Xana U Nga Tilulamisela Ku Xanisiwa Sweswi?

“Loko va ndzi xanisile, na n’wina va ta mi xanisa.”—YOHANE 15:20.

1, 2. I xiendlo xihi lexi nga rindzeriwangiki lexi tihulumendhe tin’wana ti xi endleke ehenhla ka Timbhoni ta Yehova?

TITEKI U ri emubedweni siku rin’wana ni mpundzu. Hi ku twa vurhongo wa ha Iwa ni timbilu leswaku u nga pfuka hi ku hatlisa kumbe u nga tama u wisa nkarhinyana. Kambe xo sungula, u pfula xiya-ni-moya u yingisela timhaka ta mixo. Hi ku hatlisa, muhlayi wa mahungu a ku phaphamisa. A tivisa: “Ku ya hi xileriso xa hulumendhe, ntlawa lowu tiviwaka tanihi Timbhoni ta Yehova wu yirisiwile etikweni hinkwaro.” Ku wisa hinkwako ka wena nkwee!

² Leswi, kumbe swo fana na swona, ku vile ntokoto wa Vakriste ematikweni man’wana manguva lawa. Hakanyingi, ku vile na switsundzuxo swa leswi swi nga ta humelela. Kambe minkarhi yin’wana ku yirisiwa ku ve loku nga rindzeriwangiki hi laha ku heleleke. Leswi swi fanele ku hi hlamarisa-xe?

3. I mintokoto yihi leyi fanaka na yona leyi Yesu Kriste a veke na yona hi 33 C.E.?

³ A swi tano. Swilo leswi fanaka swi humelerile hi lembe xidzana ro sungula. Tsundzuka hi laha Yesu Kriste, hi ku nghena ka ximun’wana xa 33 C.E., a ngheneke eYerusalema a khandziyile mbhongolo. Vanhu hi ku tsaka va n’wi dzunisa, va andlala tinguvu ta vona endleleni. Kambe ku humelele yini masiku ma nga ri mangani endzhakunyana? Yesu a a konanisiwa emahlweni ka Pontiyo Pilato, kutani ntshungu lowukulu lowu nga ni torha ra ngati lowu humaka emutini wolowo wu huwelela: “A a vambiwe! . . . A a vambiwe!” (Matewu 21:6-9; 27:22, 23) Xiyimo xi cince hi ku hatlisa.

4. Tanihi valandzeri va Yesu, i ku khomiwa njhani loku hi faneleke ku ku rindzela?

⁴ Kutani ke, a hi fanelanga hi hlamala loko ematikweni man’wana namuntlha xiyimo xi cinca kutani ku xanisiwa ku humelela ku nga rindzeriwanga. Tsundzuka, loko kunene hi ri valandzeri va Yesu, hi fanele hi rindzela ku xanisiwa. (Yohane 15:20) Leswi swi komba risima ra marito ya Yesu, “Hitekani ke.”—Matewu 24:42.

5. I swivutiso swihi leswi sweswi swi lavaka leswaku hi swi xiyisisa?

⁵ Hi nga swi endlisa ku yini leswi? Ku na ndlela yin’wana hi nga tilunghiselelaka ha yona, loko swo tshika swi bihile xana?

Lunghisa Miehleketo na Mbilu ya wena

6, 7. (a) Hikwalaho ka yini swi nonoha ku endla malunghiselelo ya xiviri ya ku xanisiwa? (b) I lunghiselelo rihi ra nkoka ri nga endliwaka hi ku xanisiwa?

⁶ Swa nonoha ku endla malunghiselelo ya xiviri ya ku xanisiwa hikuva a wu swi tivi leswaku xiyimo xi ta va njhani. Ku fikela loko ku endleka hi xiviri, a wu swi tivi leswaku ku yirisiwa ku ta tika kumbe ku olova, kumbe leswaku i yini leswi nga ta siveriwa. Kumbe i ntirho wa ku chumayela hi yindlu na yindlu ntsena wu nga siveriwaka, kumbexana tinhlengeletano ta vukhongeri. Minkarhi yin’wana nhlengeletano leyi nga enawini ya Timbhoni ta Yehova ya hangalasiwa, kumbe vanhu van’wana hi ku hatlisa va khotsiwa. Hi nga tsundzuka tindhawu to tala laha tibuku ti nga fihliwaka kona loko swi laveka. Kambe ku tlula sweswo, ku na swintsongo leswi hi nga swi endlaka hi ndlela ya lunghiselelo ra xiviri.

