Xana U Ta Endla Ku Rhandza Ka Yehovha?

Ha nkhensa leswi u tinyikeke nkarhi wa ku kambisisa broxara leyi leswaku u ta dyondza hi Timbhoni ta Yehovha, u dyondza ni hi mintirho ya hina ni ku vona ndlela leyi nhlengeletano ya hina yi hleriweke ha yona. Ha tshemba leswaku yi ku pfunile u vona leswaku hi hina hi endlaka ku rhandza ka Yehovha namuntlha. Hi ku khutaza leswaku u ya emahlweni u dyondza hi Xikwembu, u byela ndyangu ni vanghana va wena hi leswi u swi dyondzaka ni ku hlanganyela na hina nkarhi na nkarhi eminhlanganweni ya Vukreste.—Vaheveru 10:23-25.

U ta kuma leswaku loko u ya u dyondza hi Yehovha, u ta swi xiya leswaku wa ku rhandza hakunene. Kutani u ta susumeteleka ku endla leswi u nga swi kotaka leswaku u kombisa leswaku na wena wa n’wi rhandza. (1 Yohane 4:8-10, 19) Kambe u nga ku kombisa njhani ku navela koloko eka ndlela leyi u hanyaka ha yona? Ha yini ku yingisa milawu ya yena ya mahanyelo swi ta ku vuyerisa? Naswona i yini lexi nga ta ku pfuna leswaku u lava ku endla ku rhandza ka Xikwembu swin’we na hina? Loyi a dyondzaka Bibele na wena u ta tsakela ku ku pfuna ku kuma tinhlamulo ta swivutiso leswi leswaku wena ni ndyangu wa wena mi ta “[tihlayisa] erirhandzwini ra Xikwembu, . . . mi ri ni xikongomelo xa vutomi lebyi nga heriki.”—Yudha 21.

Ha ku rhamba leswaku u ya emahlweni u endla nhluvuko hi tlhelo ra moya hi ku dyondza nkandziyiso lowu nge “Tihlayiseni eRirhandzwini Ra Xikwembu.”