Ku Landzelela Swiletelo Swa Hosi Hi Rixaladza
“Nḍi ranḍa ku anakanya ŝiletelo ŝa wena, ni ku v̌eka tindlela ta wena e mahlweni ka mina. Nḍi tiṭakisa hi tifanelo ta wena, kambe a nḍi riv̌ali rito ra wena”—PSALMA 119:15, 16.
1. Hikwalaho ka yini un’wana ni un’wana ni xin’wana ni xin’wana swi ri ehansi ka swiletelo swa Yehova?
UN’WANA ni un’wana ni xin’wana ni xin’wana swi le hansi ka swiletelo swa Yehova Xikwembu xa Matimba Hinkwawo, Hosi leyi nga heriki. Hi Yena la vumbeke misava hinkwayo. I Xihlovo xa vutomi hinkwabyo. U vumbe misava ivi a yi lunghiselela leswaku yi akiwa. I Xikwembu xa ku hleleka, naswona hi ku tirhisa milawu ya xona, ku hleleka ku ta hlayisiwa eku tumbuluxeni ka xona hinkwako.—Psalma 36:9; Esaya 45:18; Nhlavutelo 15:3.
2. I mani loyi a lawulaka matilo lama nga ni tinyeleti, naswona hi ndlela yihi?
2 Yehova Xikwembu la leriseke matilo lama nga ni tinyeleti leswaku ma hangalaka ku fana ni thende ehenhla ka misava ivi endzhaku a rhamba vanhu vakwe a ku: “Tlakusani mahlo ya ṅwina, mi languta! I mani l’a tumbulušeke silo ŝeŝo, l’a fambiseke hi ku ri ŝaŝameta e v̌andla ra ŝona šana? Wa ŝi v̌itana hikwaŝo hi mav̌ito ya ŝona.” A ku ri Yehova la vutiseke Yobo a ku: “Šana wa tiv̌a milawu ya le tilweni, ni mitiro ya yona e misav̌eni šana?” I milawu ya Yena ya nkoka-misava ni nsusumeto leyi hlanganisaka timiliyoni ta swirimele ni tibiliyoni ta swona ta tinyeleti ni leyi yi lawulaka mafambelo ya misava loko yi ri karhi yi rhendzeleka empfhukeni.—Esaya 40:26; Yobo 38:33.
3. Swiharhi swi pona hikwalaho ka swiletelo swa mani, naswona i yini lexi a xi ta humelela loko a swo xandzuka?
3 Hi Yena la mirisaka swimilana swa rihlaza leswi funengetaka misava. I swileriso swa yena leswi endlaka leswaku swimilana swi hluka, swi kula ni ku tswala mihandzu. Ku ni swiharhi swo tala leswi nga hlayekiki emisaveni—ku sukela eswivandleni swa le tipholi ku ya eswihlahleni swa tropiki, ku sukela ematshamelweni lama tlakukeke ku ya evuentweni bya misava, ku suka evuandlalweni bya Iwandle ku ya evuentweni bya rona lebyi nga ni munyama lowukulu. Leswaku swi va kona, xin’wana ni xin’wana xa mihlovo leyi nga hlayekiki xi fanele ku hanya hi laha Yehova a leriseke ha kona. Hi ku tirhisa ntumbuluko, u nghenisa swileriso swakwe eka swona leswaku swi pona. “Swi tlharihile ngopfu.” (Swivuriso 30:24) Kambe ku vuriwa yini loko xinyanyana lexintsongo lexi vuriwaka blackpoll lexi nga eAlaska xo tibyela xi ku, ‘ndzi nga ka ndzi nga hahi magidi ya timayele ndzi ya eAmerika Dzonga. Hikwalaho ka yini ndzi fanele ku haha?’ Xinyanyana xexo lexintsongo xi nga fa emabubutseni ya vuxika. Kambe xi nga ka xi nga swi vuli sweswo. Xi endliwe leswaku xi rhurha-rhurha leswaku xi pona. Swi tano na hi swiharhi hinkwaswo. Swi landzela swiletelo leswi byariweke eka swona hi Yehova Muvumbi wa swona hi vutlhari. A swi tihlawuleri.