⁷ Hambi swi ri tano, u nga lunghisa miehleketo na mbilu ya wena, kutani leswi i swa nkoka. Veka miehleketo ya wena eka xivangelo xa ku pfumeleriwa ka ku xanisiwa ni leswaku hikwalaho ka yini u nga yisiwaka emahlweni ka vafumi. “Leswaku mi humesa vumbhoni,” ku vula Yesu. (Matewu 10:16-19) Loko mbilu ya wena hakunene yi tilunghiselele ku tshama yi tshembekile, hambi ku humelela yini na yini, Yehova a nga hlavutela ndlela ya vutlhari yo yi teka loko xilaveko xi humelela. Kutani, hi nga tilulamisela ku xanisiwa emoyeni hi ndlela yihi?

U Tirha Njhani Na Vanhu

8. Hikwalaho ka yini Pawulo a swi kotile ku vula leswaku u ‘tsakela maxangu’?

⁸ Muapostola Pawulo u te: “Ndzi amukela hi ku tsaka ku tsana, ni maxangu, ni ku karhateka, ni ku xanisiwa, ni mahlomulo, hikwalaho ka Kriste.” (2 Vakorinto 12:10) Xana Pawulo u tsakerile maxangu? Kavula a swi tano. Kambe hakanyingi ku xanisiwa ku katsa maxangu, kutani loko leswi swi ri swona leswi a swi ta dzunisa vito ra Xikwembu, manuku Pawulo a a tsakela ku swi tiyisela.

9. Hi nga tilunghiselela ku tiyisela “maxangu . . . ha Kriste” sweswi hi ndlela yihi?

⁹ Na hina, hi nga tiyiseka leswaku nkarhi wun’wana hi ta fanela ku tiyisela “maxangu . . . hikwalaho ka Kriste.” Hi nga ha xanisiwa emiehleketweni, kumbe enyameni. Hi ta tiyisela xana? Kutani, hi tilanguta njhani sweswi? Hi titeka hi ri va ntikelo swinene ivi hi phuphuruxiwa hi maxangu ya xiviri kumbe yo ehleketela? Loko swi ri tano, kutani hikwalaho ka yini hi nga kurisi ku “leha mbilu, . . . musa, ku tikhoma”? (Vagalatiya 5:22, 23) Lebyi ku ta va vuleteri lebyinene bya vutomi bya Vukriste sweswi, naswona byi nga ponisa vutomi bya wena eminkarhini ya ku xanisiwa.

U Wu Languta Njhani Ntirho Wa Nsimu?

10. I maendlelo wahi lamanene ya Matsalwa hi ma landzaka loko ntirho wa hina wa ku chumyela wu siveriwile?

¹⁰ Hakanyingi, xilo xo sungula ku siveriwa loko ku yirisiwa i ku chumayeriwa ka le rivaleni ka “mahungu lamanene.” Kambe ku chumayela ni ku endla vadyondzisiwa i swa nkoka emasikwini lawa ya makumu. I ndlela yihi yin’wana leyi vanhu va nga dyondzaka hi ta Mfumo wa Xikwembu ha yona? Kutani, endlelo lerinene eka ku siveriwa ko tano hi leri kombisiweke hi vaapostola, loko varhangeri va vukhongeri bya Vayuda va ringete ku sivela ntirho wa vona wo chumayela. (Mintirho 5:28, 29) Ehansi ka ku siveriwa, tindlela tin’wana ta ku chumayela ti nga ha pfariwa. Kambe, hi mukhuva wo karhi, ntirho lowu wu fanela ku endliwa. Xana u nga va na matimba yo ya emahlweni u chumayela ehansi ka ntshikilelo wa ku xanisiwa?

11, 12. U nga swi tivisa ku yini loko u ta va ni matimba lama lavekaka yo hambeta u chumayela loko u xanisiwa?

¹¹ Loko swi ri tano, u wu languta njhani ntirho wa ku chumayela sweswi? U pfumelela swiphiqo leswintsongo swi nghenelela ni ku vangela ku tsematsema ntirho wa nsimu? Loko swi ri tano, u nga endla yini ehansi ka ku siveriwa? Wa va chava vanhu sweswi? Wa swi lava ku chumayela hi yindlu na yindlu exitarateni xa ka n’wina? Wa chava ku tirha wexe? Ematikweni man’wana, vanhu vambirhi lava tirhaka kun’we hakanyingi va tikokela nyingiso wo tala. Kutani ke, laha swi nga kahle ku endla tano, hikwalaho ka yini u nga tirhi wexe sweswi minkarhi yo tala? Byi ta va vuleteri lebyinene.

