Swivutiso Leswi Hakanyingi Swi Vutisiwaka Hi Vanhu Lava Tsakelaka

Swivutiso swin’wana swi humelela minkarhi yo tala ku tlula swin’wana. Swi nga ri swingani swa swona swa hlamuriwa laha.

Loko Xikwembu ku ri rirhandzu, hikwalaho ka yini xi pfumelela vuhomboloki?

Xikwembu xa byi pfumelela vuhomboloki, naswona timiliyoni emisaveni hi ku swi rhandza ta byi endla. Hi xikombiso, va pfuxa tinyimpi, va lahlela tibomo eswihlangini, va hisa misava, va vanga tindlala. Timiliyoni ta dzaha ivi ti khomiwa hi khensa ya mahahu, ti tirhisa vuoswi ivi ti khomiwa hi vuvabyi bya tingana, ti tirhisa xihoko hi ndlela yo tlula mpimo ivi ti khoma hi vuvabyi bya xivindzi (cirrhosis), ni swin’wana. Vanhu vo tano entiyisweni a va swi lavi leswaku vuhomboloki hinkwabyo byi hela. Va lava ntsena leswaku mimbuyelo ya byona yi susiwa. Loko va tshovela leswi va swi byaleke, va rila va ku, “Mina ndzi dlawela yini?” Naswona va vona Xikwembu nandzu, hi laha Swivuriso 19:3 yi nge: “Vuhunguki bya munhu byi onha vutomi byakwe, manuku a veka nandzu eka HOSI.” (The New English Bible) Naswona loko Xikwembu a xo herisa vudyoho bya vona a va ta lwela ku lahlekeriwa ka vona hi ntshunxeko wo byi endla!

Xivangelo lexikulu xa Yehova xo pfumelela vuhomboloki i ku hlamula mphikamakaneta ya Sathana. Sathana Diyavulosi u vule leswaku Xikwembu a xi nga ta swi kota ku veka vanhu emisaveni lava a va ta tshembeka eka xona ehansi ka ndzingo. (Yobo 1:6-12; 2:1-10) Yehova u pfumelela Sathana a va kona leswaku a va ni nkarhi wo hetisisa mphikamakaneta yakwe. (Ringanisa Eksoda 9:16.) Sathana u hambeta a tisa makhombo sweswi, ku hambukisa vanhu eka Xikwembu, loko a ri karhi a ringeta ku hetisisa mphikamakaneta yakwe. (Nhlavutelo 12:12) Kambe, Yobo u hlayisile vutshembeki. Na Yesu u endle tano. Vakriste va ntiyiso va swi endla namuntlha.—Yobo 27:5; 31:6; Matewu 4:1-11; 1 Petro 1:6, 7.

Ndza swi lava ku tshemba paradeyisi ya la misaveni laha vanhu va nga ta hanya hi masiku, kambe sweswo a hi ku swi hundzeleta ke?

Hayi hi ku ya hi Bibele. Swi vonaka swi nga tshembisi ntsena hi leswi vanhu va tokoteke vubihi hi malembe xidzana yo tala. Yehova u vumbile misava ivi a byela vanhu ku yi tata hi vavanuna ni vavasati lavo lulama lava a va ta hlayisa vutomi bya yona bya swimilana ni bya swiharhi ni ku hlayisa vuxongi bya yona ematshan’wini yo byi onha. (Vona matluka 12 na 17.) Ematshan’wini yo va Paradeyisi yoleyo leyi tshembisiweke yi ri ku swi hundzeleta, xiyimo xa namuntlha xa gome xi vonaka xi bihe ngopfu lerova xi nga ya emahlweni. Paradeyisi yi ta xi siva.

Ripfumelo eka switshembiso leswi a hi ku swi hundzeleta. “Ku pfumela ku ta hi ku twa.” Hi ku dyondza Rito ra Xikwembu, vutlhari bya rona bya vonaka naswona ripfumelo ra kula.—Varhoma 10:17; Vaheveru 11:1.