4. I nhlawulo wihi lowu vanhu va nga na wona, naswona hi vuyelo byihi ke?
4 A swi fani ni vanhu. Hi vumbiwe hi xifaniso xa Xikwembu, naswona ha tihlawulela. Hambi swi ri tano, hambi leswi Yehova a nga hi endlelangiki ku endla hi vutlhari hi ntumbuluko ntsena, a nga hi tshiki hi ri hexe. Hi ku tirhisa Bibele Rito ra yena, u hi nyika swiletelo swakwe leswaku hi kuma vutomi. Loko hi landzelerisisa swiletelo sweswo swa Hosi hi rixaladza, hi ta hanya. Loko hi tirhisa ntshunxeko wa hina ku swi honisa ivi hi teka ndlela ya hina vini ya vutilawuri leyi hi yi hlawulaka, hi ta fa. Hi fanele ku tiendla lava faneriwaka hi ku pona. Swa olova. “Rito ra wena i riv̌oningo e milengeni ya mina, ni ku v̌onakala e ndleleni ya mina,” ku vule mupisalema. Hi tlhelo rin’wana, “ndlela yi kona leyi v̌onekaka eka munhu ingi yi lulamile, kasi makumu ya yona ma yisa ku feni.” (Psalma 119:105; Swivuriso 14:12) Enkarhini lowu wa makumu, i swa nkoka leswaku hi teka marito ya Psalma 119:15, 16 ya ri ya hina vini, hi laha ya kongomisiweke eka Yehova ha kona: “Nḍi ranḍa ku anakanya ŝiletelo ŝa wena, ni ku v̌eka tindlela ta wena emahlweni ka mina. Nḍi tiṭakisa hi tifanelo ta wena, kambe a nḍi riv̌ali rito ra wena.”
Yehova I Muhleri Wa Vanhu Va Yena
5. I tindlela tihi leti Yehova a a ri Muavanyisi wa Israyele ha tona, Munyiki wa Nawu ni Hosi xana?
5 Yehova u vulavule na Muxe eNtshaveni ya Sinayi, a nyikela swiletelo leswaku swi kongomisa Israyele. Leswi hlawulekeke exikarhi ka swona a ku ri Milawu ya Khume, leyi tsariweke eribyeni hi voko ra Xikwembu. (Eksoda 20:1-17; 31:18) Ku tlhandlekela emhakeni ya ku va Munyiki wa Nawu wa Israyele, Yehova a a ri Muavanyisi wa vona, la tirhisaka Muxe ni vakulukumba van’wana. Muxe u tsundzuxe vakulukumba vo tano ku tsundzuka leswi: “Mi nga ṭhuki mi av̌anyisa hi ku ya hi ngohe ya v̌anhu; mi ta yingisa lo’nṭongo kukotisa lo’nkulu; mi nga ṭhuki mi tšhav̌a v̌anhu, hikuv̌a ku av̌anyisa ku huma eka Šikwembu.” (Deuteronoma 1:17) Nakambe Yehova a a ri Hosi ya vona, a hlela timiliyoni leti ta vanhu leswaku timhaka ta tona ti fambisiwa khwatsi. Hikwalaho ka leswi hinkwaswo, un’wana wa vaprofeta vakwe endzhakunyana u te: “Hikuv̌a Yehova i muav̌anyisi wa hina, Yehova i mulawuri wa hina; Yehova i Hosi ya hina.”—Esaya 33:22.
6. Yehova u tikombe a ri Muhleri ni mukongomisi wa Israyele emananga hi ndlela yihi?
6 Tiko ra Israyele a ri hleriwe hi tinxaka, mindyangu ni miti. Loko va ri karhi va tsendzeleka emananga, Yehova u avele rixaka rin’wana ni rin’wana xikhundla xa rona eku macheni. Loko va dzime mintsonga va rhendzela tabernakele, rixaka rin’wana ni rin’wana a ri ri ni xivandla xa rona lexi ri xi averiweke. (Tinhlayo 2:1-34; Yoxuwa 7:14) Hi ku tirhisa papa, Yehova u letele mafambelo ya vona: “Loko papa ri suka e henhla ka tabernakele, e v̌ana v̌a Israel a v̌a suka, kutani laha papa ri nga yima kona v̌ana v̌a Israel a v̌a dzima mišaša kona. A v̌a ṭhama kona hi masiku hikwawo lawa papa ri nga yima e henhla ka Yindlu.”—Tinhlayo 9:17, 18.
