A Ndzi Rhandza Madzolonga

Hi ku vula ka Salvador Garza

LOKO ndza ha ri mufana, a ndzi rhandza madzolonga naswona a ndzi lwa ni munhu un’wana ni un’wana loyi a a ndzi pfuka. Nghwazi leyi nga mubi wa xibakela ya le ndhawini ya ka hina yi swi xiyile sweswo kutani yi ndzi dyondzise ku va mubi wa xibakela. Hi ku famba ka nkarhi, ndzi sungule ku ya etindhawini to hambana-hambana ta le United States tanihi mubi wa xibakele wa xiyimo xa le henhla. Endzhaku ka nkarhi, ndzi tirhe tanihi murindzi wa xirho xin’wana xa ntlawa wa swigevenga.

Ndzi hambete ndzi rhandza madzolonga hambileswi se a ndzi ri ni nsati ni vana va tsevu. Hi nkarhi wolowo a ndzi ri ni ndhawu leyi eka yona vanhu a va nwa byala va tlhela va cina nivusiku. Vanhu va ringete ku ndzi dlaya minkarhi yo hlayanyana kambe vutomi byebyo a byi ndzi tsakisa. Ndzi tshame ndzi duvula vavanuna vambirhi ndzi va vavisa swinene loko ndzi ri karhi ndzi lwa na vona. Mina ni vanghana va mina van’wana hi tshame hi kunguhata ku tlhakisa n’watipolitiki un’wana loyi a a dumile. Kambe maphorisa ma tshubule rhengu rero ivi ma ndzi pfalela. Loko maphorisa ma hlongorise vanghana va mina lavan’wana, ku ve ni ku duvulana naswona vanghana va mina hinkwavo va dlayiwile. Kutani ndzi tsakile hileswi a ndzi ri ekhotsweni hi nkarhi wolowo!

Endzhakunyana ka malembe, ndzi ntshunxiwile naswona ndzi kume ntirho. Loko ndzi ri endleleni yo ya ekaya ndzi huma entirhweni, hi xitshuketa ndzi khomiwe hi nhloko leyi a yi pandza swinene lerova a ndzi nga koti no endla nchumu. A ndzi karhatekile swinene lerova ndzi khongele eka Xikwembu ndzi kombela mpfuno. Nkatanga Dolores loyi a a dyondza Bibele ni Timbhoni ta Yehovha, u ndzi byele leswaku Xikwembu xi ni vito, ku nga Yehovha. (Pisalema 83:18) Kutani ndzi khongele eka Yehovha hi ku kongoma.

Loko ndzi hlakarherile, Dolores u ndzi khutaze leswaku ndzi ya eminhlanganweni ya Timbhoni ta Yehovha eHolweni ya tona ya Mfumo. Musa ni nkhathalelo lowu ti ndzi kombeke wona wu ndzi khumbe mbilu lerova ndzi kale ndzi khavaxela mihloti. Hikwalaho ka sweswo, na mina ndzi sungule ku dyondza Bibele na tona naswona ndlela leyi a ndzi byi teka ha yona vutomi yi cince hi ku helela. A ndzi swi rhandza leswi a ti ndzi dyondzisa swona.

Hambiswiritano, swi ndzi tekele nkarhi ku dyondza ku tikhoma. Hi xikombiso, siku rin’wana loko hi ri karhi hi chumayela hi yindlu ni yindlu ni munghana wa mina Antonio, hi kume wanuna un’wana loyi a hi rhuketeleke. Ndzi hlundzuke ngopfu lerova ndzi lave ku n’wi tshinelela. Nkateko wa kona, Antonio u ndzi siverile. Endzhakunyana, u ndzi hlamusele ndlela leyi Yesu a tiyiseleleke ha yona ku hlekuriwa ni ku xanisiwa. Muapostola Petro loyi a a ri mulandzeri wa Yesu, u tsale a ku: “Loko a tseketseriwa, a nga tlheriselanga hi ku tseketsela.” (1 Petro 2:23) Marito wolawo ma ndzi pfunile swinene.

Loko ndzi tsundzuka mindzulamiso leyi ndzi yi endleke eka malembe lama hundzeke, minkarhi hinkwayo ndzi nkhensa Yehovha hikwalaho ka moya wakwe lowo kwetsima, lowu hi pfunaka leswaku hi tikhoma hi tlhela hi va vanhu vo rhula. (Vagalatiya 5:22, 23) Ndyangu wa mina wu ni vun’we, wu tsakile naswona wu ni ku rhula. Ku tlula kwalaho, ndzi tsakela lunghelo ro va muchumayeri wa nkarhi hinkwawo, ndzi pfuna vanhu van’wana leswaku va kuma ku rhula ka Xikwembu.

[Xifaniso lexi nga eka tluka 9]

Ku dyondza Bibele swi pfune Salvador leswaku a kuma ku rhula