“Ndzi Lava Leswaku U Ndzi Chavelela”

● Rhavi ra Timbhoni ta Yehovha ra le Mexico ri amukele papila leri humaka eka wansati la tirhaka exikolweni lexi khathalelaka vanhu lava lamaleke ni lava nga ni vuvabyi bya mianakanyo. U tsale a ku: “Hi May 9, mana wa mina la rhandzekaka u file. A ndzi hele matimba swinene. Loko ka ha sele tin’hweti ti nga ri tingani a nga si fa, ndzi endle vulavisisi hi ntirho wa mina malunghana ni dyondzo leyi vulavulaka hi rifu ni ndlela leyi munhu a nga langutanaka na rona ha yona. A ndzi ehleketa leswaku swi ta ndzi pfuna, kambe a swi vanga tano.”

Kutani siku rin’wana loko a ha ri ni gome ra ku feriwa, u khongele eka Xikwembu a ku: “Ndzi lava leswaku u ndzi chavelela.” U te: “Vusiku byebyo ndzi hlaye broxara leyi nge Loko U Feriwa Hi Loyi U N’wi Rhandzaka. A ndzi twa onge yi tsaleriwe mina. Yi vule leswaku a swi bihanga ku rila. Eka nhloko-mhaka leyi nge ‘Xana Ndzi Nga Langutana Njhani Ni Gome Ra Mina?’ yi ri: ‘U nga wu tekeli ehansi nkoka wa xikhongelo. . . . Mpfuno lowu Xikwembu xi wu nyikaka wa pfuna. . . . I ntiyiso leswaku mpfuno wa Xikwembu a wu herisi ku vava, kambe wu endla leswaku swi olova ku langutana na kona. Sweswo a swi vuli swona leswaku a wu nge he tlheli u rila kumbe se u ta rivala hi murhandziwa wa wena. Kambe u nga hlakarhela.’ Marito lawa ma chavelela.”

Loko u feriwe hi loyi u n’wi rhandzaka naswona u titwa u lava ku chaveleriwa, kumbexana wena kumbe un’wana loyi u n’wi tivaka a nga kuma nchavelelo loko a hlaya broxara leyi nga ni matluka ya 32 leyi nge Loko U Feriwa Hi Loyi U N’wi Rhandzaka.

U nga ha kombela kopi ya wena hi ku tata xiphephana lexi kutani u xi rhumela eka adirese leyi kombisiweke eka xona kumbe eka adirese leyi faneleke eka leti longoloxiweke eka tluka 5 ra magazini lowu.

□ Ndzi kombela mi ndzi rhumela kopi ya broxara leyi kombisiweke laha.

□ Ndzi kombela mi tihlanganisa na mina malunghana ni dyondzo ya mahala ya le kaya ya Bibele.