Xiviko Xa Vahuweleri Va Mfumo
‘Loyi A Kumaka Vutlhari U Kuma Vutomi’
“NTIYISO wu koka ‘tinxaka hinkwato ta vanhu,’ lava humaka emintlaweni yo hambana-hambana leyi vumbaka Tiko ra Israyele ra manguva lawa,” ku tsala rhavi ra hofisi ya Sosayiti ya Watch Tower etikweni rolero. Vanhu lava va timbilu letinene lava lavaka ntiyiso va tiyisekisiwa: “Hikuv̌a l’a nḍi [vutlhari] kumaka u kumile v̌utomi, u kume tintŝalo ta Yehova.” (1 Timotiya 2:4; Swivuriso 8:35) Ntokoto wa wansati wa le Israyele wu kombisa leswi.
◻ Un’wana wa Timbhoni ta Yehova u endzele muendli wa xikhokhelo xa Xihondzo xo Rindza kutani a lunghiselela ku fambisa dyondzo ya Bibele na yena. Wansati loyi a a tsakile ku va ni dyondzo ya kona. Muakelani wakwe u twile ha yona kutani a hlanganyela. Muakelani “hi ku hatllsa u vone leswi tanihi nchumu lowu a a ri karhi a wu lavisisa hi malembe ma nga ri mangani lama hundzeke,” ku vule xiviko. Kutani vona ku hundzuka loku a ku endleke hi ku hatlisa evuton’wini byakwe! Yena ni nuna wakwe a va ri eka mpimo wa masiku ma nga ri mangani ntsena ya ku dlaya vukati kambe u ku herisile kutani a endla ku rhula. A a ri exivindzini xa dyondzo ya tinyeleti naswona a yi hlanganisa ni vugandzeri kambe a cukumeta tibuku hinkwato to durha ni hinkwaswo leswi fambisanaka ni vudemona. U sungule ku va kona eka minhlangano ya Timbhoni ta Yehova ni ku vulavula ni maxaka ni vanghana hi ripfumelo rakwe lerintshwa leri a ri kumeke. Mayelana ni vanghana lava n’wi lahlekeleke hikwalaho ka rona, u ri: “Entiyisweni, a va nga ri vanghana va ntiyiso.”
Sweswi wansati loyi u veka vumbhoni eka vaxavi exitolo xa ndyangu hi ku chivirika naswona u hlanganyela minkarhi hinkwayo eku chumayeleni ka mahungu lamanene hi yindlu na yindlu. I ntsako muni wonghasi lowu a nga na wona leswi a kumeke vutlhari ni leswi a dyondzeke hi ta malunghiselelo lama hlamarisaka ya Yehova ya vutomi lebyi nga heriki emafambiselweni yakwe lamantshwa! Muakelani wakwe loyi eku sungulenl a endleke xikhokhelo na yena u hambetile a dyondza ni ku endla nhluvuko.
◻ Lloyd u tshama eGuyana. Ku macha ka yena ko ya entshunxekweni wa vukhongeri a ku lehile. U sungule gondzo rakwe tanihi Mupresbyterian. U tekane ni Muhindu naswona na yena u ve Mupresbyterian. “A ndzi hluriwe hi vukanganyisi lebyi a byi ri ni matimba” ekerekeni yoleyo, endzhaku u tisorile. Kutani u hundzukele elslam, kambe leswi a swi wu anerisanga ndzavisiso wa yena wa ntshunxeko. Endzhaku u ringete Vuhindu. Endzhaku ko dyondza swo tala hi ku tswariwa nakambe ni milawu ya Karma, u sungule ku sola tidyondzo leti. U cincele eka Vungoma, u ake altari ivi a dyondzisa ndyangu wakwe dyondzo yoleyo. U te: “Kambe nchavo ni mintokoto leyi tshukisaka leyi mina ni ndyangu wa mina hi veke na yona swi endle leswaku ndzi fularhela vukhongeri lebyi.” U amukele ndlela ya rifuwo ra vutomi, kambe ndyangu wakwe a wu hahluka. Kutani u te: “Ndzi khongerile eka Xikwembu, Tatana, Allah na Ram naswona ndzi n’wi byele leswaku ndzi vulavula ni Muvumbi wa swilo hinkwaswo. Ndzi n’wi tivisile leswaku ndzi lava ku n’wi tsakisa naswona hayi munhu.”
Eyinhleni leyi Mbhoni ya Yehova “leyi ambaleke kahle, ya ku vulavula ko olova ni mahanyelo ya tintswalo” yi nghenle enyangweni ya Lloyd kutani yi hlamule swivutiso swa yena hi laha ku anerisaka. Mbhoni yi n’wi siyele buku leyi nge, Ntiyiso Lowu Yisaka eVuton’wini Lebyi Nga Heriki ni Bibele. Hi ku hatlisa dyondzo ya Bibele yi sunguriwile na Lloyd ni nsati wakwe, va kurile hi vutivi, va hambana na Babilona Lonkulu—fambiselo ra misava hinkwayo ra vukhongeri bya vunwa. Hi nkarhi wolowo a va ti nyiketerile naswona a khuvuriwile. Lloyd u te: “Rirhandzu, rirhandzu ra ntiyiso ri pfale rivengo ni vukari kutani xa risima ku tlula hinkwaswo, ku twisisa ni xikongomelo swi engeteriwile evuton’wini bya hina.”
Sweswi va tsaka ‘entiyisweni lowu wu va ntshunxeke.’—Yohane 8:32.
◻ Nakambe wansati un’wana eSeychelles u dyondzile hi ta Yehova, leswi vangeke ku katekisa kakwe. A a tshama ni xigangu naswona a a ri na vana vo hlaya na yena. Wansati u tlangele ntiyiso lowu a a wu dyondza eBibeleni kambe u kume swi nonon’hwa ku teka xiyimo xakwe xo fanelekela ntirho wa Yehova. A a tshama endlwini leyinene leyi nga ni mampfekempfeke lawa vanhu va nga ri vangani va ma tsakeleke. Endzhaku ka xikhongelo ni xikhutazo leswi humaka eka mulanguteri wa xifundza, u veke nhlawulo eka wanuna loyi a a tshama na yena—a va fanele ku tsarisa vukati bya vona kumbe va hambana. Wanuna loyi a a nga swi lavi ku teka goza rihi kumbe rihi, kava loko a [wansati] famba. I ntsako muni wonghasi lowu a veke na wona leswi manuku a a faneleka ku chumayela mahungu lamanene ni ku nyikela vutomi byakwe eka Yehova ivi a khuvuriwa! Leswi u swi endlile. Lexi tsakisaka, wanuna loyi a a tshama na yena u hlamarisiwile ngopfu hi ku yimela ka yena milawu ya Bibele a tiyile lerova a sungula ku endla malunghiselelo yo hlanganisa ndyangu hi vukati lebyi nga enawini.
Mupisalema u xiye leswi: “Hikuv̌a nseledyana ya v̌utomi yi na wena [Yehova].” (Psalma 36:9) Vanhu lava na vona va swi xiyile leswi, ivi va lava ntiyiso wa ku tiva Yehova ni swilaveko swa yena leswaku va kuma vutomi. Va yi tlangele swonghasi mhaka leyi ya leswaku ‘loyi a kumaka [vutlhari] u ta kuma vutomi hakunene!’