Ku Hambana Loku Vadyondzisi Va Ku Xiyeke
● Irena, xichudeni lexi nga eka gredi 8, u tshama emugangeni wa Kurtovo Konare le Bulgaria. Mana wakwe u nyike mudyondzi wakwe buku leyi nge Swivutiso Leswi Vantshwa Va Swi Vutisaka—Tinhlamulo Leti Tirhaka loko va hlanganile va vulavula hi tidyondzo ta n’wana wakwe.
Endzhaku ka sweswo, mudyondzisi wakwe loyi a a khome buku yoleyo, u vitane Irena leswaku a ta yima emahlweni ka tlilasi. U byele Irena a ku: “Namuntlha hi wena la nga ta dyondzisa. Ndzi hlawule ndzima leyi u nga ta yi hlaya, naswona ndzi lava u hlamusela ndlela leyi ndyangu wa ka n’wina wu swi tirhisaka ha yona swiringanyeto swa buku leyi.” Ndzima leyi a yi hlawuleke hi leyi nge “Ha Yini Ndzi Fanele Ku ‘Xixima Tatana Na Manana’?”
Loko Irena a ri karhi a ya emahlweni, swichudeni-kulobye swin’wana swi vule leswaku vatswari vakwe va hambanile ni vatswari van’wana. Mudyondzisi wa vona u va nghene enon’wini a ku: “Xana ma swi tiva leswaku ha yini ndyangu wa ka vona wu hambanile ni leyin’wana? Hileswi va dyondzaka Bibele. Ndzi dyondzise vabuti wakwe naswona ku sukela loko ndzi ve mudyondzisi a ndzi si tshama ndzi vona vana lava xiximaka ni lava kurisiweke hi ndlela leyinene ku fana na vona.”
Hiloko mudyondzisi a byela Irena leswaku a hlaya. Endzhaku ka loko a hlaye ndzimana leyi vulaka leswaku Xikwembu xi nyike vatswari vutihlamuleri byo veka milawu, mudyondzisi u vutise a ku: “Irena, swi tirha njhani sweswo endyangwini wa ka n’wina? Xana hinkwaswo leswi vatswari va wena va ku byelaka swona u swi teka swi ri nawu?”
Irena u te: “Hinkwerhu ka hina hi nga ha va ni mavonelo yo hambana-hambana kambe Bibele yi vula leswaku vana va fanele va xixima vatswari va vona va tlhela va titsongahata eka vona, kutani ha swi endla sweswo. Kambe ha pfumeleriwa ku vulavurisana hi timhaka to karhi naswona un’wana ni un’wana wa hina u nyikiwa nkarhi wo vula mavonelo yakwe.” Loko nkarhi wa tlilasi yoleyo wu herile, hinkwavo a va enerisekile hi nhlamuselo ya Irena.
U nga ha kombela buku leyi hi ku tata xiphephana lexi nga laha hansi kutani u xi rhumela eka adirese leyi kombisiweke eka xona kumbe eka leyi faneleke eka leti nga eka tluka 5 ra magazini lowu.
□ Ndzi kombela mi ndzi rhumela buku leyi kombisiweke laha.
□ Ndzi kombela mi tihlanganisa na mina malunghana ni dyondzo ya mahala ya le kaya ya Bibele.