Ku Twarisa Mahungu Lamanene eDonegal

“I SWINENE!” “Swi fambe kahle.” Swiga sweswo swi twiwe eka ntlawa wa vanhu va 120 lava sukeke eBritain va ya eDonegal, tiko leri nga en’walungu vupela-dyambu bya Ireland. Doo, a va nga ri vapfhumba lava hlamuselaka leswi va swi voneke. A va ri vavanuna, vavasati ni vana lava tifambeleke hi mali ya vona vini ku ya avelana ntshembo wa vona wa vumundzuku ni vanhu va le Vupela-dyambu bya Donegal.

Leswi ku nga ni 19 wa Timbhoni ta Yehova ntsena exikarhi ka vaaki-tiko va 120 000 va Donegal, vanhu vo tala endhawini leyi a va si endzeriwa hi Timbhoni malembe yo tala. Kutani ke, ntlawa lowu wukulu wa vapfhumba hi ku tirhandzela wu teke ntirho wo huwelela mahungu lamanene ya Mfumo eribuweni ro xonga ra Iwandle ra Atlantic ya le Donegal.

Timbhoni ta kwalaho ti endle swo tala ku lunghiselela ku fika ka ntlawa lowu. Va nga ri vangani va fambe madzana ya timayele va ri karhi va fungha mepe wa ndhawu ya kona hinkwayo, va pfuxeta mimepe yo kambisisa ha yona ni ku nyika gondzo rin’wana ni rin’wana nomboro ya vito ra yona leswaku ndhawu yi tiviwa hi ku olova endzhakunyana. Manuku ke, nsimu a yi avanyisiwe hi swiyenge leswintsongo, xin’wana ni xin’wana xi ri ni makaya lama nga vaka 400. Loko va ha ri eBritain, lava a va ta teka riendzo a va ri bizi ni malunghiselelo ya vona vini—va tiyiseka leswaku vutleketli, tindhawu to tshama ni tibuku leti ringaneke ta Bibele ti ta kumeka.

Siku ro suka eBritain a ku ri Mugqivela, June 8, 1985. Eka tiawara ta mahlamba-ndlopfu ta mixo wolowo, hinkwavo va hlengeletanile ivi va rindza exiticini xa swihaha-mpfhuka. Hi ku hatlisa, a va jitama eBelfast, elreland N’walungu. Manuku va hangalakile va ya eka swibazana swa khume leswi a swi ta va vutleketli bya vona eka mavhiki mambirhi lama landzelaka. Endzhaku ko hundza hi le Ireland N’walungu ni ku tsakela malwandla ya Bandlha ra Londonderry, va tsemakanye ndzilakana ivi va hambana, va ya etindhawini leti aviweke ka ha ri emahlweni eka swiyenge swinharhu leswi hambaneke swa Donegal. Va amukerisiwe ku yini xana?

Vanhu Va Kwalaho Va Teka Goza

Vanhu va Donegal va ni xinghana ni maIwandla, naswona leswi swi endle leswaku swi va olovela ku vulavula na vona. Vo tala va vona va vutise swivutiso, naswona a wu ri ntsako ku pfula Bibele ni ku kombisa tinhlamulo ta yona leti nga erivaleni.

Nakambe a swi ri swinene ku kota ku siya tibuku ta Bibele ni vakonanisi lava, leswaku va ta andzisa ku twisisa ka vona loko vapfhumba va fambile.

Mukhegula un’wana la tshamaka endlwini ya le purasini leri nga ekule u rhambe Timbhoni timbirhi ekaya kakwe. Hi ku hatlisa u pfumerile leswaku swiyimo swa misava a swi nyanya ivi a hlamusela leswaku vanhu vo tala endhawini leyi va nga ha kanakana ku rhamba vaendzi emakaya ya vona hikwalaho ka ku andza ka vugevenga eka xiphemu lexi a xi horile ni ku rhula xa Ireland. Swikoxa swo tala swi biwile ni ku kanganyisiwa hi mintlawa ya swigevenga leswi tsendzelekaka etikweni. Kutani hikwalaho ka yini a rhambe Timbhoni endlwini yakwe? Hikuva ti languteke “ti ri ni ntiyiso.”

