Swivutiso Swa Vahlayi

◼ Hikwalaho ka yini Timbhoni ta Yehova ti va hlongolela vugwinehi vanhu van’wana lava tamaka va vula leswaku va pfumela eka Xikwembu, Bibele na Yesu Kriste?

Lava vulavulaka hi mukhuva wo tano va vula leswaku tinhlengeletano tinyingi ta vukhongeri leti vulaka leswaku i ta Vakriste ti pfumela malangutelo lama nga pfumelelaniki. Hambi ku ri vafundhisi van’wana a va pfumelelani ni tidyondzo ta xisekelo ta kereke ya vona, hambi swi ri tano va tshama va ri lava amukelekaka. Eka mintlawa leyi nga vaka hinkwayo ya Vujagani ku na va-modesisi ni vafandamentalisi lava va kanetanaka swinene hi ta ku huhuteriwa ka MatsaIwa.

Hambi swi ri tano, swikombiso swo tano a swi hi nyiki xisekelo xo endla tano. Hikwalaho ka yini swi nga ri tano? Vunyingi bya mintlawa yo tano yi pfumelela malangutelo lama hambukeke hi ku anama exikarhi ka vafundhisi ni vanhu hikuva va vona onge a va tiyiseki hi ntiyiso wa Bibele. Va fana na Vatsari ni Vafarisi va siku ra Yesu lava a va tsandzeka ku vulavula tanihi vanhu lava va nga ni vuhosi, leswi a ku ri ndlela leyi Yesu a dyondziseke ha yona. (Matewu 7:29) Ku tlula kwalaho, leswi vakhongeri va tshembaka mpfangano wa vukhongeri, va boheka ku ka va nga teki ripfumelo leri hambukeke tanihi mhaka leyikulu.

Kambe ku teka langutelo ro tano ra timhaka a swi seketeriwi hi Matsalwa. Yesu a nga endlanga xinakulobye ni mintlawa yo karhi ya Xiyuda. Vayuda va mintlawa yoleyo va vule leswaku va wu tshemba ntumbuluko wa Xikwembu ni Matsalwa ya Xiheveru, ngopfu-ngopfu Nawu wa Muxe. Hambi swi ri tano, Yesu u byele vadyondzisiwa va yena a ku “chavani . . . tidyondzo ta Vafarisi ni ta Vasaduki.’’ (Matewu 16:11, 12; 23:15) Nakambe xiya hi laha muapostola Pawulo hi matimba a vuleke timhaka ha kona: “Kambe hambi loko hina kumbe ntsumi yo huma etilweni, hi nga tshuka hi mi dyondzisa Evangeli yin’wana ehandle ka leyi hi tshamaka hi mi dyondzisa yona, mudyondzisi wo tano a a rhukaniwe!” Pawulo u tlhele a vula mhaka yoleyo hi ku kandziyisa.—Vagalatiya 1:8, 9.

Ku dyondzisa malangutelo lama nga pfumelelaniki kumbe lama hambukeke a swi fambisani ni Vukriste bya ntiyiso, hi laha Pawulo a swi vekaka erivaleni eka 1 Vakorinto 1:10 a ku: “Ndza mi khongotela vamakwerhu, hi vito ra Hosi ya hina Yesu Kriste, ndzi ri: Twananani hinkwenu eku vulavuleni. Ku nga tshuki ku va ni ku avana exikarhi ka n’wina, kambe mi hlangana mi va van’we eku anakanyeni ne makungwini ya n’wina.” Eka Vaefesa 4:3-6 nakambe u vule leswaku Vakriste va fanele ku ‘endla hi matimba ku hlayisa vun’we lebyi nyikiwaka hi Moya, va hanyisana hi ku rhula. Ku ni miri wun’we, ni Moya wun’we, tani hi leswi ku nga ni ku tshemba kun’we loku Xikwembu xi va vitaneleke kona; ku ni Hosi yin’we, ni ku pfumela kun’we, ni nkhuvulo wun’we; ku ni Xikwembu xin’we, Tata wa vanhu hinkwavo.’

Xana vun’we lebyi a byi ta koteka ni ku hlayisiwa hi un’wana ni un’wana loyi a kambisisaka Matsalwa a ri swakwe, a tiendlela xiheri ni ku dyondzisa sweswo ke? Nikantsongo! Ha Yesu Kriste, Yehova Xikwembu hikwalaho ka xikongomelo lexi, “van’wana ku va vaapostola, . . . van’wana ku va vavuri va Evangeli, van’wana ku va vafundhisi ni vadyondzisi . . . kutani eku heteleleni hi ta hlangana swin’we hinkwerhu evun’weni lebyi tisiwaka hi ku pfumela eka N’wana wa Xikwembu ni ku n’wi tiva, kutani hi hundzuka vanhu lava vupfeke.” Ina, hi ku pfuniwa hi vatirheli vo tano, vun’we bya bandlha—vun’we eku dyondziseni ni le ntirhweni—swi nga koteka futhi swi ta koteka.—Vaefesa 4:11-13.

Kahle-kahle, xisekelo xa vuxaka lebyinene na Timbhoni ta Yehova a byi nge tiseketeli ntsena hi ku pfumela eka Xikwembu, eBibeleni, eka Yesu Kriste ni swin’wana. Phophu wa Rhoma Khatoliki, ni Mufundhisi wa Anglican ya Canterbury, va tivula lava nga ni ku pfumela ko tano, hambi swi ri tano swirho swa tikereke ta vona swi hava vun’we. Hi ku fanana, ku tivula la nga ni ripfumelo ro tano a swi nge endli leswaku munhu a tiviwa tanihi un’wana wa Timbhoni ta Yehova.

