Swivutiso Leswi Hakanyingi Swi Vutisiwaka Hi Vanhu Lava Tsakelaka

Loko Xikwembu xi ri rirhandzu, hikwalaho ka yini xi pfumelela vuhomboloki?

XIKWEMBU xa byi pfumelela vuhomboloki, naswona vanhu va timiliyoni emisaveni va byi endla hi vomu. Hi xikombiso, va pfuxa tinyimpi, va lahlela tibomo eswihlangini, va onha misava naswona va vanga tindlala. Vanhu va timiliyoni va dzaha ivi va khomiwa hi vuvabyi bya khensa ya mahahu, va oswa ivi va khomiwa hi vuvabyi lebyi tluletiwaka hi vuxaka bya rimbewu, va nwa swakunwa swa xihoko ku tlula mpimo ivi va khomiwa hi vuvabyi bya xivindzi, ni swin’wana. Entiyisweni vanhu vo tano a va swi lavi leswaku vuhomboloki hinkwabyo byi hela. Va lava ntsena leswaku ku herisiwa vuyelo bya vuhomboloki byo tano. Loko va tshovela leswi va swi byaleke, va rila va ku, “Mina ndzi dlawela yini?” Naswona va vona Xikwembu nandzu, hilaha Swivuriso 19:3 yi vulaka hakona: “Vuhunguki bya munhu byi onha vutomi byakwe, kutani a veka HOSI nandzu.” (The New English Bible) Naswona loko Xikwembu a xo herisa vudyoho bya vona a va ta lwela ku lahlekeriwa ka vona hi ntshunxeko wo byi endla!

Xivangelo lexikulu xa Yehovha xo pfumelela vuhomboloki i ku hlamula mphikamakaneta ya Sathana. Sathana Diyavulosi u vule leswaku Xikwembu a xi nga ta swi kota ku veka vanhu emisaveni lava a va ta tshembeka eka xona loko va ringiwa. (Yobo 1:6-12; 2:1-10) Yehovha u pfumelela Sathana a hambeta a hanya leswaku a tiyisekisa mphikamakaneta yakwe. (Eksoda 9:16) Loko Sathana a ri karhi a ringeta ku tiyisekisa mphikamakaneta yakwe, u hambeta a tisa makhombo sweswi leswaku a hambukisa vanhu eka Xikwembu. (Nhlavutelo 12:12) Kambe, Yobo u tshame a tshembekile. Na Yesu u endle tano. Vakreste va ntiyiso va endla tano namuntlha.—Yobo 27:5; 31:6; Matewu 4:1-11; 1 Petro 1:6, 7.

Ndza swi lava ku pfumela leswaku ku ta va ni paradeyisi la misaveni laha vanhu va nga ta hanya hi masiku, kambe xana swa tshembisa?

Hayi hi ku ya hi Bibele. Swi vonaka swi nga tshembisi ntsena hileswi vanhu va voneke vubihi hi malembe-xidzana yo tala. Yehovha u vumbe misava ivi a byela vanhu leswaku va yi tata hi vavanuna ni vavasati lavo lulama lava a va ta hlayisa swimilana ni swiharhi swa yona, va hlayisa vuxongi bya yona ematshan’weni yo byi onha. (Vona matluka 12 na 17.) Ematshan’weni yo va Paradeyisi yoleyo leyi tshembisiweke yi ri ku hundzeleta swilo, xiyimo xa namuntlha xa gome xi bihe ngopfu ku va xi nga ya emahlweni. Paradeyisi yi ta xi siva.

Xana ndzi nga va hlamurisa ku yini vanhu lava solaka, va vula leswaku Bibele i ntsheketo naswona a yi pfumelelani na sayense?

Ku pfumela switshembiso leswi a hi ku hundzeleta. “Ripfumelo ri landzela leswi twiweke.” Hi ku dyondza Rito ra Xikwembu, vutlhari bya rona bya vonaka naswona ripfumelo ra kula.—Varhoma 10:17; Vaheveru 11:1.

