Vantshwa Lava Tsakisaka Mbilu Ya Yehova

“Ṭakisa mbilu ya mina, Nḍi ta kuma rito e ku hlamula la’va nḍi rukanaka.”—SWIVURISO 27:11.

1. Xana vatswari va hina ni Muvumbi wa hina va khumbeka njhani hi ndlela leyi hi hanyaka ha yona?

HAMBI wa swi xiya kumbe e-e, swi na mhaka leswi u hanyisaka swona. Hi xikombiso, swi na mhaka eka vatswari va wena. “Ṅwana l’a tlhariheke o ṭakisa tata wa yena,” Bibele ya hlamusela, “kambe ṅwana wo hunguka i nhlomulo e ka mana wa yena.” (Swivuriso 10:1; 13:24, 25) Kambe lexi xi nga xa nkoka swinene, leswi u hanyisaka swona swi nga tsakisa Muvumbi wa hina, Yehova Xikwembu, kumbe ku n’wi hlundzukisa. “Ṅwana nga, tlhariha,” Yehova wa khutaza, “u ṭakisa mbilu ya mina, Nḍi ta kuma rito e ku hlamula la’v̌a nḍi rukanaka.”—Swivuriso 27:11.

2. I mphikamakaneta yihi ya nkoka yi pfuxiweke hi Sathana, naswona hi katseka njhani?

² Kavula, loyi a rhukanaka Yehova, i Sathana Diyavulosi. Entangeni wa Edeni, Sathana u tlakuse mphikamakaneta ya nkoka leyi laveke nhlamulo eka Xikwembu. Loko Diyavulosi a swi kotile, hi ku olova, ku kuma Evha, ku landza Adamu, leswaku va tlula nawu wa Xikwembu, ku na vumbhoni bya leswaku u tlhontlhe Yehova. Hi ku endla tano, Sathana u te: ‘Ndzi nyike nkarhi ntsena kutani ndzi nga hambukisa un’wana ni un’wana eku ku tirheleni.’ (Yobo 1:6-12) Hikokwalaho, Yehova u endle xirhambo lexi kufumetaka mbilu lexi rhekhodiweke laha henhla, leswaku n’wana wa yena a N’wi nyika ‘nhlamulo’ leswaku A ta hlamula mphikamakaneta ya Sathana.

3. Hikwalaho ka yini xikombelo xa Yehova ngopfu-ngopfu xi tirha eka Yesu, naswona i vamani van’wana lava na vona va nga ta va va tsakise mbilu ya Xikwembu?

³ Hambi swi ri tano, kahle-kahle hi le ka mani laha Yehova a kongomiseke xikombelo lexi, a n’wi vula “n’wananga”? Yesu Kriste hi ndlela yo hlawuleka i n’wana wa Xikwembu, N’wana wa xona la nga un’we. (Yohane 1:14) Ku tlula kwalaho, handle ka Adamu, loyi a dyoheleke Muvumbi wa yena, Yesu hi yena ntsena munhu la hetisekeke loyi a tshameke a va emisaveni, yena ntsena munhu la swi kotaka ku kombisa hi laha ku heleleke leswaku ku tshembeka eka Xikwembu ku nga hlayisiwa. (1 Vakorinto 15:45) Xisweswo xikombelo xa Yehova ngopfu-ngopfu xi tirha eka Yesu. Naswona Yesu a nga kalanga a nyumisa Tata wakwe. Hi ndlela ya yena yo tshembeka, Yesu u nyike Xikwembu nhlamulo ya mphikamakaneta ya vutikurisi ya Sathana ya leswaku vanhu a va nga ta N’wi tirhela hi ku tshembeka ehansi ka ndzingo. (Vaheveru 2:14; 12:2) Nakambe, hinkwavo lava nga ta fuma na Kriste ematilweni nakambe va ta va va tsakisile mbilu ya Yehova hi vutshembeki bya vona eka Xikwembu hambi ku yisa eku feni.—Nhlavutelo 2:10.