¹² Xana wa hlanganyela entirhweni wa le xitarateni wa timagazini? U na xivindzi ni matimba yo endla minkarhi ya ku veka vumbhoni hi xitshuketa? Xana wa tirha etindhawini ta mabindzu? Xana wa chava ku tshinelela van’wankumi kumbe vanhu lava nga ni nkucetelo? Loko u hlanganyela ntsena eka muxaka wun’wana wa ku chumayela, u ta endla yini loko, ehansi ka ku siveriwa, muxaka wolowo wa ku chumayela wu nga ha koteki?

13. U nga endla yini sweswi hi vutirheli bya wena leswaku u va la tilulamiseleke ku antswa ku chumayela eminkarhini ya ku xanisiwa?

¹³ Xana wa swi vona leswaku u na ku tsana eka timhaka tin’wana? Sweswi i nkarhi wo Iwisana na kona. Dyondza ku tshemba Yehova kutani u va loyi a fanelekaka swinene tanihi mutirheli. Manuku u ta va u hlome ku antswa leswaku u chumayela sweswi ni ku va u tilulamisele ku tiyisela eminkarhini ya ku xanisiwa.

Xana Wa Tshembeka?

14, 15. (a) I muxaka wihi wa Vakriste va lembe xidzana ro sungula wu nga vaka wu vile nkucetelo lowunene loko ku humelela ku xanisiwa? (b) Nandza wa namuntlha wa Yehova a nga fana njhani ni Vakriste lavaya vo tiya vo sungula?

¹⁴ Eka Matsalwa hinkwawo ya Xigriki ya Vukriste, ku boxiwile vanhu lava a va ri swihondzo swa matimba ebandlheni. Hi xikombiso, Onesiforo u pfune Pawulo swinene loko a ri ekhotsweni eRhoma. (2 Timotiya 1:16) Febe u bumabumeriwile hikwalaho ka ntirho wakwe lowo tika ebandlheni ra le Kenikreya. (Varhoma 16:1, 2) Vavanuna ni vavasati vo tano va fanele va vile vatiyisi lavanene loko ku humelele ku xanisiwa. Va ‘hitekile, va tiya swinene eku pfumeleni, va va vavanuna, va tinyika matimba.’—1 Vakorinto 16:13.

¹⁵ Vakriste hinkwavo, ngopfu-ngopfu vakulu, va fanele va ringeta ku endla nhluvuko kutani va fana ni Vakriste vo sungula lava tiyeke. (1 Timotiya 4:15) Dyondza ku hlayisa timhaka ta xihundla ti ri exihundleni ni ku dyondza ku boha makungu lama seketeriweke emilawini ya Matsalwa. Tidyondzise ku vona timfanelo ta Vukriste eka van’wana leswaku u ta tiva loyi a nga ta tshembeka ehansi ka ntshikilelo. Tirha, hi matimba ya Yehova, u va phuphu ebandlheni ra ka n’wina, munhu loyi a pfunaka van’wana ku tlula munhu la lavaka mpfuno minkarhi hinkwayo.—Vagalatiya 6:5.

U Hanyisana Njhani Na Vanhu?

16, 17. Ku tirhisa Vakolosa 3:12, 13 sweswi ku nga ku pfuna njhani ku lunghiselela ku xanisiwa?

¹⁶ Muapostola Pawulo u hi khutazile: “Ambalani moya wa tintswalo, ni vunene, ni ku titsongahata, ni ku rhula, ni ku leha mbilu. Amukelanani, kutani loko un’wana a vilela hi un’wana, a va rivalelani.” (Vakolosa 3:12, 13) Leswi swa olova eka wena ke? Kumbe ku nga hetiseki ka vanhu van’wana ka ku vavisa swi nga fanelanga? U hatlisa ku tlhaveka kumbe u hela matimba xana? Loko swi ri tano, laha ku na ndhawu yin’wana laha malunghiselelo ma nga endliwaka.

¹⁷ Ematikweni lawa tinhlengeletano ti siveriweke, nkarhi na nkarhi Vakriste va hlangana kun’we hi tinhlayo tintsongo. Eka swiyimo swo tano, swihoxo swa vona swi vonaka swinene. Kutani hikwalaho ka yini u nga titoloveti sweswi ku tiyisela ku tsana ka van’wana, tanihi leswi handle ko kanakana va tiyiselaka ka wena? U nga xopaxopi swihoxo swa van’wana kutani u va heta matimba. Nakambe, titolovete wena ni vana va wena ku xixima nhundzu ya vanhu van’wana loko mi hlanganyela Tidyondzo ta Buku ya Bandlha. Ehansi ka ku xanisiwa, xichavo xo tano, xi ta kurisa vuxaka lebyinene.