Loko wansati loyi a vone leswaku vuprofeta bya Yesu ehenhleni ka masiku ya makumu a byi hetiseka, mahlo yakwe ya pfalekile, ivi ya halaka mihloti loko a twa ta ntshembo wa ku pfuxiwa ka vafi. (Matewu ndzima 24; Luka ndzima 21) Nuna wakwe a a fe eka malembe ya 20 lama hundzeke. U amukele kopi ya buku leyi nge U Nga Hanya Hi Masiku aParadeyisini eMisaveni hi ntsako ivi a kombela un’wana ku ringeta ku tlhela a n’wi endzela.

Ntokoto wo fana ni lowu wu phindhiweke minkarhi yo tala. Jaha rin’wana ri phofule minkanakano yo tala ehenhleni ka vukona bya Xikwembu. Ri te: “Loko Xikwembu xi ri kona, hikwalaho ka yini ku ri ni vuhomboloki byo tarisa leswi?” Timbhoni leti endzeke ti kombise leswaku hi ku hatlisa Xikwembu a xi ta nghenelela etimhakeni ta vanhu ivi xi tlhantlha swo tala swa swirhalanganya leswi a swi vavisa jaha leri. U va kombele ku tlhela va vuya va ta hlangana ni vatswari va yena. Loko Timbhoni ti endle tano, ti siye kopi ya buku leyi nge Hanya Hi Masiku leswaku ndyangu lowu wu ta kuma tinhlamulo eka swo tala swa swivutiso swa wona.

Nsati un’wana lontshwa u xanisiwe hi ku lahlekeriwa hikwalaho ka rifu, hikuva mufana wakwe wa malembe ya mune hi vukhale a a file mavhiki ma nga ri mangani lama hundzeke. U khutaziwe ngopfu hi rungula leri andlariweke eka buku leyi nge Hanya Hi Masiku, ngopfu-ngopfu hi nhlamuselo ya yona ya ntshembo wa ku pfuka ka vafi. Hikwalaho ka gome hinkwaro leri vangiweke hi rifu ra n’wana wakwe, u kanakanile loko Xikwembu xi ri kona hakunene. Kambe loko matsalwa lama kombaka xiyimo ni ntshembo wa vafi ya hlayiwile, nhlamuselo yakwe yi cincile. Ha yini? Hikuva u swi xiyile leswaku n’wana wakwe a a ri eku rhuleni, a etlele eku feni a ri ni langutelo ra ku pfuxiwa.—Eklesiasta 9:5, 10; Yohane 5:28, 29.

Timbhoni timbirhi leti endzeke ti nghene exikolweni, naswona thicara u ti nghenise etlasini leyi taleke hi vantshwa va 30. Thicara u amukele kopi ya buku leyi nge Buku Yanga Ya Timhaka Ta Bibele hi ntsako ivi a byela tlasi a ku: “Hi ta va ni mhaka leyi humaka eka buku leyi ndzhenga lowu.” Endzhakunyana, loko ntlawa wa Timbhoni wu ri karhi wu dya dina kwalaho kusuhi, van’wana va vanhu va tile va ta va xeweta. Mathicara man’wana mambirhi ya tile ya ta kumisisa leswi a swi humelela, kutani na wona, ya amukele tikopi ta buku leyi hi ntsako.

Endzhakunyana esikwini rolero, un’wana wa Timbhoni u hlangane ni mufana wa malembe ya 11 hi vukhale ivi a n’wi vutisa a ku: “Xana u tshama u twa hi Timbhoni ta Yehova?” Mufana loyi u te: ‘Ina, namuntlha exikoIweni.” Endzhaku u kombele kopi ya buku leyi nge Timhaka Ta Bibele. Endzhakunyana loko a ri ekaya leri manana wa kona a nga yi amukelangiki buku leyi nge Hanya Hi Masiku, n’wana lontsongo wa kwala kaya u vulavule hi ku vona buku leyi nge Timhaka Ta Bibele exikolweni. Kutani manana loyi u amukele kopi ya buku yoleyo.