4. Loko u anakanya leswi u nga ta swi endla hi vutomi bya wena, i mhaka yihi ya nkoka u fanelaka ku yi xiya?

⁴ Kambe ku vuriwa yini hi hina namuntlha, ku katsa na n’wina vantshwa? Xana ma katseka emhakeni leyi ya loko vanhu va ta tshembeka eka Xikwembu kumbe e-e? Kunene ma katseka! (Psalma 147:11; 148:12, 13) Mi nga ha va mi nga swi xiyi, kambe leswi mi swi endlaka hi vutomi bya n’wina swi seketela mhaka ya Xikwembu kumbe ya Sathana. Swi tsakisa Yehova kumbe ku tsakisa Sathana. Hakunene, xirhambo xa Yehova kumbe xikombelo xi nga xiyiwa tanihi lexi nakambe xi kongomisiweke eka wena hi wexe: “Ṅwana nga, tlhariha, u ṭakisa mbilu ya mina, Nḍi ta kuma rito e ku hlamula la’va nḍi rukanaka.” (Swivuriso 27:11) Xana ku tsakisa mbilu ya Muvumbi wa wena a hi yona pakani leyi anerisaka ku va u ri na yona?

Lexi Endlaka Leswaku Byi Va Vutlhari

5. Ha yini a ku ri vutlhari ku tsakisa mbilu ya Yehova?

⁵ Xiya leswaku Yehova wa khutaza, “Tlhariha. ” Ha yini hi tlharihile loko hi tsakisa mbilu ya Yehova? Hi leswi Yehova a nga Tatana wa rirhandzu loyi a hi lavelaka swo antswa ntsena, kutani xin’wana ni xin’wana lexi a hi kombelaka ku xi endla hi lexi xi hi tiselaka vunene. Tanihi leswi Esaya 48:17, 18 yi nge: “Hi mina Yehova, Šikwembu ša wena I’a ku dyonḍisaka, a ku pfuna, a ku fambisa e ndleleni leyi u faneleke ku famba ha yona. Mawako! loko ngi u yingisa milawu ya mina! Ku rula ka wena ku ta v̌a tani hi nambu, ku lulama ka wena ku ta fana ni magandlati ya lwandle.”

6. (a) I yini xi kombaka leswaku Yehova u lava u tsakela vutomi? (b) I mimbuyelo yihi u nga ta ka u nga yi papalati?

⁶ Tanihi mutswari wa rirhandzu, Yehova u lava leswaku u yi tsakela hi xitalo nyiko yakwe yo vangama ya vutomi. Hikwalaho u ri: “Džaha, ṭakela v̌untšha bya wena, mbilu ya wena yi ku ṭakisa hi masiku ya vuntšha bya wena, u famba hi ku ranḍa ka mbilu ya wena, ni ku languta ka mahlo ya wena.” Kavula, sweswi lexi, a hi xirhambo xo endla nchumu wun’wana ni wun’wana lowu tsakisaka lowu u wu navelaka. Leswi swi kombisiwa hi xitsundzuxo lexi landzelaka: “Kambe tiv̌a leŝaku Šikwembu ši ta ku av̌anyisa e ka ŝeŝo hikwaŝo.” (Eklesiasta 11:9) Ina, u nga ka u nga yi papalati mimbuyelo ya swiendlo swa wena; Xikwembu xi ta ku avanyisa hi leswi u swi endlaka. Nawu wu tiyile lowu nge: “Xin’wana ni xin’wana lexi munhu a xi byalaka, ú ta tshovela xona.”—Vagalatiya 6:7.

7, 8. (a) Xana u nga susa tingana ni ku biha hi ndlela yihi? (b) Hi rini laha vuntshwa ni masungulo ya vutomi swi nga vuhava?