Xana ndzi nga va hlamurisa ku yini vanhu lava solaka va vula leswaku Bibele i ntsheketo naswona a yi pfumelelani na sayense?

Vutivi bya swa khale bya Bibele byi tiyisa ku pakanisa ka matimu ya Bibele. Sayense ya ntiyiso yi pfumelelana ni Bibele. Mintiyiso leyi landzelaka a yi ri kona eBibeleni khale swinene yi nga si tshuburiwa hi vadyondzi va swa misava: ku landzelelana ka swiyimo leswi misava yi fambeke ha swona eku endlekeni ka yona, leswaku misava i xirhendzevutana, leswaku yi tshame ehenhla ka hava ni leswaku tinyanyana ta rhurha-rhurha.—Genesa ndzima 1; Esaya 40:22; Yobo 26:7; Yeremia 8:7.

Ku huhuteriwa ka Bibele ku kombisiwe hi vuprofeta lebyi hetisekeke. Daniyele u ku vhumbe ka ha ri emahlweni ku yima ni ku wa ka mimfumo ya misava, ni nkarhi lowu Mesiya a a ta ta ni ku dlawa ha wona. (Daniel tindzima 2 na 8; Da 9:24-27) Namuntlha vuprofeta byin’wana bya ha tama byi hetiseka, byi kombisa lawa tanihi ‘masiku ya makumu.’ (2 Timotiya 3:1-5; Matewu ndzima 24) Vutivi byo tano bya swilo swa nkarhi lowu taka a byi le matimbeni ya munhu. (Esaya 41:23) Leswaku u kuma vumbhoni lebyi engetelekeke, vona tibuku ta Watch Tower Bibele—Xana I Rito Ra Xikwembu Kumbe I Ra Munhu? na Life—How Did It Get Here? By Evolution or by Creation?

Xana ndzi nga swi kotisa ku yini ku hlamula swivutiso swa Bibele?

U fanele ku dyondza Bibele ni ku anakanyisisa ha yona, hi nkarhi wu ri wun’we u ri karhi u kombela leswaku moya wa Xikwembu wu ku kongomisa. (Swivuriso 15:28; Luka 11:9-13) “Loko un’wana wa n’wina a pfumala vutlhari,” ku vula Bibele, “a a kombele eka Xikwembu, lexi nyikaka vanhu hinkwavo hi tintswalo, ku nga ri na ku vilela, kutani u ta nyikiwa byona.” (Yakobo 1:5) Nakambe, ku na swipfuneto swo dyondza Bibele leswi swi faneleke ku tirhisiwa. Hakanyingi mpfuno wa van’wana wa laveka, tanihi loko Filipi a dyondze ni Muetiyopiya. (Mintirho 8:26-35) Timbhoni ta Yehova ti fambisa tidyondzo ta Bibele ni vanhu lava tsakelaka emakaya ka vona mahala. Titwi u ntshunxekile ku kombela dyondzo leyi.

Hikwalaho ka yini vo tala va kaneta Timbhoni ta Yehova ivi va ndzi byela leswaku ndzi nga dyondzi na tona?

Ku chumayela ka Yesu a ku kanetiwa, naswona u vule leswaku valandzeri vakwe na vona a va ta kanetiwa. Loko van’wana va tsakisiwile hi ku dyondzisa ka Yesu, vakaneti va vukhongeri va vutisile va ku: “Xana na n’wina mi xiseteriwile xana? I mani eka vakulukumba ni le ka Vafarisi loyi a tshamaka a pfumela eka yena xana?” (Yohane 7:46-48; 15:20) Vo tala lava va ku arisaka ku dyondza ni Timbhoni, va nga ha va va pfumala vutivi kumbe hi lava nga ni rivengo. Dyondza ni Timbhoni u tivonela hi wexe loko ku twisisa ka wena ka Bibele ku engeteleka kumbe e-e.—Matewu 7:17-20.

