Swivutiso Swa Vahlayi

◼ Exifanisweni xa Yesu hi ta mufuwi loyi a a nga fumanga etlhelweni ra Xikwembu, i vamani ‘vona’ lava a va lava moya wakwe?

Yesu a a nga vulavuli hi ntlawa wo karhi wa vanhu kumbe tintsumi. Eka Luka 12:20 ya New World Translation u tirhise rito leri nge “va” tanihi ndlela yo vula ntsena leswi a swi ta endlekela wanuna loyi.

Xifaniso lexi xi kumeka eka Luka 12:16-21. Mufuwi la nga eka xona a a nga aneriseki hi rifuwo ra yena lerinene. U hambetile a namarhela ntirho wakwe wo kurisa rifuwo ra yena. Yesu u hete hi ku: “Kambe Xikwembu xi ku [eka mufuwi], ‘We xihunguki, hi vusiku lebyi va lava moya wa wena eka wena. Kutani ke, leswi u swi hlayiseke swi ta va swa mani xana?’ Swi tano ni ka munhu la tihlengeletelaka xuma kambe a nga fuweri Xikwembu.”

Ku hundzuluxela kun’wana ku tirhisa maandlalelo lama tsaneke, tanihi ku: “Hi vusiku byebyi, u ta tekeriwa moya wa wena.” (Mahungu Lamanene) “Hi vusiku byebyi ku ta laviwa moya wa wena.” (The Jerusalem Bible) “Hi vusiku byebyi vutomi bya wena bya laviwa.” (The Twentieth Century New Testament) “Hi vusiku lebyi moya wa wena wu ta laveka.” (Byington) Hambi swi ri tano, Xiheveru (lexi Yesu a vulavuleke ha xona) na Xigriki (lexi Luka a tsaleke hi xona) swi tirhisa xivumbeko xa munhu wa vunharhu. Tsalwa ra Xigriki eka Luka 12:20 kahle-kahle ri ri “eka vusiku lebyi moya wa wena va wu kombela eka wena.” Riendli leri ri le ka vunyingi bya munhu wa vunharhu. Kutani ke, ematshan’wini yo ri cinca swi nga fanelanga ri va eka xivumbeko lexi tsaneke (tanihi le swikombisweni leswi nga laha henhla), New World Translation ni tin’wana ti tirhisa maandlalelo yo tanihi ku “va lava.”

Hi endla khwatsi, hambi swi ri tano, ku ka hi nga pfumeleli ku rharhangana ka vuvulavuri ku sirha xitsundzuxo lexi nga erivaleni xa Yesu hi ta rifuwo. A a nga hlamuseli ndlela leyi mufuwi a a ta fa ha yona. Mhaka a ku ri leswaku hi ndlela yin’wana munhu loyi a a ta lahlekeriwa hi moya, kumbe vutomi byakwe, vusiku byebyo. Xana a a yimise ku yini eka Xikwembu? Hinkwerhu ka hina hi nga ha va lava nyokoveleke eku antswiseni ka xiyimo xa rifuwo ra hina ivi hi ku fanana hi lahlekeriwa hi ku fuwela Xikwembu. Misava ya bindzu yi talela eka moya wa ‘leswi teleke.’ Hambi va ri vanhu lava tikhampani ta vona ti bindzulaka timiliyoni ta tidolara, tipondho, timaraka ni swin’wana hi ndlela yo hlamarisa eka leswi va swi xavisaka, ya nga ha ringeta ku lava swo tala—vathoriwa vo tala, swixavisiwa swo tala, mimbuyelo yo tala, mafehle-fehle yo tala, swo tala ebankini. Xivutiso xa Yesu xa ha ri ni matimba namuntlha kukota loko a xi vutisile ro sungula a ku: “Kutani ke, i mani la nga ta va ni swilo leswi u swi hlengeleteke xana?”—Luka 12:20.