Xana U Rhandza Ku Tiva?

18. Hikwalaho ka yini minkarhi yin’wana swi pfuna ku tiva ntsena leswi u fanelaka ku swi tiva?

¹⁸ Hi ntumbuluko, van’wana va hina va rhandza ngopfu ku tiva. Hi nga ka hi nga swi tiyeli ku pfumala “ku tiva.” Xana u tano? Loko swi ri tano, xiya leswi: Minkarhi yin’wana, loko ntirho wa Timbhoni ta Yehova wu siveriwile, tihosi ti ringeta ku kuma malunghiselelo ya nhlengeletano ni mavito ya valanguteri lava nga ni vutihlamuleri. Loko a a wu ri loyi a a tiva swilo leswi, a wu ta xanisiwa emirini ku ri ku ringeta ku ku sindzisa ku va boxa. Kutani loko u va boxile, ntirho wa vamakwenu a wu ta khumbeka hakunene. Kutani ke, minkarhi yin’wana swa pfuna ku tivanyana sweswi u tivaka swona ntsena.

19. I yini lexi sweswi xi nga ku pfunaka ku papalata ku hlamusela timhaka ta xihundla loko u xanisiwa?

¹⁹ U nga tidyondzisa sweswo sweswi xana? Ina. Hi xikombiso, loko ku ri na mhaka leyi tameriweke hi komiti yo avanyisa ebandlheni, vanhu va fanela ku aneriseka hi leswi vakulu va vonaka swi fanele ku swi vula hayi ku konanisa leswaku va kuma vuxokoxoko byihi kumbe byihi. Vavasati na vana va vakulu a va fanelanga va ringeta ku va gwedla leswaku va boxa timhaka ta xihundla. Hi tindlela hinkwato, hi fanele hi dyondza ku ka hi nga ‘ngheneleli etimhakeni leti nga hi khumbiki.’—2 Vatesalonika 3:11.

Xana U Xichudeni Xa Bibele?

20, 21. Xana dyondzo leyi endliwaka hi ku chivirika ya Bibele sweswi yi ta ku pfuna njhani loko ntirho wu siveriwile?

²⁰ Bibele i xisekelo xa matimba ya moya ya Mukriste. Yi n’wi nyika tinhlamulo ta swivutiso swakwe swa nkoka ni ku n’wi nyika vutlhari bya Xikwembu. (2 Timotiya 3:14-16) Vakriste hinkwavo hi nawu va swi pfumela leswi, kambe Bibele hakunene yi na xiphemu xihi evuton’wini bya wena? Xana u yi dyondza hi masiku kutani u yi pfumelela ku ku letela eka hinkwaswo leswi u swi endlaka?—Psalma 119:105.

²¹ Hakanyingi, ku kumeka ka tibuku ta hina ta Bibele ku hunguteka swinene loko ntirho wu siveriwile. Minkarhi yin’wana, hambi Tibibele swa nonoha ku ti kuma. Eka swiyimo swo tano, moya lowo kwetsima wu ta ku tsundzuxa swilo leswi u swi dyondzeke eminkarhi leyi hundzeke. Kambe a wu nga ku tsundzuxi swilo leswi u nga swi dyondzangiki! Hikokwalaho, loko u dyondza swinene sweswi, swo tala swi ta hlayisiwa emiehleketweni ni le mbilwini ya wena leswaku moya lowo kwetsima wu ta swi humesa eminkarhini leyi swi lavekaka.—Marka 13:11.

Wa Khongela Xana?

22. Ku ‘chivirikela xikhongelo’ ku nga tikomba ku pfuna njhani eku tilunghiseleleni ka ku xanisiwa?

²² Lexi i xivutiso xa nkoka loko hi ehleketa hi ku xanisiwa. Bibele ya laya: “Mi chivirika eku khongeleni.” (Varhoma 12:12) Xikhongelo i ku vulavula hi laha ku kongomeke na Yehova Xikwembu. Ha xona hi nga kombela matimba yo tiyisela ku nonoha ni ku boha makungu lamanene, na ku aka vuxaka lebyikulu na Yehova Xikwembu. Hambi loko vakaneti va teka tibuku ta hina, Tibibele terhu, ni ku tsema ku hlanganyela ka hina ni Vakriste van’wana, va nga ka va nga ri teki lunghelo ra hina ra xikhongelo. Ekhotsweni lero tiya swinene, Mukriste wa swi kota ku vulavula ni Xikwembu. Ku tirhisa lunghelo ra xikhongelo, manuku, i ndlela leyinene yo lunghiselela xihi na xihi lexi nga endlekaka enkarhini lowu taka.