Eka Vanhu Va Tinxaka Hinkwato

Emutini wun’wana, Timbhoni leti endzeke ti kombise mukhegula swifaniso leswi nga eka buku leyi nge Hanya Hi Masiku. Mukhegula loyi u vule leswaku leswi a swi lavaka hakunene a yi ri Bibele. Kutani Timbhoni ti tsakele ku n’wi nyika kopi ya The New World Translation of the Holy Scriptures. Kute loko a kume Bibele, mukhegula loyi u tsakele ku va ni kopi ya buku yo dyondza Bibele ha yona. U byele vaendzi vakwe leswaku u twile hi ta vukona bya Timbhoni ta Yehova endhawini leyi naswona u khongelele leswaku onge va nga n’wi endzela kutani va n’wi tisela Bibele. Manuku u vone leswaku xikhongelo xakwe xi hlamuriwile.

Jaha rin’wana leri nga ni 30 wa malembe ri rhambe Timbhoni timbirhi ekaya ka rona. Endzhaku ka ku vulavurisana ko koma hi Matsalwa ri te: “Kumbexana mi nge swi tsakeli loko mi tiva leswaku ndzi mani. Ndzi muprista.” Timbhoni ti vule leswaku ti ta tsakela ku vulavula na yena, laha muprista a vutiseke swivutiso swo tala ehenhleni ka tidyondzo ta vona. Loko a vutise hi ta ku tirhisiwa ka vito leri nge Yehova, vaendzi va tsakele ku n’wi nyika kopi ya broxara leyi nge Vito Ra Xikwemhu Leri Nga Ta Tshama Hi Masiku. Nakambe u amukele kopi ya buku leyi nge Hanya Hi Masiku, buku leyi a tiyisekeke leswaku yi ta n’wi pfuna ku hlamula swivutiso swakwe swo tala.

Eka xiendlakalo xin’wana, un’wana wa Timbhoni u tshineleriwe hi jaha leri tweke ku vulavula kakwe hi Bibele ni muamukeri wa vanhu eHotela. U vutise swivutiso swo fana ni leswi, “Hikwalaho ka yini misava yi ri ekhombyeni ro fana ni leri?” Mbhoni yi tsakele ku avelana na yena leswi yi swi dyondzeke eBibeleni ehenhleni ka leswi ni timhaka leti yelanaka na swona. Kutani jaha leri a ku ri mani? A a ri muprista loyi a ri eku wiseni endhawini yoleyo.

Handle ka ntirho wa ku chumayela hi yindlu na yindlu wa nkarhi na nkarhi, minkarhi yin’wana yi endliwile yo vulavurisana ni vanhu va tinxaka hinkwato. Exivandleni xa le tintshaveni, xin’wana xa swibazana xi yimile etlhelo ka gondzo ku endlela leswaku van’wana lava fambaka hi milenge va hluvula tintangu va ambala tibutsu leswaku va tsemakanya enhlangasini ivi va vulavula ni ntlawa wa vavanuna lava tsemaka ni ku hlengeleta mirhi yo tshivela ndzilo wa vuxika. Ntlawa wun’wana wu yime exivandleni lexi xiyekaka etlhelo ka tiva ra ntshava ekhwatini. A ku ri ni mutirhi wa le xiticini xa gezi loyi a a etlele emovheni ekusuhi ni kwalaho a tsakela ku va yexe enkarhini wa ku wisa kakwe ka ninhlikanhi. Ku rhula kakwe ku kavanyetiwile, kambe u tiphine hi ku vulavurisana loku phyuphyisaka ivi a va kona enhlanganweni lowu lunghiseleriweke ntlawa lowu madyambu wolawo.

