Leswi U Swi Lavaka Swi Le Bibeleni!

◼ Vatekani lava vulavulaka Xifurwa lava nga Timbhoni ta Yehovha, va nghene efuletini yin’wana edorobeni ra Ajaccio, exihlaleni xa le Mediteraniya lexi vuriwaka Corsica. Ehansi va kume mvhilopho leyi a yi nga tsariwanga vito kumbe adirese yi ri ni mali ya 400 wa ti-euro. Loko nsati wa kona a hlamusela leswi va swi endleke, u ri: “Hi tsale xitiviso kutani hi xi namarheta ebodweni ya switiviso leyi nga ephancisini ya xithezi xexo, hi vula leswaku munhu loyi a lahlekeriweke hi mvhilopho a nga hi bela riqingho.”

Eka madyambu lama landzeleke, wansati un’wana u ndzi bele riqingho. Endzhaku ko tiyisekisa vatekani volavo leswaku hi yena la lahlekeriweke hi mali yoleyo, u hlele leswaku va hlangana. Leswi a a hlamarisiwe hileswaku u ta tlheriseriwa mali yakwe, u khomele vatekani volavo swiluva. Mali leyi a yi ri eka mvhilopho leyi n’wi lahlekeleke a ku ri muholo wakwe naswona siku leri landzelaka a a ta teka riendzo n’hweti hinkwayo.

Loko a ha fambile, u rhumele mpatswa wolowo khadi, a va nkhensa ra vumbirhi hileswi va n’wi kombiseke musa. Loko wansati yoloye a vuyile, mpatswa lowuya wa Timbhoni wu n’wi endzerile kutani wu vulavurisana na yena malunghana ni ndlela leyi Bibele yi pfunaka mindyangu leswaku yi tshama yi tsakile nileswaku vanhu va va ni mahanyelo lamanene, ku nga timhaka leti a a titsakela.

Vatekani lava va tirhise buku leyi nge Xana Bibele Yi Dyondzisa Yini Hakunene? leswaku va hlamusela tinhla ti nga ri tingani eka ndzima leyi nge “Ndlela Yo Va Ni Ndyangu Lowu Tsakeke.” Wansati yoloye u tsake ngopfu naswona u te: “Hinkwaswo leswi ndzi swi lavaka swi le Bibeleni!” Kutani u pfumele ku va ni dyondzo ya mahala ya Bibele.

Buku leyi nge Leswi Bibele Yi Swi Dyondzisaka a yi vulavuli hi mindyangu ntsena kambe yi tlhela yi vulavula hi tidyondzo leti nga ntiyiso malunghana ni Xikwembu na Yesu Kreste, nileswaku lava feke va kwihi, leswi endlaka leswaku Xikwembu xi pfumelela vanhu va xaniseka ni timhaka tin’wana leti khumbaka vanhu. U nga ha kombela kopi ya buku leyi hi ku tata xiphephana lexi nga laha hansi kutani u xi rhumela eka adirese leyi kombisiweke kumbe eka leyi faneleke eka leti longoloxiweke eka tluka 5 ra magazini lowu.

□ Ndzi kombela mi ndzi rhumelela buku leyi kombisiweke laha.

□ Ndzi kombela mi tihlanganisa na mina malunghana ni dyondzo ya mahala ya le kaya ya Bibele.