English: 0911_w86.con

Wa Rhambiwa Eka Mintsombano Ya “Ku Rhula Ka Xikwembu”

MBHONI yin’wana ni yin’wana ya Yehova ya Mukriste yi langutele mintsombano ya muganga hi mahlo-ngati! Ku hava xivutiso ehenhleni ka ku va yi ri mhaka leyikulu eka lembe rin’wana ni rin’wana ra khalendara. Tinkulumo letinene, tidrama ta Bibele, tibuku leti humesiwaka, ku vonana—minkarhi yo tala ku ri na vo tala lava nga kona—swi hlangana swi endla leswaku minhlangano leyi yi va nchumu lowu hakunene wu hlawulekeke.

Hi xikombiso, xiya yin’wana ya Mintsombano ya “Vahlayisi va Vutshembeki” leyi khomiweke n’waxemu. Mimbirhi eSão Paulo na Rio de Janeiro, eBrazil, yi vile ni nhlohlorhi ya lava veke kona va 249 351, ni lava kombiseke ku tinyikela ka vona eka Yehova Xikwembu hi nkhuvulo wa mati va 2 645. Ntsombano wa le Montreal, Canada, lowu khomiweke hi vanhu va 78 804, a wu hlamarisa eka rivala ra wona ra tikharavhani ni ku va wu khomiwe hi tindzimi leti hambanaka ta 11. Lava veke kona eka ntsombano wa Zurich, eSwitzerland, va vike leswaku evuton’wini bya vona hinkwabyo a va nga si tshama va vona swo fana ni ku hiseka ni ntsako wa vona. Vapfhumba lava veke kona eka ntsombano wun’we kumbe yo tala leyi khomiweke ePoland va vule marito lama fanaka.

Xiviko lexi nga helelangiki xa misava hinkwayo xi komba lava veke kona va 5 653 689 eka mintsombano ya “Vahlayisi va Vutshembeki” ya 754, leyi veke ni 75 202 wa Timbhoni letintshwa leti khuvuriweke. Mawaku ndlela yo hlamarisa leyi Yehova a katekiseke minhlangano leyi ya vanhu vakwe ha yona!

Ku hambana ni xiga lexi tolovelekeke, lava veke kona eka mintsombano leyi va vona leswi tlulaka leswi va swi rindzeleke. Hakanyingi hi ku fanana leswi vuriweke a ku ri leswaku leya sweswinyana hi yona yo antswa. Kutani Timbhoni ta Yehova hinkwato hi mahlo-ngati ti ta rindzela Mintsombano ya Muganga ya “Ku Rhula Ka Xikwembu” ya lembe leri, leyi nga ta khomiwa emisaveni hinkwayo—leyi 130 ya yona se yi khomiweke eUnited States.

Mawaku xihloko lexinene xa ntsombano wa hina wa Muganga: “Ku Rhula Ka Xikwembu”! Namuntlha mavandla ya vanhu ma pfilunganiwa hi nkitsikitsi. A hi tinyimpi ta xiviri ntsena leti sweswi ti lwiwaka emisaveni hinkwayo kambe ku na tinxaka tin’wana ta ku lwa: nyimpi ya ikhonomi ni nkitsikitsi exikarhi ka vatekani, ni le xikarhi ka vatswari ni vana. Kambe hi laha ku hambanaka swinene, ku na ku rhula exikarhi ka vanhu lava tinyiketeke va Yehova. Ka vona i ku rhula ka Xikwembu, loku humaka eka Mukwetsimi, Yehova Xikwembu, Xikwembu xa ku rhula lexi nyikaka ku rhula. Va le ku rhuleni na xona hikwalaho ka ripfumelo ni mintirho, kutani va swi kota ku hanyisana hi ku rhula, ebandlheni ni le kaya.—Vafilipiya 4:7; Varhoma 16:20.

Nakambe, a swi xiyiwe leswaku ku rhula loku ka Xikwembu a hi ku pfumaleka ka nkitsikitsi ntsena. Rito ra ku rhula hi Xiheveru i sha·lohmʹ, naswona a ri vuli ku rhula ntsena kambe ku hanya kahle ni ku humelela. Ina, Timbhoni ta Yehova ti tsakela ku humelela kun’we ni ku pfumaleka ka nkitsikitsi hi ku va ti ri eparadeyisini ya moya. Ntsombano lowu wu ta endla leswaku hinkwavo lava nga ta va kona va khathalela ku rhula ni ku tikarhatela ku kurisa ku rhula, hi laha va swi kotaka ha kona.—Varhoma 12:18.