⁷ Hikwalaho ka leswi, Yehova wa engetela: “Susa tingana [kumbe ku vilela] e mbilwini ya wena, u yisa ku biha kule ni nyama ya wena; hikuv̌a v̌untšha ni v̌uronga i ŝa hav̌a!” (Eklesiasta 11:10) Hakunene, i vutlhari ku papalata mintirho leyi nga ta ku vangela swiphiqo endzhaku. Oho, ku ta va ni lava va nga ta ku wa kayela—leswaku ‘hakunene a wu tikhorwisanga hi vutomi loko u nga dakwi, u nga endli vunghwavava, kumbe ku endla nchumu wun’wana wo tano lowu “lavaka xivindzi.” Kambe va hungukile swonghasi! “Hakunene a swi nga pfuni nchumu,” hi ku vula ka xichudeni lexintsongo endzhaku ko endla vumbhisa. “A ndzi vilela ku sukela kwalaho.”

⁸ Kutani n’wina vantshwa, hi vutlhari hlayisani ndzayo ya Xikwembu yo susa etimbiIwini ta n’wina xivangelo xihi na xihi xa ku vilela kumbe ku tisola, xo tanihi lexi tokotiweke hi vantshwa lava hlongoriseke leswi nga chavisiki kumbe ndlela ya vutianakanyi ya vutomi. Mutsali wa switsalwana wa lembe xidzana ra vu-17 u xiyile: “Xiphemu lexikulu ngopfu xa vanhu va tirhisa malembe ya vona yo sungula ku onha layo hetelela.” I ntiyiso, kambe swi vanga gome swonghasi! Loko muntshwa a beta mintamu ni vuswikoti byakwe ni ndlela leyi endlaka malembe ya le ndzhaku ya vukulu ya nonon’hwa, vuntshwa ni masungulo yakwe ya vutomi hakunene i vuhava! (Swivuriso 22:3) Kutani tlhariha! Landzela ndzayo leyi yaka emahlweni: “Anakanya Muv̌umbi wa wena hi masiku ya v̌untšha bya wena.”—Eklesiasta 12:1.

9. I mimbuyelo yihi u nga ta yi tsakela hi ku tsundzuka Yehova evuntshweni bya wena?

⁹ Hi ku tsundzuka Yehova evuntshweni bya wena, hakunene u ta vuyeriwa. U nga ka u nga papalati tingana ni makhombo yo nonon’hwa ntsena kambe sweswi u ta tiphina hi vutomi lebyi tsakisaka ni lebyi vuyerisaka eku tirheleni ka Muvumbi wa wena. Nakambe, u ta va hi vutlhari u tihlayisela xuma lexi nga ta ku vuyerisa hi laha ku nga heriki etilweni. (Matewu 6:19-21) Loko u tsundzuka Yehova sweswi hi ku endla ku rhandza ka yena, u ta ku tsundzuka kutani a ku hakela hi “le’si naveriwaka hi mbilu ya wena,” ina, vutomi lebyi heleleke byo tsakisa eParadeyisini hi masiku!—Psalma 37:4; 133:3; Luka 23:43; Nhlavutelo 21:3, 4.

U Titwa Njhani Hi Yehova?

10. (a) Hikwalaho ka yini kungu ra wena ro tirhela Xikwembu ku nga fanelanga ku va ku pfumala ntwisiso wa leswi vutlhari byi vulaka swona? (b) I xikombelo xihi xin’wana Yehova a xi endlaka?

¹⁰ Kambe makungu ya wena yo tirhela Yehova ku nga ka ku nga vi hi ku pfumala ntwisiso wa leswi vutlhari byi vulaka swona. Sathana i nala wo tlhariha swinene lerova loko a ehleketa ntsena hi vuyelo bya wena n’wini, eku heteleleni u ta swi kota ku ku wisela eka mimboyamelo yin’wana ya vutianakanyi a ku susa eku tirheleni ka Yehova. Kutani Yehova a nga ku rhambeli ku tlhariha ntsena. E-e, kambe u tlhela a lava ku tinyiketela ka munhu hi xiyexe eka yena. Yesu u te: “U ta rhandza Hosi Xikwembu xa wena hi mbilu ya wena hinkwayo.” (Matewu 22:37) Xana wa swi tiva leswaku swi vula yini ku rhandza Yehova hi mbilu hinkwayo?

