English w85 8/15

Mufundhisi U Rivale Ku Ya eKerekeni

Ntokoto lowu landzelaka lowu humaka etikweni ra Vantima ra Kenya wu komba ku tsakisa ka buku leyi dyondzisaka leyi nge Buku Yanga ya Timhaka Ta Bibele.

Kopi ya buku leyi yi fambiseriwe mufundhisi mixo wun’wana hi ku hatlisa kereke yakwe yi nga si nghena. U sungule ku yi langutisa hi ku anghwetla ivi a godzomberiwa ha yona lerova a rivala ku ya ekerekeni ku ya fambisa ntirho wa vukhongeri. Hi nkarhi lowu faneleke, vatirheli vambirhi va kereke va rhumeriwe ekaya rakwe, laha va n’wi kumeke a ri karhi a hlaya buku leyi nge Timhaka Ta Bibele. Mufundhisi u sungule ku va hlamusela ndlela leyi buku leyi a yi nyanyula ha yona. Na vona lava va sungule ku godzomberiwa hi yona kutani va honisa ku tlhelela endzhaku.

Endzhaku ka nkarhinyana, van’wana ekerekeni va yile endlwini ya mufundhisi, kutani lexi va hlamariseke, va kume vavanuna lava vanharhu va ri karhi va kanela hi Buku Yanga ya Timhaka Ta Bibele. Vuyelo-ke? Ematshan’wini ya ntirho wa nkarhi na nkarhi wa kereke mixo wolowo, a ku ri ni bulo ra xitshuketa ra buku leyi nge Timhaka Ta Bibele. Vo tala va lave tikopi ta vona vini ivi va kombela leswaku murhumiwa wa Timbhoni ta Yehova a va tisela yin’we.

Buku leyi ya matluka ya 256, leyi nga ni swifaniso swo xonga yi nyika muhlayi mianakanyo leyi anameke ya leswi Bibele yi vulavulaka ha swona. U nga tikumela kopi. Hi ku olova tata kutani u rhumela fomo leyi fambisanaka na wona kun’we ni munyikelo wa R4,50.