Tanihi le malembeni lama hundzeke, mintsombano leyi yi ta sungula hi Ravumune nindzhenga hi 1:10. Siku rin’wana ni rin’wana ri na xihloko lexi yelanaka ni ku rhula, xa siku ro sungula lexi nge “Xikwembu Xi Ta Katekisa Vanhu Va Xona Hi Ku Rhula,” xi sekeriwe eka Psalma 29:11. Xikhongelo lexi nga ni ntikelo xi ta hlamuseriwa, naswona nongonoko wu ta chaputa hi nkulumo ya hi laha Yehova a hambetaka a endla swilo hinkwaswo swi va leswintshwa.

Hi Ravuntlhanu nkulumo-nkulu, “Ku Rhula Ka Xikwembu Eka Lava Dyondzisiwaka Hi Yehova,” yi ta kandziyisa xihlovo xa ku rhula ka hina. Exikarhi ka timhaka tin’wana ta nongonoko ku ta va ni drama ya Bibele leyi kufumetaka mbilu leyi twananisaka minkarhi ya khale ni siku ra hina.

Ku tlhandlekela eka nkulumo ya nkhuvulo, nongonoko wa Mugqivela nimixo wu ta kandziyisa mindzhwalo ya hina ya Vukriste un’wana eka un’wana ni xilaveko xo tshama hi ri karhi hi ya emahlweni tanihi timbhoni ta Vukriste ta Yehova. Nindzhenga, ku ta va ni xitsundzuxo lexinene xa swirho swa ndyangu ni valanguteri lava yimisiweke.

Drama leyi tiyeke ni ya matimba ya manguva lawa yi ta kombisiwa hi Sonto nimixo. Nindzhenga, dyondzo ya mani na mani ya matimba leyi nge “Ku Rhula Eku Heteleleni!—Loko Xikwembu Xi Vulavula” yi ta va yin’wana ya timhaka letikulu ta ntsombano. Handle ko tipfinyinga hinkwavo lava vaka kona entsombanweni va ta famba va hlomisiwe hi xitalo hi Xikwembu xa ku rhula leswaku va endla ku rhandza ka xona.

Kutani ke, tana hi masiku hinkwawo ya mune u ri ni ku navela lokunene ka moya, u ri la khathalelaka ku pfumala ka wena ka moya hi xitalo. (Matewu 5:3) Lunghisa timhaka ta wena leswaku u fika hi nkarhi u ta kuma risimu ro pfula ni xikhongelo siku na siku. Tana u tilunghiselele ku tsala tinotsi, hikuva ku tsala tinhla-nkulu swi ta ku pfuna ku veka mianakanyo eka leswi xivulavuri xi swi vulaka. Ku tlula kwalaho, miehleketo leyi andlariwaka xisweswo yi ta dzikisisa embilwini ni le mianakanyweni ya wena.

Kambe hi nga tshuki hi honisa ntiyiso wa leswaku vugandzeri lebyi tengeke bya Yehova Xikwembu a hi mhaka yo amukela ntsena. Nakambe i mhaka yo nyika. Hi lava ku tsundzuka nawu wa Bibele lowu nge: “Loyi a byalaka a nga feleli, ú ta tshovela leswo tala.” (2 Vakorinto 9:6) Ku tlula sweswo, leswi Yesu a vuleke leswaku “ku nyika i nkateko lowu tlulaka ku nyikiwa,” a hi kumeni ntsako lowukulu entsombanweni hi ku nyikela leswi hi nga swi kotaka, hi tinyiketela mintirho ya hina yo pfuneta hi ku ntshunxeka. (Mintirho 20:35) Hakunene, swi nga tshuki swi va leswi fanelaka ku endla swikombelo swa ku pfuneta ko tirhandzela.

Nakambe, a hi tekeni lunghiselelo ro hlanganyela eku vekeni ka vumbhoni ensin’wini hi Ravuntlhanu nindzhenga tanihi mhaka leyikulu. Naswona onge hi nga lavisisa minkarhi yo veka vumbhoni hi xitshuketa eka masiku hinkwawo ya mune. Leswi swi hi tsundzuxa hi ta nawu wun’wana wa Bibele lowu nge: La hananaka u ta nona, la cheletaka u ta cheletiwa na yena. (Swivuriso 11:25) Ina, a hi rhambeni hinkwavo lava hi nga swi kotaka ku va rhamba leswaku va ta ti dyondzela hi voxe ndlela leyi Timbhoni ta Yehova hakunene ti tiphinaka ha yona hi ku rhula ka Xikwembu.