11. (a) Xana swi vula yini ku nyika Yehova mbilu ya wena? (b) Xana ntokoto wa Yosefa wu kombisa ku yini ndlela leyi nsusumeto lowunene wa mbilu wu nga hi susumetelaka ku endla ku rhandza ka Xikwembu ha yona?

¹¹ Mbilu ya wena swi vula xiviri xa wena, minsusumeto ya wena, malangutelo ya wena ni mintlhaveko ya wena yo enta leyi nga ni vuswikoti bya wena byo ehleketa. Xisweswo ku rhandza Yehova hi mbilu ya wena hinkwayo swi vula leswaku u n’wi rhandza swinene ni leswaku ku tlula hinkwaswo evuton’wini i ku hlawula ka wena ku tsakisa mbilu yakwe hi ku n’wi nyika nhlamulo ya ndzhukano wa Sathana. Ku xiyisisa ko tano ka le ndzeni ni matitwelo lama enteke ya rirhandzu ni ku khathalela Xikwembu swi ta ku nyika nsusumeto wa matimba swinene wo endla ku rhandza ka xona, hambi loko swi nga ha tikomba swi navetisa swinene ku endla swin’wana. Muntshwa Yosefa a a ri na rirhandzu ro tano eka Yehova, kutani loko wansati wo xiximeka a te: “Etlela na mina,” Yosefa u hlamurile: “Nḍi nga endlisa ku yini ŝo biha le’ŝikulu ŝonghasi, nḍi dyohela Šikwembu šana?”—Genesa 39:7-9.

12. (a) Xana u komba leswaku u nyikile Yehova mbilu ya wena hi ndlela yihi? (b) Loko u nga si nyika Yehova mbilu ya wena, i swivutiso swihi u fanelaka ku swi xiya?

¹² U komba leswaku u rhandza Yehova hi mbilu ya wena hinkwayo loko u ya eka yena hi xikhongelo kutani u n’wi byela leswaku u lava ku va wa yena, leswaku u lava ku n’wi tirhela hi masiku. Hi ndlela leyi u tinyiketela eka Yehova. Xana u swi endlile leswi? Loko swi nga ri tano, ha yini u nga swi endli? I yini lexi ku sivelaka? Xana u kule ku ringana ku twisisa ni ku tlangela mphikamakaneta leyikulu exikarhi ka Yehova na Sathana? Naswona xana wa swi lava ku tsakisa mbilu ya Yehova? Kunene Sathana a nga swi lavi leswaku u rhandza Yehova hi mbilu ya wena hinkwayo. U lava leswaku hi vutianakanyi u “endla swilo swa wena,” u titsakisa. I mani u nga ta n’wi tsakisa, Yehova kumbe Sathana? Xiyisisa leswi swinene.

13. Loko u tinyiketerile ni ku khuvuriwa, i swivutiso swihi u fanelaka ku tivutisa swona?

¹³ Loko u tinyiketerile eka Xikwembu naswona u kombise leswi hi nkhuvulo wa mati, xana ndlela ya wena ya vutomi yi kombisa leswaku mbilu ya wena hakunene i ya Xikwembu? Xana mintsako ya wena ni rirhandzu swi talele kwihi? eku kumeni ka movha lowuntshwa? eku endleni ka mali yo xava swiambalo kumbe swilo swin’wana swa munhu hi xiyexe? I timhaka ta mani leti taka ku sungula—ta wena kumbe ta Yehova? Xana hakunene u amukerile xikombelo xa Yehova xo n’wi nyika mbilu ya wena?

14. (a) I nchumu wihi wa nkoka vantshwa va nga na wona? (b) Hikwalaho ka yini swi vanga gome loko muntshwa a nga tsundzuki Muvumbi wa yena?

