‘Bokisi Leri Ri Nga Pfuriwaka Hi Yehovha Ntsena’

◼ Hi 2007, Erika loyi a nga na ntsevu wa malembe na Mattia loyi a nga na mune wa malembe va loveriwe hi tata wa vona. Hambiswiritano, ntshembo wa ku pfuxiwa ka vafi wu endle leswaku gome leri vana lava a va ri na rona ri hunguteka.—Mintirho 24:15.

Erika u rhandza ku bula ni vanhu va n’wana hi ta ntshembo wa yena lowu sekeriweke eBibeleni, ngopfu-ngopfu exikolweni xa vona eSicily. Hi xikombiso, loko munghana wa yena Beatrice a vule leswaku tata wa Erika sweswi u le tilweni, Erika u n’wi hlamule hi ku titsongahata a ku Bibele yi vula leswaku a nga yanga etilweni. Beatrice u vutisile a ku: “Loko a nga yanga etilweni se u ye kwihi?”

Erika u hlamule a ku: “U le sirheni.” Kutani Beatrice u lave ku tiva leswaku sirha i yini.

Erika u n’wi byele leswaku sirha “ri fana ni bokisi leri pfulekaka ri tlhela ri pfaleka. Kambe loko ri kala ri pfaleka, a wu nge swi koti ku ri pfula. I Yehovha ntsena loyi a nga kotaka ku ri pfula loko ku fika misava leyintshwa.”

Erika u byele munghana wa yena leswaku vito ra Xikwembu i Yehovha, nileswaku u ta tisa paradeyisi laha misaveni, laha ku nga ta ka ku nga ha vi na vuvabyi, naswona lava feke va ta pfuxiwa. Kutani Erika u kombele Beatrice leswaku a ya vutisa mana wa yena loko swi lulamile leswaku a nyikiwa buku leyi tlhuvutsaka hi timhaka leti.

Loko Erika a byeriwe leswaku mana wa Beatrice u pfumerile, u n’wi nyike buku leyi nge Dyondza Eka Mudyondzisi Lonkulu. Erika u hambeta a byela van’wana hi leswi a swi dyondzaka eBibeleni naswona u kale a nyika mudyondzisi wa yena buku yoleyo.

Hambiswiritano, Erika ni ndzisana ya yena Mattia va ha ri na rona gome ro feriwa hi tata wa vona. Kambe ntshembo wa ku pfuxiwa ka vafi wa va chavelela. Vana lava, ku fana ni van’wana vo tala emisaveni hinkwayo, va nkhensa Yehovha, Xikwembu xa nchavelelo wa xiviri.—Matewu 21:16; 2 Vakorinto 1:3, 4.

U nga ha tikombelela buku leyi yo xonga leyi nga ni swifaniso leyi ringanaka ni magazini lowu kambe yona yi ni matluka ya 256. Wena u ngo tata xiphephana lexi nga laha hansi kutani u xi rhumela eka adirese leyi kombisiweke kumbe eka leyi faneleke eka leti longoloxiweke eka tluka 5 ra magazini lowu.

□ Ndzi kombela mi ndzi rhumelela buku leyi kombisiweke laha.

□ Ndzi kombela mi tihlanganisa na mina malunghana ni dyondzo ya mahala ya le kaya ya Bibele.