Xana U nga Tshinela Njhani Eka Xikwembu?

Bibele yi ri: “Tshinelani eka Xikwembu, kutani xi ta tshinela eka n’wina.” (Yakobo 4:8) Xana wa swi tshemba leswaku vanhu va nga va ni vuxaka lebyikulu ni Muvumbi? Kambe loko u nga si hlamula xivutiso xexo, u fanele u tiva tinhlamulo leti kongomeke ta swivutiso leswi nga swa nkoka swinene. Hi xikombiso:

Xana Xikwembu xi kona?

Loko swi ri tano, xana xi tshame xi vulavula ni vanhu? Hi ndlela yihi?

Xana Bibele yi huma eka Xikwembu? Xana hi nga tiyiseka njhani?

Kumbexana leswi i swivutiso swa nkoka swinene leswi hi tshameke hi tivutisa swona, kutani swi ta tlhuvutsiwa eka nkulumo ya le rivaleni leyi nge, “Xana U Nga Tshinela Njhani Eka Xikwembu?” Yi ta nyikeriwa eNtsombanweni wa Muganga wa Timbhoni ta Yehovha lowu nga ni nhloko-mhaka leyi nge: “Tshama U Ri Ekusuhi Na Yehovha!” lowu nga ta khomiwa emisaveni hinkwayo naswona wu ta sungula hi August laha Afrika Dzonga.

Wa rhambiwa hi mandla-mambirhi leswaku u va kona entsombanweni lowu nga ta khomiwa ekusuhi ni laha u tshamaka kona. Loko u lava vuxokoxoko lebyi engetelekeke, hi kombela u tihlanganisa ni Timbhoni ta Yehovha ta le ndhawini ya ka n’wina, kumbe u tsalela vakandziyisi va magazini lowu. Website leyi nge www.pr418.com yi longoloxe tindhawu leti ntsombano lowu wu nga ta khomeriwa eka tona emisaveni hinkwayo.