Xichudeni Xi Khome Nyarhi Hi Timhondzo
Peter u sungula ku ka a nga ha tshamiseki hikwalaho ko chuha. Thicara rakwe, wansati loyi Peter a n’wi xiximaka swinene, u heta ku hlamusela ndlela leyi Charles Darwin na dyondzo yakwe ya ku hundzuka ka swilo swi endleke leswaku sayense yi twisiseka ni ku tshunxa vanhu eka tidyondzo leti nga riki ntiyiso. Sweswi se thicara ri kombele swichudeni leswaku swi ta hlamusela mavonelo ya swona hi mhaka leyi.
Peter u khome nyarhi hi timhondzo. Vatswari vakwe va n’wi dyondzise leswaku Xikwembu hi xona xi nga tumbuluxa misava ni hinkwaswo leswi nga eka yona. Va n’wi byele leswaku leswi nga eBibeleni mayelana ni ntumbuluko i ntiyiso naswona dyondzo ya ku tihundzukela ka swilo ko va garingani wa garingani, a yi na vumbhoni. Thicara ra Peter ni vatswari vakwe va lava ku n’wi pfuna. Kambe Peter u fanele a tshemba mani?
Lembe ni lembe eswikolweni ku endleka mhaka yo fana ni leyi emisaveni hinkwayo. Xana Peter ni lava nga eka xiyimo xo fana ni xa yena va fanele va endla yini? Xana wa pfumela leswaku va fanele va endla xiboho eka mhaka leyi? Va fanele va kambisisa vumbhoni bya ku tiendlekela ka swilo ni bya ku tumbuluxiwa ka swilo kutani va tihlawulela hi voxe leswaku va tshemba yini.
Kahlekahle, Bibele yi hi tsundzuxa leswaku hi nga tshembi swin’wana ni swin’wana leswi vanhu va swi dyondzisaka. Mutsari un’wana wa Bibele u te: “Munhu loyi a nga riki na ntokoto u tshemba rito rin’wana ni rin’wana, kambe lowo tlhariha u anakanyisisa hi leswi a nga ta swi endla.” (Swivuriso 14:15) Bibele yi khutaza Vakreste ku ‘tirhisa matimba ya vona yo anakanya’ ni ku kambisisa loko leswi va swi dyondzaka ku ri ntiyiso.—Varhoma 12:1, 2.
Broxara leyi a yi endleriwanga ku seketela mitlawa ya vukhongeri leyi dyondzisaka hi ntumbuluko exikolweni. Kambe yi endleriwe ku hi pfuna hi kambisisa mhaka leyi vuriwaka hi van’wana ya leswaku vutomi byi lo tiendlekela ni leswaku leswi Bibele yi swi vulaka hi ntumbuluko i ntsheketo.
Hi ta dzika eka sele hikuva hi yona masungulo ya vutomi. U ta kota ku dyondza hi swilo swa nkoka mayelana ni ndlela leyi tisele ti vumbiwaka hayona. U ta tlhela u kambisisa swivangelo leswi endlaka vanhu va tshemba dyondzo ya ivholuxini.
Ku nga ri khale hinkwerhu hi ta fanele ku hlamula xivutiso lexi nge, Xana vutomi byi lo tumbuluxiwa kumbe byi lo tiendlekela? Kumbexana se u dya marhambu ya nhloko hi mhaka leyi. Broxara leyi yi ta komba byin’wana bya vumbhoni lebyi endleke vanhu vo tala va tshemba leswaku vutomi byi lo tumbuluxiwa.