Xilotlelo Lexi Yisaka eVukhongerini Bya Ntiyiso

EKA lembe xidzana leri ra vu-20, vanhu vo tala va tivula vakhongeri va Vukriste ku tlula rini na rini. Hambi swi ri tano lembe xidzana leri ri ve leri pfilunganyiweke swinene evurungurwini bya vanhu. Ha yini ku ri ni ku tikaneta loku?

Hi xikombiso, vo tala a va byi teki hi matimba vukhongeri bya vona. Eka vona, Vukriste i nchumu lowu tolovelekeke ntsena, a hi matimba lama fumaka evuton’wini bya vona. Ku tlula kwalaho, lava va tekaka vukhongeri bya vona hi matimba va amukela tidyondzo to tala leti kanetanaka na hambi ku ri mimpimanyeto leyi nga faniki ya mahanyelo. Naswona va avanyisiwe hi ku hambana ka vutiko, rixaka ni ikhonomi. Tlhandla-kambirhi, va hlaselanile, hambi ku ri ku xanisana, va tlhontlhelana nyimpi ni ku dlayana. Xisweswo, tinyimpi timbirhi letikulu swinene evurungurwini entiyisweni a ti lwiwa exikarhi ka matiko ya “Vukriste.”

I makumu wahi lawa hi nga vaka na wona eka leswi? Leswaku hambi byi ri Vukriste a hi vukhongeri bya ntiyiso kumbe leswaku ku ni ku hambana lokukulu exikarhi ka loyi a tivulaka ku va Mukriste ni loyi a nga yena hakunene. Hi ku ya hi Yesu Kriste, musunguri wa Vukriste, makumu ya vumbirhi hi wona yo lulama. Eka xiendlakalo xin’wana, u vulavule hi van’wana lava a va ta n’wi vula “Hosi, Hosi.” Hi marito man’wana, a va ta tivitana Vakriste, lava amukelaka Yesu tanihi Hosi ya vona. Naswona a va ta va va khomekile swinene ni ku endla leswi swi vonekaka yi ri mintirho ya nkoka evitweni ra yena. Kambe Yesu a a ta ku eka vona: “A ndzi mi tivanga, ni siku ni rin’we; sukani eka mina, n’wina lava endlaka leswo homboloka!”—Matewu 7:22, 23.

Hakunene, ku hava ni un’we wa hina la lavaka ku va exiyin’weni xexo! Kutani hi nga swi vonisa ku yini loko hi ri Vakriste va xiviri kumbe e-e? Xana xi kona xilotlelo lexi yisaka evukhongerini bya ntiyiso?

Xilotlelo

Ina, xi kona. Kavula, Vukriste byi katsa swilo swo tala. Hi xikombiso, Mukriste wa ntiyiso u fanele ku va ni ripfumelo leri tiyeke eka Xikwembu, hikuva “handle ka ku pfumela a swi endleki ku tsakisa Xikwembu.” (Vaheveru 11:6) Nakambe u fanele ku hlanganyela emintirhweni leyinene. Mudyondzisiwa Yakobo u tsundzuxe leswaku “ku pfumela na kona loku nga hava mintirho ku file.” (Yakobo 2:26) Ku tlula kwalaho, muapostola Pawulo u kandziyise ntikelo wo va ni “vutivi bya ku rhandza ka [Xikwembu], evutlharini hinkwabyo ne ku twisiseni hinkwako loku nyikiwaka hi moya.” (Vakolosa 1:9) Kambe ku hava ni xin’we xa swilo leswi lexi nyikaka xilotlelo lexi yisaka eVukristeni.

Ntiyiso hi leswaku, hi nga ha va ni vutivi lebyinene bya Bibele ni ripfumelo leri tiyeke ivi hi va bizi emintirhweni leyinene, kambe hi tama ha ha ri Vakriste lava kanganyisaka ntsena. Sweswo swi kotekisa ku yini? Muapostola Pawulo u hlamuserile a ku: “Hambi ndzi nga vulavula tindzimi ta vanhu ni ta tintsumi, kambe ndzi nga ri na rirhandzu, ndzi fana ni xingelengele lexi rilaka, kumbe swiphambatana swa nsimbi loko swi bananisiwa. Ni loko kumbe ndzi ri ni matimba yo vula Rito, ndzi ri ni ku twisisa swihundla hinkwaswo ni vutivi hinkwabyo, ni loko ndzi ri ni ku pfumela hinkwako, ndzi ko ndzi susa tintshava, kambe ndzi nga ri ni rirhandzu, a ndzi nchumu. Hambi ndzi nga teka swilo swa mina hinkwaswo ndzi nyika vanhu, ni loko ndzi nga nyiketa miri wa mina leswaku wu hisiwa, kambe ndzi ri hava rirhandzu, a swi ndzi pfuni nchumu.”—1 Vakorinto 13:1-3.

Ina, xilotlelo xo vona vukhongeri bya ntiyiso i ku tlangela leswaku byi sekeriwe erirhandzwini ra ntiyiso. Ripfumelo ra hina, mintirho leyinene ni vutivi lebyinene i swa ntikelo swinene. Kambe loko hi nga swi kombisi hi rirhandzu, hi laha hi endlaka ha kona, swi pfuna swintsongo. Ha yini swi ri tano? I yini lexi endlaka mfanelo ya rirhandzu yi va ni nkoka wo tano lowukulu?