7. I mani la swi koteke ni loyi a endleke ku hundzuka enhlengeletanweni ya Israyele?
7 Loko ku laveke ku hundzuka ka nhlengeletano, Yehova u ku endlile. Muxe u vilerile a ku: “A nḍi ŝi koti ku rwala tiko leri hikwaro nḍi ri ŝanga hikuv̌a ra nḍi hlula.” Yehova u hlamurile a ku: “Nḍi hlengeletele v̌av̌anuna v̌a 70, e v̌akulukumba v̌a Israele, lav̌a u v̌a tiv̌aka leŝaku v̌akulu v̌a tiko, ni v̌anhu lav̌a v̌ulav̌ulaka timhaka; . . . v̌va ta rwala na wena e nḍwalo wa tiko, u nga ṭhuki u wu rwala u ri wena ntsena.” (Tinhlayo 11:14, 16, 17) Hambi loko vanhu endzhakunyana va lave hosi ya munhu, Hosi leyikulu leyi nga heriki a yi n’wi sivelanga Israyele. Hosi ya munhu a yi ri ni kopi ya Nawu wa Yehova. Vaprofeta va twarise ku avanyisa ka Yehova. Tihosi leti tshembekaka a ta ha tirha tanihi valawuri va Xikwembu loko ti ‘tshame exiluvelweni xa Yehova.’—1 Tikronika 29:23; Deuteronoma 17:18; 2 Tihosi 17:13; Yeremia 7:25.
Xikombiso Lexi Hetisekeke Xo Landzela Swiletelo Swa Hosi
8. Yesu u twarise Mfumo wa Yehova lowu taka hi ndlela yihi, kwihi naswona hi vuyelo byihi?
8 Loko Yesu a fikile tanihi Mesiya la tshembisiweke, u landzele swiletelo swa Tata wakwe wa le tilweni hi ku chivirika lokukulu. Eku sunguleni ka vutirheli lebyikulu bya le Galeliya, a “sungula ku twarisa Evangeli, a ku: “Hundzukani, hikuva Mfumo wa matilo wu le kusuhi.” Yesu a rhendzeleka ni tiko hinkwaro ra Galeliya, a ri karhi a dyondzisa emasinagogeni ya vona, a twarisa Evangeli ya Mfumo, a horisa mavabyi hinkwawo, ni ku vaviseka hinkwako loku nge vanhwini. Kutani mintshungu leyi humaka eGaleliya, ni le Dekapolisi, ni le Yerusalema, ni le Yudiya, ni le ntsungeni wa Yordani, yi n’wi landza.” (Matewu 4:17, 23, 25; Yohane 2:17) A nga chumayelanga emasinagogeni ntsena. U twarisile mahungu lamanene ya Mfumo hinkwako laha vanhu a va kumeka kona leswaku va yingisela: etempeleni, eribuweni ra lwandle, etlhelweni ra tintshava, tiko leri pfulekeke, miti ni swimitana ni le makaya ya vanhu. Mintshungu yi hlengeletanile eka yena, yi n’wi “yingisa hi ku tsaka.” Yi “namarhela marito ya yena, [yi n’wi yingisa.]”—Marka 12:37; Luka 19:48.
9. Yesu u endle yini leswaku a ndlandlamuxa ntirho wo chumayela, kutani u nyikele swiletelo swihi?
9 Eka vaapostola vakwe u xiye xilaveko xa vatirhi lava engetelekeke, kutani “a rhuma volavo va khume na vambirhi, endzhaku ka loko a va lerisile a ku: “Mi nga tshuki mi ya eka vamatiko; naswona mi nga ngheni emitini ya Vasamariya, kambe yanani eka tinyimpfu leti lahlekeke ta yindlu ya Israyele. Kutani loko mi ri karhi mi famba, twarisani mhaka leyi nge: “Mfumo wa matilo wu le kusuhi.” Loko mi nghena emutini wihi ni wihi, kumbe eximutanini xihi ni xihi, lavani loyi a fanelaka ku mi amukela, kutani mi tshama eka yena kukondza loko mi suka. Loko mi nghena endyangwini, xewetani. Loko swi lulamele ndyangu wolowo, ku rhula ka n’wina a ku te ehenhla ka wona; kambe loko swi nga wu lulamelanga, ku rhula ka n’wina a ku vuyele ka n’wina.” (Matewu 10:5-7, 11-13) Endzhakunyana u rhumele van’wana va 70 va ri ni swiletelo leswi fanaka, naswona hi ku landzelerisa swiletelo leswi hi rixaladza, va humelerile naswona va ve ni ntsako lowukulu.—Luka 10:1, 17.