Xana Wa Wu Tshemba Mfumo?

23. Hikwalaho ka yini u kondletela ku tshemba vakulu lava hlawuriweke ni “nandza lowo tshembeka, Iowa vutlhari”?

²³ Ku aka ntshembo lowu na swona i swa nkoka. Vakulu ebandlheni i xiphemu xa lunghiselelo ra Xikwembu ro hi sirheleta. Vakulu va fanela ku endla hi ndlela leyi faneriwaka hi ku tshembiwa, nakona bandlha hinkwaro ri fanele ku dyondza ku va tshemba. (Esaya 32:1, 2; Vaheveru 13:7, 17) Futhi ku tlula kwalaho, hi fanele hi dyondza ku tshemba “nandza lowo tshembeka, Iowa vutlhari.”—Matewu 24:45-47.

24. Ku nga endliwa yini ku lunghiselela ku lwa ni nhlaselo wa vunwa wa valala va vanhu va Yehova?

²⁴ Valala va nga ha hembela nhlengeletano ya Xikwembu. (1 Timotiya 4:1, 2) Etikweni rin’wana, Vakriste van’wana va hambukisiwile va pfumela leswaku Huvo leyi fumaka ya Timbhoni ta Yehova yi tshike Vukriste, kasi vona a va ha tshame va tshembekile eka byona. Ndlela leyinene yo lunghiselela ku lwisana ni nhlaselo wo fana ni lowu i ku vumba rirhandzu ra matimba eka vamakerhu ni ku dyondza ku tshemba lunghiselelo ra Yehova ra swilo.—1 Yohane 3:11.

U Nga Hlula

25. I yini lexi nga hi pfunaka leswaku hi hlula loko hi xanisiwa?

²⁵ Mukhalabye muapostola Yohane, endzhaku ka ku hlupheka hi ku xanisiwa, u te: “Xin’wana ni xin’wana lexi tswariweke hi Xikwembu, xi hlula misava, kutani ku hlula loku hlulaka misava i ku pfumela ka hina.” (1 Yohane 5:4) U nge hluli hi matimba ya wena. Sathana ni misava yakwe va na matimba ku tlula wena. Kambe a va tluli Yehova Xikwembu. Kutani, loko hi yingisa swileriso swa Xikwembu, hi khongelela moya wa yena leswaku wu hi pfuna ni ku tiseketela hi yena hi laha ku heleleke ehenhleni ka matimba yo tiyisela, kutani hi nga hlula.—Habakuk 3:13, 18; Nhlavutelo 15:2; 1 Vakorinto 15:57.

26. Hambi loko sweswi u nga xanisiwi, u fanele ku endla yini?

²⁶ Ematikweni hinkwawo, ku na Vakriste van’wana lava xanisiwaka, hi vanghana va vukati lava kanetaka kumbe hi ndlela yin’wana. Ematikweni man’wana, hinkwawo malandza ya Xikwembu ya xaniseka hikwalaho ka swiendlo leswi nga enawini swa hulumendhe ya kwalaho. Kambe hambi loko, sweswi, u nga kanetiwi kumbe ku xanisiwa hi ku tika loku nga toloveriwangiki, tsundzuka leswaku swi nga humelela nkarhi wihi na wihi. Yesu u vule leswaku ku xanisiwa ka Vakriste a ku ta va xiphemu xa xikombiso xa nkarhi wa makumu; hikwalaho, hi fanele minkarhi hinkwayo hi ku rindzela. (Matewu 24:9) Kutani hikwalaho ka yini hi nga ku lunghiseleli sweswi? Tiyimiseli leswaku, hambi ku nga ta yini na yini, mahanyelo ya wena minkarhi hinkwayo ma ta dzunisa Tata wa wena la nge matilweni, Yehova Xikwembu.—Swivuriso 27:11.

Hi Tihi Tinhlamulo Ta Wena?

◻ I malunghiselelo wahi ya ku xanisiwa u nga ma endlaka sweswi?

◻ U nga endla yini sweswi ku kurisa matimba lama lavekaka leswaku u hambeta u chumayela loko u xanisiwa?

◻ Ku tirhisa Vakolosa 3:12, 13 sweswi ku nga pfuna njhani loko ku xanisiwa ku humelela?

◻ Hikwalaho ka yini u kondletela ku tshemba ka wena ka vakulu lava hlawuriweke ni “nandza lowo tshembeka, lowa vutlhari”?

◻ U nga va muhluri loko u xanisiwa hi ndlela yihi?