Vuyimburi bya swilo swa le nkarhini wa Bibele byi tiyisa ku pakanisa ka matimu ya Bibele. Sayense ya ntiyiso yi pfumelelana ni Bibele. Mintiyiso leyi landzelaka a yi ri kona eBibeleni khale swinene yi nga si tshuburiwa hi swidyondzi swa misava: ku landzelelana ka swiyimo leswi misava yi fambeke ha swona eku endliweni ka yona, leswaku misava i xirhendzevutana, leswaku a yi titsheganga ha nchumu ni leswaku tinyanyana ta rhurha-rhurha.—Genesa ndzima 1; Esaya 40:22; Yobo 26:7; Yeremiya 8:7.

Leswaku Bibele yi huhuteriwile swi kombisiwa hi vuprofeta lebyi hetisekeke. Daniyele u ku vule ka ha ri emahlweni ku yima ni ku wa ka mimfumo ya misava, ni nkarhi lowu Mesiya a a ta ta ni ku dlawa ha wona. (Daniyele tindzima 2 na 8; 9:24-27) Namuntlha vuprofeta byin’wana bya ha tama byi hetiseka, byi kombisa nkarhi lowu tanihi ‘masiku yo hetelela.’ (2 Timotiya 3:1-5; Matewu ndzima 24) Vutivi byo tano bya swilo swa nkarhi lowu taka a byi le matimbeni ya munhu. (Esaya 41:23) Leswaku u kuma vumbhoni lebyi engetelekeke, vona buku leyi nge Bibele—Xana I Rito Ra Xikwembu Kumbe I Ra Munhu? ni leyi nge Is There a Creator Who Cares About You?, leti kandziyisiweke hi Watchtower Bible and Tract Society.

Xana ndzi nga swi kotisa ku yini ku hlamula swivutiso hi Bibele?

U fanele ku dyondza Bibele ni ku anakanyisisa ha yona, hi nkarhi lowu fanaka u kombela leswaku moya wa Xikwembu wu ku kongomisa. (Swivuriso 15:28; Luka 11:9-13) Bibele yi ri: “Loko mani na mani eka n’wina a kayivela vutlhari, a a hambete a kombela eka Xikwembu, hikuva xi nyika hinkwavo hi mbilu yo basa, handle ka ku sandza; kutani u ta nyikiwa byona.” (Yakobo 1:5) Nakambe, ku na swipfuneto swo dyondza Bibele leswi swi faneleke ku tirhisiwa. Hakanyingi mpfuno wa van’wana wa laveka, tanihi loko Filipi a dyondze ni Muetiyopiya. (Mintirho 8:26-35) Timbhoni ta Yehovha ti fambisa tidyondzo ta Bibele ta mahala ni vanhu lava tsakelaka, emakaya ya vona. Titwe u ntshunxekile ku kombela dyondzo leyi.

Hikwalaho ka yini vo tala va kaneta Timbhoni ta Yehovha ivi va ndzi byela leswaku ndzi nga dyondzi na tona?

Ku chumayela ka Yesu a ku kanetiwa, naswona u vule leswaku valandzeri vakwe na vona va ta kanetiwa. Loko van’wana va tsakisiwe hi ku dyondzisa ka Yesu, vakaneti va vukhongeri va vutise va ku: “N’wina a mi hambukisiwanga, a hi swona ke? A nga kona ni un’we wa vafumi kumbe wa Vafarisi loyi a pfumeleke eka yena, a hi swona ke?” (Yohane 7:46-48; 15:20) Vo tala lava va ku arisaka ku dyondza ni Timbhoni, va nga ha va va pfumala vutivi kumbe hi lava va ti vengaka. Dyondza ni Timbhoni u tivonela hi wexe loko ku twisisa ka wena ka Bibele ku engeteleka kumbe e-e.—Matewu 7:17-20.

Hikwalaho ka yini Timbhoni ti endzela vanhu lava va nga ni vukhongeri bya vona?