10. (a) Endzhaku ka ku pfuka ka yena, i xileriso xihi xin’wana lexi Yesu a xi nyikeleke, naswona hi vuyelo byihi? (b) Hikwalaho ka yini ku vekiwa ka vavanuna van’wana a ku laveka, naswona i swilaveko swihi leswi a swi laveka?
10 Endzhaku ka ku fa ni ku pfuxiwa ka yena, Kriste Yesu u kurise nsimu ya valandzeri vakwe, a va byela a ku: “Ndzi nyikiwile vuhosi hinkwabyo etilweni ni le misaveni; yanani ha kona, mi ya hundzula vamatiko hinkwavo leswaku va va vadyondzisiwa va mina, mi va khuvula hi vito ra Tatana, ni ra N’wana, ni ra Moya lowo Kwetsima, mi va dyondzisa ku hlayisa hinkwaswo leswi ndzi mi leriseke swona.” (Matewu 28:18-20) Loko a tlhandlukele etiIweni, u nyike xileriso lexi fanaka a ku: “Kutani mi ta va timbhoni ta mina kwala Yerusalema, ne tikweni hinkwaro ra Yudiya, ni ra Samariya, ni ku ya fika emakun’wini ya misava.” (Mintirho 1:8) Loko valandzeri vakwe va ri karhi va hangalasa rungula ra Mfumo, magidi ya tihlanganise ni ntirho wa vona. (Mintirho 2:41; 4:4; 5:14; 6:7) Mabandlha ya simekiwile hinkwako. Valanguteri ni vapfuneti va vutirheli lava va veke ni timfanelo leti kongomeke ta Matsalwa va hlawuriwele ku risa mintlhambi leyi ya vavanuna ni vavasati. Mabandlha ya pupumile ni ku kula hi nhlayo.—1 Timotiya 3:2-10, 12, 13; Tito 1:5-9.
11. I nhlengeletano ya njhani leyi Timbhoni ta Yehova ti nga na yona namuntlha, naswona hikwalaho ka yini leyi faneleke yi laveka sweswi?
11 Namuntlha ngopfu-ngopfu i swa nkoka eka mabandlha ya Timbhoni ta Yehova ku landzela xikombiso xa Yesu eku chumayeleni. Ku endla tano khwatsi, va amukela xivumbeko xa nhlengeletano lexi a xi simekiwile emasikwini ya vaapostola. Hi le nkarhini wa makumu, nkarhi lowu Yesu a vhumbeke leswaku ntirho wa ku chumayela ka misava hinkwayo a ku ta humelela: “Kutani Evangeli leyi ya Mfumo yi ta twarisiwa emisaveni hinkwayo, leswaku yi va vumbhoni eka vanhu va matiko hinkwawo; kutani hi kona makumu ma nga ta fika.” (Matewu 24:14) Endzhaku ka Nyimpi yo Sungula ya Misava, magidi ma nga ri mangani ya sungule ku twarisa mahungu lamanene ya Mfumo lowu, sweswi tinhlayo ta vona ti hundze mfungho wa timiliyoni tinharhu swinene! I nkarhi wa xihatla wo landzela swileriso swa Hosi leyikulu leyi nga heriki, Yehova Xikwembu ni Hosi ya Tihosi, Kriste Yesu hi rixaladza.