Nuna un’wana a a ri karhi a famba egondzweni hi teretere yakwe loko Mbhoni yi n’wi yimisa ivi yi n’wi vutisa loko a ri na timinete ti nga ri tingani to vulavula. A a tsakela ku vulavula hi Bibele, ngopfu-ngopfu malunghana ni “minkarhi yo nonon’hwa” leyi hi hanyaka eka yona. (2 Timotiya 3:1-5) Ku tsakela kakwe ku kurisiwe swinene loko a kombiwa swifaniso eka buku leyi nge Hanya Hi Masiku. Wanuna loyi u tsakisiwe hi ku twa leswaku buku leyi yi nga tirhisiwa eku vulavurisaneni ka ndyangu hi Bibele kutani a vula leswaku hi ku hatlisa u ta sungula ku yi tirhisa ku letela vana vakwe va tsevu.

Vatirheli lava endzeke lava nga ni matimba va malembe hinkwawo, va ri kun’we ni ntlawa lowuntsongo wa Timbhoni ta kwalaho eDonegal, va ni xivangelo lexinene xo tsakisiwa hi matshalatshala ya vona. Enkarhini wa mavhiki mambirhi lama vapfhumba a va ri kwalaho, va hete tiawara ta 5 767 va ri karhi va vulavula ni van’wana hi Bibele. Va fambise Tibibele ni tibuku ta 1 613, kun’we ni tikopi ta timagazini ta Xihondzo xo Rindza na Awake! ta 2 611. Ngopfu-ngopfu lexi xi tlangeriweke hi van’wana va vini va tindlu a ku ri ku hundzuluxeriwa ka buku leyi nge Buku Yanga Ya Timhaka Ta Bibele hi ririmi xi-Irish.

A ku nga ri mintlhaveko ya dyondzo yo tinyungubyisa ya nsindziso kumbe yo tiendla valulami leyi tiseke Timbhoni leti endzeke eDonegal. Kambe ke, va lave ku avelana mahungu lamanene ni vanhu lava, hikwalaho ko hanya endhawini ya le kule, va nga ha vaka va nga vanga ni minkarhi yo tala yo wa twa. Loko yi hlamusela hi pfhumba ro sungula leri fanaka na rona, nyuziphepha yin’wana ya kwalaho yi vitane lava hlanganyeleke yi ku i “tindzewulana.” Entiyisweni, leswi a swi vula leswaku a va ri kwalaho hi ximumu ntsena naswona a va ta haha ku nga ri khale. Kambe “tindzewulana” teto, kumbe van’wana lava fanaka na vona, va ta tlhela va vuya va ta pfuna vanhu va timbilu letinene ku kuma vutivi lebyinene bya switshembiso leswi hlamarisaka swa Bibele. Entiyisweni, van’wana lava hlanganyeleke eka mapfhumba yo veka vumbhoni eku sunguleni sweswi i vaaki-tiko va Donegal va nkarhi hinkwawo.

“Leri i pfhumba lerinene ku fikela sweswi.” Lexi a xi ri exikarhi ka swiga swo tlangela ni swa ntsako leswi endliweke hi lava va hlanganyeleke entirhweni lowu. Va tokote ntiyiso wa xivuriso xa Bibele lexi nge: “L’a hananaka o ta nona, l’a tšheletaka u ta tšheletiwa na yena.” (Swivuriso 11:25) Ina, a ku ri nkateko lowukulu ku hlanganyela ematshalatshaleni lama hlawulekeke yo twarisa mahungu lamanene eDonegal. Xana na wena u nga hlanganyela entirhweni lowu hakelaka hi laha ku fanaka eka Yehova exiphen’wini xa nsimu ya ka n’wina leyi sweswi yi vupfelaka ntshovelo lowukulu ke?

[Mimepe/Xifaniso eka tluka 29]

(Leswaku u vona rungula leri hleriweke hi ku helela, vona nkandziyiso)

DONEGAL

NORTHERN IRELAND

Londonderry

Belfast

IRELAND

[Mepe]

EUROPE

ATLANTIC OCEAN

[Xifaniso]

Va tsakele ku twarisa mahungu lamanene eDonegal

[Xifaniso eka tluka 30]

Ku veka vumbhoni hi yindlu na yindlu en’walungu vupela-dyambu bya Ireland