Hi ku endla tano ti landzela xikombiso xa Yesu. U yile eka Vayuda. Vayuda a va ri na vukhongeri bya vona, kambe hi tindlela to tala a byi hambukile eka Rito ra Xikwembu. (Matewu 15:1-9) Matiko hinkwawo ma ni vukhongeri bya muxaka wo karhi, hambi byi ri lebyi vuriwaka Vukreste kumbe lebyi nga riki bya Vukreste. I swa nkoka lowukulu leswaku vanhu va va ni vupfumeri lebyi twananaka ni Rito ra Xikwembu, naswona matshalatshala ya Timbhoni yo va pfuna eku endleni ka leswi ma seketela ku kombisa rirhandzu ra muakelani.

Xana Timbhoni ti pfumela leswaku vukhongeri bya tona hi byona ntsena byi nga bya ntiyiso?

Un’wana ni un’wana la hisekelaka vukhongeri byakwe u fanele a byi teka byi ri bya ntiyiso. Handle ka sweswo, hikwalaho ka yini a tihlanganisa na byona? Vakreste va tsundzuxiwa: “Tiyisekani hi swilo hinkwaswo; khomelelani swi tiya eka leswinene.” (1 Vatesalonika 5:21) Munhu u fanele ku kambisisa swinene loko vupfumeri byakwe byi seketeriwa hi Matsalwa, hikuva ku ni vupfumeri byin’we ntsena bya ntiyiso. Vaefesa 4:5 yi tiyisa leswi, yi vula leswaku “Hosi i yin’we, ripfumelo i rin’we, nkhuvulo i wun’we.” Yesu a nga pfumelelananga na rona langutelo ra manguva lawa leri tsaneke ra leswaku ku na tindlela to tala, vukhongeri byo tala, lebyi hinkwabyo byi yaka eku hlayisekeni. Kambe, u te: “Nyangwa leyi yisaka evuton’wini yi khumile, ni gondzo ra kona ri larile, naswona a hi vangani lava ri kumaka.” Timbhoni ta Yehovha ti tshemba leswaku ti yi kumile. Handle ka sweswo, a ti ta lava vukhongeri byin’wana.—Matewu 7:14.

Xana ti pfumela leswaku hi tona ntsena leti nga ta ponisiwa?

E-e. Timiliyoni leti hanyeke eka malembe-xidzana lama hundzeke ni leti a ti nga ri Timbhoni ta Yehovha ti ta pfuxiwa ivi ti tsakela vutomi. Vanhu vo tala lava hanyaka sweswi va nga ha amukela ntiyiso ni ku lulama, ku nga si fika ‘nhlomulo lowukulu,’ naswona va ta kuma ku hlayiseka. Ku tlula kwalaho, Yesu u vule leswaku a hi fanelanga hi avanyisana. Hina hi vona swa le handle; Xikwembu xi languta mbilu. Xi vona kahle kutani xi avanyisa hi tintswalo. Xi veke ntirho wa ku avanyisa emavokweni ya Yesu, hayi ya hina.—Matewu 7:1-5; 24:21; 25:31.

I minyikelo ya njhani ya timali leyi lava va vaka kona eminhlanganweni ya Timbhoni ta Yehovha va nga yi nyikelaka?

Malunghana ni minyikelo ya timali, muapostola Pawulo u te: “Un’wana ni un’wana a a endle hilaha a boheke hakona embilwini yakwe, ku nga ri hi ku vilela kumbe hi ku sindzisiwa, hikuva Xikwembu xi rhandza munyiki la tsakeke.” (2 Vakorinto 9:7) Etiholweni ta Mfumo ni le tiholweni ta mintsombano ya Timbhoni ta Yehovha, a ku endliwi minhlengo. Ku vekiwa mabokisi ku pfuna mani na mani la lavaka ku nyikela leswaku a endla tano. Ku hava la tivaka leswi van’wana va swi nyikelaka kumbe loko munhu a nyikele swo karhi. Van’wana va swi kota ku nyikela ku tlula van’wana; van’wana va nga ha va va nga swi koti ku nyikela xanchumu. Yesu u kombise langutelo lerinene loko a vulavule hi bokisi ra xuma etempeleni eYerusalema ni lava va nyikelaka: Xa nkoka hi leswi munhu a kotaka ku nyikela ha swona ni moya lowu a nyikaka ha wona, hayi ntsengo wa mali.—Luka 21:1-4.