Hikwalaho ka yini Timbhoni ti endzela vanhu lava va nga ni vukhongeri bya vona ke?

Eku endleni leswi va landzela xikombiso xa Yesu. U yile eka Vayuda. Vayuda a va ri na vukhongeri bya vona, kambe hi tindlela to tala a byi hambukile eka Rito ra Xikwembu. (Matewu 15:1-9) Matiko hinkwawo ma ni vukhongeri bya muxaka wo karhi, hambi byi ri lebyi vuriwaka Vukriste kumbe lebyi nga riki bya Vukriste. I swa nkoka lowukulu leswaku vanhu va va ni ripfumelo leri twananaka ni Rito ra Xikwembu, naswona matshalatshala ya Timbhoni yo va pfuna eku endleni ka leswi ma seketela ku kombisa rirhandzu ra muakelani.

Xana Timbhoni ti pfumela leswaku vukhongeri bya tona hi byona ntsena byi nga bya ntiyiso?

Un’wana ni un’wana la hisekelaka vukhongeri byakwe u fanele a anakanya leswaku i bya ntiyiso. Handle ka sweswo, hikwalaho ka yini a tihlanganisa na byona? Vakriste va khongoteriwa: “Kambisisani hinkwaswo, mi tiya eka leswinene.” (1 Vatesalonika 5:21) Munhu u fanele ku kambisisa swinene leswaku ripfumelo rakwe ri ta seketeriwa hi Matsalwa, hikuva ku na ripfumelo rin’we ntsena ra ntiyiso. Vaefesa 4:5 yi tiyisa leswi, yi ku “ku ni Hosi yin’we, ni ku pfumela kun’we, ni nkhuvulo wun’we.” Yesu a nga pfumelelananga na rona langutelo ra manguva lawa leri tsaneke ra leswaku ku na tindlela to tala, vukhongeri byo tala, lebyi hinkwabyo byi yaka eku hlayisekeni. Kambe, u te: “Nyangwa leyi yisaka evuton’wini yi khumile swinene, ni ndlela leyi yaka kona yi larile, kutani lava va yi kumaka a va talanga.” Timbhoni ta Yehova ti tshemba leswaku ti yi kumile. Handle ka sweswo, a va ta lava vukhongeri byin’wana.—Matewu 7:14.

Xana va pfumela leswaku hi vona ntsena lava nga ta pona?

E-e. Timiliyoni to tala leti hanyeke eka malembe xidzana lama hundzeke ni leti a ti nga ri Timbhoni ta Yehova ti ta pfuxiwa ivi ti va ni nkarhi wa vutomi. Vanyingi lava sweswi va hanyaka va nga ha yimela ntiyiso ni ku lulama emahlweni ka ‘nhlomulo lowukulu,’ naswona va ta kuma ku hlayiseka. Ku tlula kwalaho, Yesu u vule leswaku a hi fanelanga ku avanyisana. Hi vona xivumbeko xa le handle; Xikwembu xi languta mbilu. Xi vona kahle, xi avanyisa hi tintswalo. Xi veke ku avanyisa emavokweni ya Yesu, hayi ya hina.—Matewu 7:1-5; 24:21.

I minyikelo ya njhani ya timali leyi rindzeriweke eka lava va vaka kona etidyondzweni ta Timbhoni ta Yehova?

Malunghana ni minyikelo ya timali, muapostola Pawulo u te: “Un’wana ni un’wana a a nyike hi laha a pimaniseke ha kona embilwini ya yena, a humesa hi ku ntshunxeka, ku nga ri hi ku vilela, hikuva Xikwembu xi rhandza loyi a nyikaka a tsakile.” (2 Vakorinto 9:7) Etiholweni ta Mfumo ni le tiholweni ta ntsombano ta Timbhoni ta Yehova ku hava minhlengo leyi tshamaka yi tekiwa. Ku vekiwa mabokisi leswaku swi ta pfuna mani na mani la lavaka ku nyikela leswaku a endla tano. Ku hava la tivaka leswi van’wana va swi nyikelaka. Van’wana va swi kota ku nyikela ku tlula van’wana; van’wana va nga ha va va nga swi koti ku nyikela xanchumu. Yesu u kombise langutelo lerinene loko a vulavule hi xibye xa nhlengo etempeleni eYerusalema ni lava va nyikelaka: I matimba ya munhu yo nyika ni moya wo nyika leswi ku nga mhaka yikulu, hayi ntsengo wa mali.—Luka 21:1-4.