Vakulu Va Faneriwa Hi Xichavo Ni Nseketelo Wa Wena
12. I yini lexi lavekaka eka vakulu namuntlha, naswona ntirho wa vona wu nga endliwa lowu tsakisaka hi ndlela yihi?
12 Eku landzeleni ka swiletelo swa Hosi, vakulu va bandlha va ni ntirho lowukulu. Va fanele ku veka xikombiso: “Risani ntlhambi wa Xikwembu lowu nge hansi ka n’wina, mi wu hlayisa ku nga ri hi ku sindzisiwa, kambe ku ri hi ku swi rhandza, hi laha Xikwembu xi swi lavaka ha kona, naswona ku nga ri hi ku langutela bindzu leri khomisaka tingana, kambe hi ku hiseka. Mi nga tshuki mi fuma lava mi nga nyikiwa vona ku va risa, kambe mi vekela ntlhambi entila lowunene.” (1 Petro 5:1-3) I ntlhambi wa Xikwembu. Xi khomele vakulu ku tihlamulela, kambe ntirhisano lowu tshembekaka wa un’wana ni un’wana wu nga endla leswaku ntirho wa vona wu tsakisa: “Yingisani vafambisi va n’wina, mi titsongahata eka vona, hikuva va hitekela mimoya ya n’wina, tanihi vanhu lava nga ta vutisiwa ehenhla ka yona. Mi vona leswaku va tirha ntirho wa vona hi ku tsaka, va nga wu endli hi ku vilela, hikuva loko swi ri tano a swi nge mi pfuni nchumu n’wina.”—Vaheveru 13:17.
13. Hikwalaho ka yini vakulu va fanele ku kombisiwa xichavo lexikulu?
13 Hinkwavo ebandlheni va fanele ku kombisiwa xichavo, kambe ngopfu-ngopfu vakulu lava tirhaka hi matimba: “Endla leswaku vakulukumba lava tirhaka swinene ntirho wa vurisi va kombisiwa xichavo lexikulu, ngopfungopfu lava tikarhataka hi ku twarisa rito ni ku dyondzisa.” (1 Timotiya 5:17; Varhoma 12:10) Hikwalaho ka yini “xichavo lexikulu” xi ya eka vakulu? Hikwalaho ka ntirho wa vona lowunene. Malunghana na vona ku tsariwe leswi: “Mi langutela ni ntlhambi hinkwawo lowu Moya lowo Kwetsima wu nga mi veka ku va varhangeri va wona; risani Kereke ya Xikwembu.” (Mintirho 20:28) Va tirha hi matimba va tirhela wena ni van’wana. Va nga ha fanela ku tshinya vanhu van’wana loko swiletelo swa Hosi swi honisiwa kumbe swi tshoviwa—lowu a hi ntirho lowu tsakisaka naswona wu nga ha tshova van’wana. Ndzayo ehenhleni ka swiambalo kumbe mahanyelo swi nga ha lava ku nyikeriwa naswona swi nga ha ariwa. Hambi swi ri tano swilo leswi hinkwaswo swi endleriwa ku tshamiseka ka moya ka bandlha. Vakulu va fanele ku xiximiwa ni ku kombiwa xichavo.
14. (a) Hikwalaho ka Yakobo 4:12, ku avanyisa loku endliwaka hi vakulu ku nga va loku faneleke hi ndlela yihi ntsena? (b) Hi rini laha ku nga tshikiwaka ku avanyisa, kutani hi rini laha tintswalo ti tlulaka ku avanyisa ke?
14 Minkarhi yin’wana vakulu va fanele ku tirha eka tikomiti to avanyisa ivi va avanyisa—minkarhi yin’wana loku nga tolovelekangi. Xana ku avanyisa loku ku twananisa ku yini na Yakobo 4:12? Yi ri: “Munyiki wa Nawu ni Muavanyisi i un’we ntsena, yena loyi a kotaka ku ponisa kumbe ku lovisa. Kambe, wo va mani wena, leswi u avanyisaka munhu-kuloni xana?” Ina, vanhu a va fanelanga ku avanyisana. Ku tlula kwalaho ku avanyisa loku vakulu va ku endlaka a ku fanelanga ku ya hi mianakanyo ya vona vini kambe ku ya hi ku pfumelelana ni Rito ra Yehova. Xiya ndlela leyi Yosafat a tsundzuxeke vaavanyisi lava a va vekeke ha yona: “Hikuv̌a a mi av̌anyisi mi rumiwa hi v̌anhu, kambe mi rumiwa hi Yehova; . . . ŝeŝi, šitšhav̌o ša Yehova a ši v̌e henhla ka ṅwina; tiv̌oneleni hi laha mi nga ta endla ha kona, hikuv̌a eka Yehova, Šikwembu ša hina, a ku na v̌umbabv̌a, hambi ku ri ku ya hi ngohe ya v̌anhu, ni ku amukela tinyiko.” (2 Tikronika 19:6, 7) Nhlengeletano yi fanele ku tshama yi basile. Hambi swi ri tano vakulu a va fanelanga ku va ‘vaavanyisi’ lava hatlisaka. Musa ni ku rivalela swi nga kombisiwa loko ku vaviseka ku entile naswona ku tisola ku ri ka ntiyiso. Manuku ke, ‘musa wu nga ka wu nga tsakeli ku avanyisa hi ku khana, ku ri loku tlulaka ku avanyisa.’—1 Timotiya 3:3; Yakobo 2:13; vona tinhlamuselo ta Reference Bible.