Vuxaka lebyinene ni Timbhoni ta Yehova byi lava leswaku u amukela tidyondzo hinkwato ta ntiyiso ta Bibele ku katsa ni ripfumelo ra Matsalwa leri nga ni Timbhoni ta Yehova ntsena. Xana ku pfumela ko tano ku katsa yini?

Leswaku mphikamakaneta leyikulu leyi nga emahlweni ka vanhu i ku faneleka ka Vuhosi bya Yehova, leswi endleke leswaku a pfumelela vuhomboloki nkarhi wo leha. (Ezekiel 25:17) Leswaku Yesu u ve kona a nga si va munhu naswona i ntsongo eka Tata wa yena wa le matilweni. (Yohane 14:28) Leswaku ku ni “nandza lowo tshembeka, lowa vutlhari” emisaveni namuntlha ‘loyi a byarhisiweke timhaka hinkwato ta Yesu ta laha misaveni,’ nandza loyi a tirhisanaka ni Huvo leyi Fumaka ya Timbhoni ta Yehova. (Matewu 24:45-47) Leswaku 1914 ri funghe ku hela ka Minkarhi ya Vamatiko ni ku sungula ka Mfumo wa Xikwembu ematilweni, ku katsa ni nkarhi lowu vhumbiweke wa ku va kona ka Kriste. (Luka 21:7-24; Nhlavutelo 11:15-12:10) Leswaku i Vakriste va 144 000 ntsena lava nga ta amukela hakelo ya le matilweni. (Nhlavutelo 14:1, 3) Leswaku Armagedoni, leswi vulaka nyimpi ya siku lerikulu ra Xikwembu xa Matimba hinkwawo, yi kusuhi. (Nhlavutelo 16:14, 16; 19:11-21) Leswaku yi ta landzeriwa hi Mfumo wa Kriste wa Gidi ra Malembe, lowu nga ta pfuxeta paradeyisi ya misava hinkwayo. Leswaku lava nga ta sungula ku tiphina hi yona i “ntshungu lowukulu” wa sweswi wa “tinyimpfu tin’wana” ta Yesu.—Yohane 10:16; Nhlavutelo 7:9-17; 21:3, 4.

Xana hi ni xisekelo xa Matsalwa xo teka goza ro tano ro tika? Hakunene hi na xona! Pawulo u tsale hi van’wana va siku ra yena a ku: “Kutani ku vulavula ka vona, ku ta fana ni xilondza lexi pfundzelaka xi borisa miri. Exikarhi ka vona ku na va Himenayo na Fileto, lava humeke entiyisweni, hi ku vula leswaku swa ku pfuka eku feni swi hundzile khale, kutani va khunguvanyisa van’wana eku pfumeleni.” (2 Timotiya 2:17, 18; vona kambe Matewu 18:6) A ku na nchumu lexi kombaka leswaku vavanuna lava a va nga pfumeli eka Xikwembu, eBibeleni, eka gandzelo ra Yesu. Kambe, eka yinhla leyi ya xisekelo, leswi a va swi dyondzisa hi nkarhi wa ku pfuka eku feni, Pawulo u va vule vagwinehi, lava Vakriste lava tshembekaka a va nga fanelanga ku endla xinakulobye na vona.

Hi laha ku fanaka, muapostola Yohane u va vule valala va Kriste lava nga pfumeliki leswaku Yesu u tile emisaveni a va munhu. Va nga ha va va pfumerile eka Xikwembu, eMatsalweni ya Xiheveru, eka Yesu tanihi N’wana wa Xikwembu ni swin’wana. Kambe eka yinhla leyi, leswaku hakunene Yesu u tile emisaveni a va munhu, a va pfumelelani na yona ivi xisweswo va vitaniwa “valala va Kriste.” Yohane u ya emahlweni a hlamusela hi ta lava va nga ni malangutelo lama Iwisanaka: “Loko ku ta munhu eka n’wina kambe a nga tisi dyondzo leyi, mi nga n’wi amukeli endlwini ya n’wina kumbe ku n’wi xeweta; hikuva loyi a n’wi xewetaka u twanana ni mintirho ya yena leyo biha.”—2 Yohane 7, 10, 11.

Ku landzelela swikombiso swo tano swa Matsalwa, loko Mukriste (loyi a vulaka leswaku wa pfumela eka Xikwembu, Bibele na Yesu) a dyondzisa tidyondzo ta muvunwa handle ko hundzuka, swi nga ha fanela leswaku a hlongoriwa ebandlheni. (Vona Tito 3:10, 11.) Kavula, loko munhu o va ni ku kanakana kumbe a nga ri na vutivi hi yinhla yo karhi, malandza lama fanelekaka ma ta n’wi pfuna hi rirhandzu. Leswi swi fambisana ni ndzayo leyi nge: “Tsetselelani lava kanakanaka. Ponisani van’wana hi ku va vutla endzilweni.” (Yuda 22, 23) Hikwalaho ke, bandlha ra Vukriste bya ntiyiso ri nga ka ri nga voniwi nandzu hikwalaho ka ku nonon’hwisa tidyondzo ta rona kambe ri xixima ni ku tirhela vun’we lebyi khutaziweke eRitweni ra Xikwembu.