xana vuswikoti bya wena byo twa nantswo byi lo tiendlekela? Kumbe, xana i vumbhoni bya leswaku byi lo endliwa?

[Nhlamuselo ya le hansi]

[Dayagramu/Xifaniso lexi nga eka tluka 26]

(Leswaku u vona rungula leri hleriweke hi ku helela, vona nkandziyiso wa kona)

Xivumbeko xa ririmi hala ndzeni

[Dayagramu]

Ti-papilla

[Xihlovo Xa Kona]

© Dr. John D. Cunningham/Visuals Unlimited