Xifunengeto Xa Le Ndzeni

Eka Vantshwa Va Hina Lava Rhandzekaka,

Yehovha Xikwembu, Tata wa n’wina wa le tilweni u mi rhandza swinene. U lava leswaku mi tsaka. Kambe mi nga ha tivutisa leswaku, ‘Xana swa koteka ku tsaka hakunene namuntlha?’ Lexi i xivutiso lexinene. Phela hi langutana ni swiphiqo swo tala evuton’wini bya hina. Masiku hinkwawo hi va ni swiphiqo leswi hi hetelaka ntsako. Kambe Tata wa hina wa le tilweni u ta hi pfuna! Rito ra Yena ri hi nyika nkongomiso lowu hi wu lavaka leswaku hi langutana ni swiphiqo swa vutomi. Hambileswi Bibele yi tsariweke khale swinene, ndzayo ya yona ya ha tirha ninamuntlha hilaha a yi tirha hakona loko ya ha tsariwa.—Pisalema 119:98, 99; 2 Timotiya 3:16, 17.

Hi lunghiselele buku leyi hikuva ha mi rhandza. Hi lava leswaku mi tsaka nileswaku swilo swi mi fambela kahle evuton’wini. Hikwalaho, hi mi khutaza leswaku mi hlaya buku leyi hinkwayo mi tlhela mi yi kambisisa loko mi langutana ni swiphiqo. Xikongomelo xin’wana xa buku leyi i ku mi khutaza leswaku n’wina ni vatswari va n’wina mi vulavurisana kahle. Hi tshemba leswaku mi ta yi hlaya mi tlhela mi yi dyondza swin’we buku leyi. Yingiselani vutlhari ni ntokoto wa vatswari va n’wina!

Hi mi navelela leswinene,

Huvo Leyi Fumaka Ya Timbhoni Ta Yehovha