“Tshamani Ekusuhi Na Yehovha!”

Ntsombano Wa Muganga Wa Timbhoni Ta Yehovha

● Magidi ya mintsombano leyi ya masiku manharhu, leyi nga ta khomiwa misaveni hinkwayo, yi hleriwe ku va yi sungula hi September laha Afrika Dzonga. Nongonoko wu ta sungula hi vuyimbeleri hi 9:00 nimixo siku ni siku. Xihloko xa hi Ravuntlhanu lexi sekeriweke eka Pisalema 73:28 xi ri, “Ku Tshinela Ekusuhi Na Xikwembu Swi Kahle Eka Mina.” Nkulumo ya mutshama-xitulu yi ta landzeriwa hi nkulumo leyi nge “Mintsombano Yi Hi Pfuna Leswaku Hi Tshama Hi Ri Ekusuhi Na Yehovha” ni leyi nge “N’wana U Rhandza Ku N’wi Hlavutela.” Kutani nxaxamelo lowu nge “Tekelela Lava Veke Ni Xinakulobye Na Yehovha” wu ta kambisisa ndlela leyi Abrahama, Rhuti, Hezekiya na Mariya va swi endleke hakona sweswo. Nongonoko wa nimixo wu ta gimeta hi nkulumo-nkulu leyi nge, “Ndlela Leyi Yehovha A Tshinelaka Ha Yona Eka Hina.”

Nkulumo yo sungula hi Ravuntlhanu nindzhenga yi ta va ni nhloko-mhaka leyi nge “Tinhlamulo Ta Swivutiso Leswi Vulavulaka Hi Yehovha,” ivi yi landzeriwa hi leyi nge “Pfumelela Ndzayo Ya Yehovha Leswaku Yi Ku Vumba” ni leyi nge “U Nga Tshuki U ‘Karihela Yehovha.’” Endzhaku ka yona ku ta landzela nxaxamelo lowu nga ni swiphemu swa ntlhanu lowu nge “Ku Vulavurisana Swi Pfuna Mindyangu Leswaku Yi Tshama Yi Ri Ekusuhi Na Yehovha.” Swiphemu leswi swi ni tinhloko-mhaka leti nge: “Yehovha U Hi Vekela Xikombiso Lexinene Emhakeni Ya Ku Vulavurisana Lokunene,” “Vavanuna, Vulavurisanani Ni Vasati Va N’wina!,” “Vavasati, Vulavurisanani Ni Vanuna Va N’wina!,” “Vatswari, Vulavurisanani Ni Vana Va N’wina!” ni leyi nge, “Vana, Vulavurisanani Ni Vatswari Va N’wina!” Nongonoko wa nindzhenga wu ta gimeta hi nkulumo leyi nge “Ntumbuluko Wu Hi Hlavutela Hi ‘Xikwembu Lexi Hanyaka’!”

Xihloko xa hi Mugqivela xi ri “Yena U Rhandza Lavo Lulama,” lexi sekeriweke eka Swivuriso 3:32. Nxaxamelo lowu nga ni swiphemu swa ntlhanu lowu nge “Pfuna Vanhu Leswaku Va ‘Vuyelelana Ni Xikwembu’” wu ta va ni swiphemu leswi nge “Ku Hambanisiwa Ni Ku Nga Vi Na Ntshembo,” “U Va Vutisa Xivutiso,” “Hetisisa Ntirho Wa Wena Tanihi Muchumayeri La Pfunetaka,” “Va Hundzule Hi Mahanyelo Ya Wena Lamanene” ni leyi nge “Tiyisela Hi Matimba Eka Matshalatshala Ya Wena.” Endzhaku ka nkulumo leyi nge “Ntirho Wa Nkarhi Hinkwawo Wu Tiyisa Vuxaka Bya Wena Na Yehovha” ni leyi nge “A Ku Na Xikhunguvanyiso Eka Lava Rhandzaka Yehovha,” nongonoko wu ta gimeta hi nkulumo ya nkhuvulo, leyi endzhaku ka yona ku nga ta khuvuriwa lava fanelekaka.

Nongonoko wa hi Mugqivela nindzhenga wu ta va ni nxaxamelo lowu nga ta va ni swiphemu swa nhungu lowu nge “U Nga Pfumeleli Nchumu Wu Ku Hambanisa Na Yehovha”—“Marhengu Ya Sathana Lama Fihlekeke,” “Ku Tikukumuxa,” “Mali,” “Rihanyo,” “Ntirho Wa Ku Tihanyisa,” “Vuhungasi,” “Ndyangu” ni “Thekinoloji.” Kutani ku ta landzela drama yo hlawuleka leyi yingiseriwaka kunene leyi nga ni nhloko-mhaka leyi nge “U Nga Hlundzuki Loko U Lulamisiwa Hi Yehovha!” Nongonoko wa siku rero wu ta gimeta hi nkulumo leyi nge “Tshama Ekusuhi Na Yehovha Hilaha Yeremiya A Endleke Hakona.”

Xihloko xa hi Sonto lexi sekeriweke eka Yoxuwa 23:8 xi ri “Mi Fanele Mi Namarhela Yehovha.” Endzhaku ka risimu ra nimixo ni xikhongelo, nxaxamelo lowu nge “Ku Tlangela Vumunhu Lebyi Rhandzekaka Bya Yehovha” wu ta pfuxeta timfanelo toleto ta nhungu—“Ku Ngheneka,” “Ntwela-vusiwana,” “Ku Tlangela,” “Ku Hanana,” “Ku Nga Yi Hi Nghohe,” “Ku Rivalela,” “Ku Anakanyela” ni “Ku Tshembeka.” Kutani ku ta landzela nkulumo ya le rivaleni leyi nge “U Nga Tshinela Njhani Eka Xikwembu?” Nongonoko wa nimixo wu ta gimeta hi nkatsakanyo wa Dyondzo ya vhiki ni vhiki ya Xihondzo xo Rindza.

Xiendlakalo xo hlawuleka hi Sonto nindzhenga i drama ya lembe-xidzana ro sungula leyi nga ta tlangiwa exitejini. Yi vulavula hi riendzo leri tekiweke hi Vakreste va suka eYerusalema naswona yi ni nhloko-mhaka leyi nge, “Famba Hi Ripfumelo Ku Nga Ri Hi Ku Vona.” Endzhaku ka drama, ntsombano wu ta gimeta hi nkulumo leyi nge, “Tshama ‘Endhawini Ya Le Xihundleni Ya La Nge Henhla-henhla.’”

Endla malunghiselelo sweswi leswaku u va kona eka ntsombano lowu. Leswaku u tiva ndhawu leyi wu nga ta khomeriwa eka yona leyi nga ekusuhi ni laha u tshamaka kona, yana eHolweni ya Mfumo ya Timbhoni ta Yehovha ya le ndhawini ya ka n’wina kumbe u tsalela vakandziyisi va magazini lowu. Website leyi nge www.pr418.com yi xaxameta tindhawu leti ntsombano lowu wu nga ta khomeriwa eka tona emisaveni hinkwayo.