Loko ndzi va Mbhoni ya Yehovha, xana ndzi ta fanela ku chumayela hilaha ti chumayelaka hakona?

Loko munhu a tswonga vutivi byo tala malunghana ni Paradeyisi leyi tshembisiweke ya laha misaveni ehansi ka Mfumo wa Kreste, u lava ku bula ha byona ni van’wana. Na wena u ta endla tano. I mahungu lamanene!—Mintirho 5:41, 42.

Ku endla leswi i ndlela ya risima yo kombisa leswaku u mudyondzisiwa wa Yesu Kreste. EBibeleni Yesu u vitaniwa “mbhoni yo tshembeka ni ya ntiyiso.” Loko a ri emisaveni u chumayele a ku: “Mfumo wa matilo wu tshinele,” naswona u rhume vadyondzisiwa vakwe leswaku va endla leswi fanaka. (Nhlavutelo 3:14; Matewu 4:17; 10:7) Endzhakunyana, Yesu u lerise valandzeri vakwe a ku: “Hikokwalaho fambani mi ya endla vanhu va matiko hinkwawo va va vadyondzisiwa, . . . mi va dyondzisa.” Nakambe u profete leswaku, ku nga si fika makumu, “mahungu lamanene lawa ya mfumo ma ta chumayeriwa emisaveni hinkwayo leyi akiweke leswaku byi va vumbhoni ematikweni hinkwawo.”—Matewu 24:14; 28:19, 20.

Ku ni tindlela to tala to twarisa mahungu lawa manene. Ku vulavurisana ni vanghana ni lava u tolovelaneke na vona hakanyingi swi pfula ndlela yo endla tano. Van’wana va swi endla hi ku tsala mapapila kumbe hi ku tirhisa riqingho. Van’wana va rhumela tibuku leti tameleke mhaka leyi va anakanyaka leswaku loyi va tolovelaneke na yena u ta yi tsakela swinene. Hikwalaho ka ku navela ku ka ti nga siyi munhu, Timbhoni ti famba hi yindlu na yindlu ti vula rungula leri.

Bibele yi tamele xirhambo lexi nge: “Moya ni mutekiwa va hambeta va ku: ‘Tana!’ Naswona mani na mani la swi twaka a a vule a ku: ‘Tana!’ Mani na mani la khomiweke hi torha a a te; mani na mani la swi navelaka a a nwe mati ya vutomi mahala.” (Nhlavutelo 22:17) Ku byela van’wana hi ta misava leyi nga Paradeyisi ni mikateko ya yona swi fanele swi endliwa hi ku swi rhandza, hi mbilu leyi hisekelaka ku bula ni van’wana hi mahungu lawa manene.

Ha tiyiseka leswaku u na swivutiso swin’wana malunghana ni Timbhoni ta Yehovha ni leswi ti swi pfumelaka. Kumbexana timhaka tin’wana ti pfuxa njhekanjhekisano. A hi ta swi rhandza ku hlamula swivutiso swa wena. Ntsena matluka ya broxara leyi i matsongo, kutani hi ku kombela leswaku u vutisa Timbhoni ta ndhawu ya ka n’wina. U nga endla tano eminhlanganweni ya tona eHolweni ya Mfumo kumbe loko ti ku endzela ekaya ra wena. Kumbe, u nga ha rhumela swivutiso swa wena eka Watch Tower, u tirhisa adirese leyi faneleke eka leti xaxametiweke laha hansi.