Ndlela Yo Penda Swilo Leswi Vatliweke Swa Ndhavuko Wa Le Rhaxiya

● Vaendzi vo tala lava endzelaka eRhaxiya va rhandza ku xava swilo leswi endliweke hi mavoko swo tanihi swipopana leswi vuriwaka matryoshka. Eminkarhini ya khale swilo leswi a swi vatliwa hi mintsandza hi vavatli lava nga ni vutshila va le swimitanini swa kwalaho. Swilo swa ndhavuko leswi vatliweke swi tlhela swi pendiwa swi vuriwa khokhloma.

Ku hele malembe-xidzana vanhu va le Rhaxiya va dyela eka swilo leswi kovotliweke ni le ka minkambana leyi pendiweke naswona a va tirhisa malepula, tikhapu ni swibya swin’wana leswi vatliweke hi ntsandza. Loko va swi penda a va tala ku mpfampfarhuta ximilana kumbe xiharhi xo karhi. Vanhu va le swimitanini swa le Rhaxiya a va endla swilo leswi vatliweke hi mintsandza yo hambana-hambana.

A va tala ku endla swilo leswi hi xixika lexi a xi lehile, ku nga nkarhi lowu a ku nga ri na ntirho wo tala emasin’wini. Eka malembe ya 200 lama nga hundza kumbe ku tlula, vanhu va le swimitanini ni le madorobeni man’wana a va endla mali yo tala hi swilo leswi vatliweke. Hi xikombiso, vanhu hinkwavo lava tshamaka eximutanini xa Semënov va tshike ku rima kutani hi lembe va endla kwalomu ka timiliyoni timbirhi ta minkambana, tipuleti, tikhapu ni malepula.

Vaaki lava tshamaka ekusuhi ni doroba ra Nizhniy Novgorod va sungule ku penda swibya leswi a va swi vatla hi muvala wa nsuku. Va sungule ku endla tipende ni vhanixi leyi nga tshwiki naswona leswi se swi pendiweke a swi hoxiwa endhawini yo hisa leswaku pende yi ta khoma. Loko muvala wa swona wa silivhere wu hisiwa a wu hundzuka wa nsuku yo kwalala. Endlelo leri ra ha tirhisiwa ninamuntlha eka tifektri ta khokhloma leti nga eNizhniy Novgorod.

Swilo swa ndhavuko leswi vuriwaka khokhloma swi mpfampfarhutiwe swiluva ni swimilana leswi kumekaka ekhwatini ni le timbaleni ta le Rhaxiya swin’we ni swinyenyana ni tinhlampfi. Hakanyingi ku tirhisiwa byanyi lebyi songekeke swin’we ni matluka lama hlanganisiweke ni mihandzu yo tanihi swidzungela swa mixaka yo hambana-hambana. Va tala ku tirhisa mivala yo tshwuka, ya ntima, yo fana ni nsuku swin’we ni ya rihlaza. Namuntlha etindhawini to tala matafula ya vanhu ma khavisiwe hi mivala yo saseka ya le leyi tirhisiwaka loko ku endliwa swilo swa mavoko leswi vuriwaka khokhloma.