Loko ndzi va un’wana wa Timbhoni ta Yehova, xana ndzi ta rindzeriwa ku chumayela hi laha ti endlaka ha kona ke?

Loko munhu a tala hi vutivi bya Paradeyisi leyi tshembisiweke ya laha misaveni ehansi ka Mfumo wa Kriste, u lava ku byi avela van’wana. U fanele ku swi endla na wena. I mahungu lamanene!—Mintirho 5:41, 42.

Ku endla leswi i ndlela ya risima yo kombisa leswaku u mudyondzisiwa wa Yesu Kriste. EBibeleni Yesu u vitaniwa “mbhoni leyi tshembekeke, ya ntiyiso.” Loko a ri emisaveni u chumayerile, a ku: “Mfumo wa matilo wu le kusuhi,” naswona u rhumele vadyondzisiwa vakwe ku endla leswi fanaka. (Nhlavutelo 3:14; Matewu 4:17; 10:7) Endzhakunyana, Yesu u lerise valandzeri vakwe a ku: “Yanani ha kona, mi ya hundzula vamatiko hinkwavo leswaku va va vadyondzisiwa va mina, . . . mi va dyondzisa.” Nakambe u vhumbe leswaku, ku nga si fika makumu, “Evangeli leyi ya Mfumo yi ta twarisiwa emisaveni hinkwayo, leswaku yi va vumbhoni eka vanhu va matiko hinkwawo.”—Matewu 28:19, 20; 24:14.

Ku ni tindlela to tala to twarisa mahungu lawa manene. Ku vulavurisana ni vanghana ni lava u tolovelaneke na vona hakanyingi swi pfula ndlela yo endla tano. Van’wana va swi endla hi ku tsala mapapila kumbe hi ku tirhisa riqingho. Van’wana va rhumela tibuku leti nga ni mhaka leyi va anakanyaka leswaku loyi va tolovelaneke na yena u ta yi tsakela swinene. Hikwalaho ka ku navela ko ka ti nga lahlekeriwi na hi un’we, Timbhoni ti famba hi yindlu na yindlu na rungula leri.

Bibele yi tamele xirhambo lexi xo kufumela: “Moya ni Mutekiwa va ri: ‘Tana!’ Ni loyi a swi twaka a a vule a ku: ‘Tana!’ Loyi a nga ni torha a a te; ni loyi a swi navelaka a a teke mati ya vutomi a nga hakeli.” (Nhlavutelo 22:17) Ku byela van’wana hi ta misava ya Paradeyisi ni mikateko ya yona swi fanele swi endliwa hi ku swi rhandza, hikwalaho ka mbilu leyi taleke ku navela ko avelana mahungu lawa manene ni van’wana.

Ha tiyiseka leswaku u na swivutiso swin’wana ehenhleni ka Timbhoni ta Yehova ni leswi va swi pfumelaka. Kumbexana swin’wana swa swona hi leswi swi pfuxaka ku nonon’hwa hi xivumbeko. Hi ta rhandza ku swi hlamula. Xivandla i xintsongo eka broxara leyi; kutani hi ku rhambela ku vutisa Timbhoni ta kwalaho, ku nga va etidyondzweni ta vona eHolweni ya Mfumo kumbe loko va ku endzela ekaya ka wena. Kumbe, u nga ha rhumela swivutiso swa wena eka Watch Tower Society, ehofisini ya rhavi leyi nga kusuhi na wena; vona nxaxamelo lowu nga laha hansi.