15. I mintirho yihi leyi vakulu va faneriwaka hi ku xiximiwa ni xichavo ha yona?
15 Kutani mintirho ya vakulu hakanyingi ya nonon’hwa naswona yi lava swo tala, kambe vakulu lava tshembekaka ni lava va khathalelaka vutihlamuleri bya vona hi rirhandzu va nga va xihlovo xa mphyuphyiso ni nsirhelelo wa moya. “Uṅwana ni uṅwana wa v̌ona u ta kotisa šisirelelo loko moya wu hunga, ku kota šitšhav̌elo loko šidzedze ši fika, ku kota šinambyana ša mati e tikweni ra dyanḍa, ni nḍuti wa ribye leri tlakukeke e tikweni leri omeke.” (Esaya 32:2) I musirheleli wa musa ni wa rirhandzu—hayi mulumbeti wa xihatla kumbe loyi a tshinyaka hi xihatla—loyi a tisaka ntsako eka hinkwavo, loyi a kumaka ku xiximiwa ni xichavo, kutani a amukeriwa hi Yehova.
Lehiselanani Timbilu
16. (a) Van’wana va endlisa ku yini eka swihoxo swa van’wana, naswona i yini lexi nga ha va endlaka leswaku va nga soli ngopfu ni ku va lava twisisaka swinene? (b) Yehova u languta malandza lama tshembekaka lama endlaka swihoxo hi ndlela yihi?
16 Nkarhi na nkarhi loko vanhu va tirha kun’we, swirhalanganya swi nga ha tlhekeka. Swihoxo swa endliwa. Loko leswi swi humelela, van’wana va kavanyetiwa swinene. Van’wana va tirhisa swihoxo swa van’wana tanihi swikhomela-ndhawu swo endla xihoxo lexikulu swinene—va tshika ku tirhela Yehova! Hambi swi ri tano, loko va languta swihoxo swa vona vini swi ri swa xinkarhana ku fana ni loko va languta swa van’wana, va nge soli ngopfu naswona va ta swi twisisa swinene. Muxe u swi endlile swihoxo. Davhida na yena u swi endlile. Petro u endle tano. Na hina hinkwerhu ha swi endla. Kambe Yehova u hambetile a tirhisa vavanuna lava vo tshembeka va khale, naswona u hambeta a hi tirhisa. Kutani, “u mani wena ku avanyisa nandza wa munhu un’wana? Hambi a yima kumbe ku wa, sweswo swi tiviwa hi n’wini wa yena; kambe u ta yima, hikuva [Yehova wa] swi kota ku n’wi pfuxa a yima.”—Varhoma 14:4.
17. Emhakeni leyi yo endla swihoxo ni ya ku avanyisa van’wana, i tinhla tihi leti tlhandlekelaka leti hi faneleke ku ti tsundzuka?
17 Na hina a hi tsundzukeni: Laha misaveni, Yehova u tirhisa vanhu lava nga hetisekangiki—hi vona ntsena lava a nga na vona sweswi. Kahle-kahle, leswi swi kombisa ku dzuneka eka Yehova: U endla swo tala hi swintsongo! Ku tsana ka hina ku kombisa matimba yakwe: “Tintswalo ta mina eka wena ti ringene; hikuva matimba ya mina ma hetiseka laha ku nga ni ku tsana kona.” (2 Vakorinto 12:9) Ntirho wo veka vumbhoni wa misava hinkwayo wa ndlandlamuka hikwalaho ka xivangelo lexi Yehova hi byakwe a xi nyikaka: “Ku nga ka ku nga vi hi nyimpi ni matimba, kambe hi Moya wa mina.” (Zakaria 4:6) Kutani a hi rivaleleni swihoxo ni ku tsana ka van’wana leswaku na swa hina swi ta rivaleriwa. Tsundzuka: “Loko mi rivalela vanhu swidyoho swa vona, na n’wina Tata wa n’wina wa le tilweni u ta mi rivalela.”—Matewu 6:14, 15.
