Xingheniso
XIKONGOMELO XA BUKU LEYI
Yehovha Xikwembu u khutaza vanhu vakwe leswaku va ‘hambeta va lava’ ku twisisa onge hiloko va lava “xuma lexi fihliweke.” (Swiv. 2:1-5) Leswi swi vula leswaku hi fanele hi tinyiketela loko hi lavisisa tinhlamulo ta swivutiso leswi hi nga na swona leswi sekeriweke eBibeleni ni loko hi lava mpfuno eka swilo leswi hi karhataka evuton’wini. Buku leyi ya Nkongomiso Wo Endla Ndzavisiso Wa Timbhoni Ta Yehovha yi endleriwe ku ku pfuna loko u ri karhi u endla ndzavisiso.
Buku leyi a yi longoloxi tinhlokomhaka hinkwato leti ku nga tshama ku buriwa ha tona eka minkandziyiso ya hina. Kambe, eka nhlokomhaka yin’wana ni yin’wana leyi longoloxiweke, ku ni swikombo swa rungula ra sweswinyana leri nga ra nkoka eka minkandziyiso ya Xitsonga, ngopfu-ngopfu ku sukela hi lembe ra 2000 ku ta fikela sweswi.
NDLELA YO SUNGULA KU ENDLA NDZAVISISO
Pfula eka Leswi Nga Endzeni eka tluka leri landzelaka ivi u hlawula nhlokomhaka leyi nga ha vaka ni rungula leri u ri lavaka. Swi nga ha lava u languta eka tinhlokomhaka to hlayanyana leswaku u ri kuma. Swihlokwana leswi longoloxiweke ehansi ka nhlokomhaka yin’wana ni yin’wana swi ta ku pfuna ku endla ndzavisiso hi ndlela yo olova.
Endzhaku ka sweswo, pfula tluka leri kombisiweke kutani u ta kuma nhlokomhaka ni xihlokwana lexi u xi hlawuleke. Eka tinhlokomhaka ta swihloko ni tindzima leti longoloxiweke kwalaho, hlawula leti u lavaka ku ti kambisisa. Loko u ri na yona minkandziyiso yoleyo ekaya ka wena, eka Internet kumbe elayiburari ya le Holweni ya n’wina ya Mfumo, lava xihloko kumbe ndzima leyi kombisiweke. Tsundzuka leswaku hambiloko nhlokomhaka ya xihloko yi nga ha vonaka yi nga fambisani ni mhaka leyi u yi hlawuleke, swihloko leswi longoloxiweke swi ta va swi ri ni rungula leri fambisanaka ni mhaka yoleyo.
Loko u lava nhlamuselo ya ndzimana yo karhi ya le Bibeleni, pfula eka xiyenge lexi nge Matsalwa Lama Hlamuseriweke. Eka nxaxamelo lowu ku katsiwe tindzimana leti hlamuseriweke ntsena.
Tsundzuka leswaku swi lava nkarhi ni matshalatshala leswaku u kuma “xuma lexi fihliweke.” Hikwalaho lehisa mbilu loko u ri karhi u lava nhlamulo yo karhi kumbe nkongomiso wo karhi. Loko u ya u yi tirhisa swinene buku leyi ya Nkongomiso Wo Endla Ndzavisiso, swi ta ku olovela swi tlhela swi ku tsakisa ku kuma rungula leri u ri lavaka. Yehovha u ta katekisa matshalatshala ya wena a tlhela a ku pfuna leswaku u kuma vutlhari ni ku twisisa.—Swiv. 2:6; 4:5.
LESWI NGA KU PFUNAKA:
❐ = Swihloko leswi tlhandlamanaka
§ = Xihlokwana, xiyenge kumbe xiphemu
¶ = (Ti-)Ndzimana
ndz. = Ndzima
tl. kumbe matl. = Tluka kumbe matluka
No. = Nomboro
12/2004 = N’hweti/Lembe
2/1/2010 = N’hweti/Siku/Lembe
Minkandziyiso leyi landzelaka yi ni swikombo swa yona:
Vuyeriwa Eka Vuleteri Bya Xikolo Xa Vutirheli Bya Le Tilweni
Ndlela Leyi Nhlengeletano Ya Yehovha Yi Hleriweke Ha Yona
“Vona Tiko Lerinene”