Vutomi Ni Vutirheli Bya Yesu

Esinagogeni Ra Ka Vona

LOKO Yesu a tlhelela ekaya, hi nga anakanya nyanyuko lowu veke kona eNazareta. Ka ha sele nkarhinyana wo tlula lembe a nga si ya khuvuriwa hi Yohane, Yesu a a tiviwa tanihi muvatli. Kambe sweswi u tiveka emisaveni hinkwayo tanihi hi muendli wa masingita. Vaaki va ka vona va hisekela ku n’wi vona a karhi a endla swilo leswi swo hlamarisa exikarhi ka vona.

Ku langutela ka vona ka kula loko Yesu, ku ya hi ntolovelo wa yena, a ya esinagogeni ra ka vona. Hi nkarhi wa mintirho, a yima leswaku a hlaya, a nyikiwa buku leyi songiweke ya muprofeta Esaya. U kume ndzhawu leyi a yi vulavula hi Loyi a totiweke hi moya wa Yehova, ndzhawu leyi eBibeleni namuntlha yi nga ndzima 61.

Endzhaku ka ku hlaya hi laha loyi a a ta twarisa ntshunxeko ha kona eka vabohiwa, ku hanyisiwa ka mabofu, na hi ta lembe lerinene ra Yehova, Yesu a tlherisela buku leyi songiweke eka nandza kutani a tshama ehansi. Mahlo hinkwawo ya n’wi langutile. Kutani a vulavula na vona, hi nkarhi wo leha a hlamusela a ku: “Namuntlha tsalwa ri hetisekile etindleveni ta n’wina.”

Vanhu va hlamarisiwa hi ‘marito yakwe lamanene’ kutani va vutisana va ku; “Xana munhu loyi a hi yena n’wana Yosefa xana?” Kambe hi ku tiva leswaku va lava ku n’wi vona a endla masingita Yesu u ya emahlweni a ku: “Ndza tshemba leswaku mi ta ndzi byela xivuriso lexi nge: ‘N’anga, tihanyise hi wexe; naswona mi ta ku: Leswi hi swi tweke swi endliwa hi wena eKapernawume, swi endle ni kwala etikweni ra wena.’” Hi ku twala, khale ka vaakelani va Yesu va vone swi fanela leswaku ku hanyisa ku sungula ekaya, leswaku ku pfuneka vanhu va ka vona ku sungula. Va titwe va honisiwile hi Yesu.

Hi ku vona miehleketo ya vona, Yesu u hlamusele matimu lamanene. A ku ri ni tinoni to tala elsrayele enkarhini wa Eliya, a hlamusela, kambe Eliya a nga rhumeriwanga ni le ka yin’we ya tona. Ku ri na sweswo, u ye eka noni leyi nga riki Muisrayele eSidoni, laha a endleke singita ro hanyisa. Nakona emasikwini ya Eliša, a ku ri na vanhu vo tala va nhlokonho, kambe Eliša u basise Namani wa le Siriya ntsena.

Hi ku karihisiwa hi swikombiso leswi swo ka swi nga tsakisi swa matimu leswi paluxeke vuciva bya vona ni ku pfumala ripfumelo, lava nge sinagogeni va yima kutani va humesela Yesu ehandle ka muti. Kwalaho, va n’wi yisa eribuweni ra ntshava leyi Nazareta wu akiweke kona, va ringeta ku n’wi cukumetela ehandle ka muti. Kambe Yesu a va chupukela ivi a tifambela hi ku hlayiseka. Luka 4:16-30; 1 Tihosi 17:8-16; 2 Tihosi 5:8-14.

◆ Hikwalaho ka yini ku ri na ku nyanyuka eNazareta?

◆ Vanhu va ehleketa yini hi marito ya Yesu, kambe i yini leswi swi va endlaka va kariha?

◆ Vanhu va ringeta ku n’wi endla yini Yesu?