Ku Hleleriwa Ku Landzelela Xileriso Xa Hosi Xo Chumayela
18. Ku nyikela vukongomisi lebyi hlanganeke eku chumayeleni ka mabandlha, i lunghiselelo rihi leri a ri ri kona emasikwini ya vaapostola ni leri sweswi ri nga kona esikwini ra hina?
18 Vaapostola ni vakulukumba lava hlanganeke eYerusalema va vumbe huvo leyi fumaka leyi endleke makungu lama nyikaka vukongomisi lebyi hlanganeke eka mabandlha yo sungula ya Vukriste. (Mintirho 15:1-31; 16:1-5) Namuntlha timbhoni leti totiweke ta Yehova, “nandza lowo tshembeka, lowa vutlhari,” ti ni Huvo leyi Fumaka eyindlu-nkulu ya tona eBrooklyn, New York. (Matewu 24:45-47) Yi kongomisa ntirho lowu hlamarisaka wo veka vumbhoni bya Mfumo emisaveni hinkwayo lowu sweswi wu endliweke emisaveni hinkwayo eku hetisekeni ka xileriso xo huwelela Mfumo wa Yehova. (Matewu 24:14) Ntirho lowu ingi wu nga endliwanga loko a ku nga ri ni nhlengeletano. Munhu a a nga ta wu endla hi byakwe.
19. I ntirho wihi lowu vanhu hi voxe a va nga ta wu endla lowu Timbhoni ta Yehova ti wu endlaka hi laha ku humelelaka hi ku landzelela swiletelo swa Hosi hi rixaladza?
19 Ku hava munhu ni mintlawa leyi nga hleriwangiki, leyi hangalakeke ya vanhu loyi a nga chumayelaka eka tindzimi leti tlulaka 190 naswona ematikweni ya 205, a fambisa tidyondzo ta le makaya ta Bibele leti tlulaka timiliyoni timbirhi ni kotara, ivi a khuvula vatirheli va mahungu lamanene ya Mfumo lavantshwa va 190 000 lembe na lembe. Doo, swi teke Timbhoni leti tlulaka timiliyoni tinharhu ku endla ntsengo wa ntirho wo chumayela wa tiawara leti nga vaka madzana ntsevu wa timiliyoni elembeni ra 1985. Va swi kotile ku swi endla hi mhaka ya leswi a va hleriwe khwatsi hi mabandlha lama nga vaka 50 000, hinkwavo va ri ehansi ka vukongomisi lebyi vonekaka bya Huvo ya vona yin’we leyi Fumaka. Hambi ku ri kwalaho, swi endliwile ntsena hikuva Huvo leyi Fumaka, marhavi ya 94, mabandlha ya 50 000 ni Timbhoni ta 3 000 000 hinkwavo a va hlanganile eku landzeleleni ka swiletelo swa Hosi hi rixaladza.
Wa Tsundzuka Xana?
◻ Yehova u hlele tiko ra Israyele hi ndlela yihi?
◻ I xikombiso xihi lexi hetisekeke lexi Yesu a xi siyeke xo hetisisa ntirho wo huwelela Mfumo wa Yehova?
◻ I mintirho yihi yo tala leyi endliwaka hi vakulu leyi faneriwaka hi ku va kombisa ka hina xichavo?
◻ Hikwalaho ka yini mintlawa leyi ntshunxekeke kumbe vanhu yi nga wu endli ntirho wo veka vumbhoni?
[Xifaniso eka tluka 23]
Muvumbi u endla leswaku swiharhi hinkwaswo swi faneriwa hi ku pona
Vanhu va fanele ku tiendla lava faneriwaka hi ku dyondza swiletelo swa Yehova