Nkhuvulo Wa Tincece—Lexi Vangelaka Vaprista Van’wana Va Ku E-e!

ALAN na Sonia hi ku olova a va lava leswaku xihlangi xa vona xi khuvuriwa. Hikwalaho swi va tseme nhlana loko muprista wa vona wa Anglican a nga alanga ntsena ku endla mihivani kambe loko a engetele xiphemu lexi xa xitsundzuxo: “Swi endleni hi n’wexe.” Xivangelo hi xihi? Alan na Sonia a va ri vangheni va kereke va nkarhi na nkarhi.—The Christian Century, June 3-10, 1981.

Mimpatswa yo talanyana sweswinyana yi tokote ku ariwa ko tano—xikombiso lexi nga erivaleni hi leswaku tikereke tin’wana ti cinca langutelo ra tona ra nkhuvulo wa tincece. Xiya Kereke ya Rhoma Khatoliki. Endzhaku ka huvo ya Vatican II, kereke yi pfuxetile mihivani ya yona ya nkhuvulo wa tincece. Ina, kereke na sweswi ya ha khuvula swihlangi, kambe sweswi vatswari va fanele va sungula hi ku tiyisa leswaku va ta kurisa n’wana wa vona tanihi Mukhatoliki. Vatican yi te: “Loko switshembiso leswi swi nga ri swa ntiyiso hakunene ku nga ha va ni swivangelo swo hlwerisa gandzelo leri; naswona loko hakunene swi nga ri kona gandzelo ri fanele ku ariwa. (Xi-italiki i xerhu.) L’Osservatore Romano, “Xileriso eka Nkhuvulo wa Tincece,” December 1, 1980.

Lexi i xirilo xa khale ku sukela emasikwini lawa, ku ya hi muprista wa Khatoliki Joseph M. Champlin, “varhumiwa lava hisekaka (a va ta) khuvula swihlangi swa vahedeni leswi siyiweke etlhelo ka patu,” kutani vaprista va “tsundzuxe vatswari leswaku va nga hlwerisi nkhuvulo wa ricece ku tlula n’hweti ri ri ehansi ka switlhavi swa xidyoho lexi dlayaka.”

I yini lexi vangaka malangutelo yo tano lama cinceke? Kahle-kahle, vafundhisi sweswi va swi vona leswaku nkhuvulo a wu endli Mukriste. Ku ehla ka lava va vaka kona ekerekeni na ku pfumaleka loku tolovelekeke ka ku tinyikela ka Makhatoliki lama khuvuriweke ku vile mhaka ya xiviri leyi faneleke ku khathaleriwa. “Hikwalaho ka yini kereke yi fanele ku vanga xiphiqo hi ku khuvula vana lava kahle-kahle va tikombaka va nga endli swa vukulukumba ke?” ku kanete mhaka leyi nga eka U.S. Catholic.

Hambi swi ri tano, goza lerintshwa ri tlhele ri pfula mukhandlu lowukulu exikarhi ka vafundhisi. Tanihi laha mutsari wa Khatoliki Joseph Martos a xiyeke ha kona, vafundhisi vo tala hi ku olova a va pfumeri leswaku nkhuvulo wa tincece i “mihivani ya vudemona leyi khumbaka moya hi ndlela leyi nga xiyekiki.” Eka vona langutelo ro tano i ra khale, ri hume moya.

A swi hlamarisi, kutani, leswi Makhatoliki yo tala ya xiviri ya dzolonganisiweke. Xana kereke minkarhi hinkwayo a yi dyondzisanga leswaku tincece leti nga khuvuriwangiki ti ta ya etiheleni leti hisaka kumbe ku tsendzeleka epagatori? Loko ku ri leswaku leswi i ntiyiso, van’wana va hlamala, hikwalaho ka yini nkhuvulo wu landzuriwa ehansi ka swiyimo swo karhi? Leswi i swivutiso swa nkoka. Tanihi loko muprista wa Khatoliki Vincent Wilkin a swi xiyile, nhlayo ya lava feke va nga khuvuriwanga i “vunyingi naswona i nhlayo leyi nga hlayekiki hakunene, leyi swi olovaka ku ehleketa leswaku yi vumba xiphemu lexikulu xa rixaka ra vanhu” (Xi-italiki i xerhu.)

Hikwalaho ke, a hi languteninyana nkhuvulo wa tincece—hi ku landza matimu na Bibele.