¹⁴ Hambi leswi lavakulu va nga ni mintokoto yo tala futhi hakanyingi ni vutlhari byo tala, vantshwa va na nchumu wa nkoka lowu va nga wu tirhisaka ku tsakisa Xikwembu. Bibele yi ri: “Ku kwetsima ka la’vantšha i matimba ya v̌ona.” (Swivuriso 20:29) Kutani tirhisa matimba wolawo sweswi. Tsundzuka Muvumbi wa wena “ku nga si ta masiku ya khombo” ya vudyuhari, loko miri wu tsana ni swirho swa wena swi helela hi ntamu kutani swi hluleka ku tirha hi laha ku faneleke. Swi vavisa mbilu swonghasi eka munhu loyi a hlulekeke ku tsundzuka Muvumbi wa yena evuntshweni byakwe kutani evudyuharini a va hava nchumu lowu a nga tidzunisaka ha wona eka Xikwembu! I “v̌uhav̌a bya ŝahav̌a!” (Eklesiasta 12:1-8) Hikokwalaho, hi vutlhari, anakanya Muvumbi wa wena loko wa ha ri na matimba ni ntamu. Aka rhekhodo ya ntirho wo tshembeka eka Xikwembu, lexi nga ta ku tsundzuka hi ku avanyisa ka vunene, ina, evuton’wini lebyi nga heriki.—Vaheveru 6:10-12; Eklesiasta 12:13, 14.

Va Tsakisile Mbilu Ya Xikwembu

15. I swikombiso swihi swa Bibele swi nga kona swa vantshwa lava tirhiseke ntamu wa vona entirhweni wa Xikwembu?

¹⁵ Bibele yi tele hi swikombiso swa vantshwa lava tirhiseke ‘vuxongi’ bya vona —matimba ya vona—entirhweni wa Xikwembu. A ku ri “madžaha” lava anghwetlaka ni ku gingirika lava hloleke Tiko ra Xitshembiso. (Yošua 6:22, 23; 2:15, 16, 23) Davhida, loko a ri na 20 wa malembe ntsena, u rhume “madžaha ya khume” va ri na rungula ro ya kombela tintswalo eka Nabal. (1 Samuel 25:4, 5) Loko Vayuda ehansi ka Mufumi Nehemiya va pfuxetile makhumbi ya Yerusalema loko va ri ehansi ka nxungeto wo hlaseriwa, i vamani lava endleke ntirho lowu nga ni khombo, wo tika? Nehemiya u hlamuserile: “V̌anhu v̌aṅwanyana v̌a mina [va majaha] v̌a tira mitiro, v̌aṅwanyana v̌a yima v̌a tamele matlhari, ni ŝitlhangu, ni misev̌e, va ri ni ŝisirelelo ŝa ŝifuv̌a.” (Nehemia 4:16) Naswona loko Xikwembu xi dlaye Ananiya ni nsati wakwe Safira hi ku va va hembile, “majaha” ma va rhwarile kutani ma ya va lahla.—Mintirho 5:5, 6, 10.

16. Hi le ka ntirho wihi wa moya laha vantshwa enkarhini lowu hundzeke va hlanganyeleke eka wona?

¹⁶ Hakunene, swi tsakisa mbilu ya Yehova loko vantshwa va kota ku endla ntirho wihi na wihi lowu lavekaka hi nkarhi wolowo. Kambe vantshwa va katsekile eka ntirho wa moya lowu a wu lava matimba yo tala ya miri ni ntamu. Elihu u pfumerile, “Nḍi šihlangi hi malembe.” Hambi swi ri tano, Yehova u n’wi tirhisile ku lulamisa Yobo. (Yobo 32:4-6) Samuyele a a ri “wanḍisanyana” ntsena loko a sungule ku tirha etabernakeleni ya Yehova eXilo. (1 Samuel 2:18) A ku ri “wanhwanyana” loyi, hambi loko a ri hlonga endlwini ya Namani, hi xivindzi a twariseke leswi muprofeta wa Yehova a swi endleke. (2 Tihosi 5:2-4) Loko Yehova a hlawule Yeremiya tanihi muprofeta, Yeremiya u te: “Nḍa ha ri šihlangi.” (Yeremia 1:5, 6) “Madžaha la’ya mune lawa”—Daniyele ni vanghana vakwe vanharhu va Vaheveru—mawaku malandza ya Yehova lama xiyekaka lawa a va ri wona evuhlongeni bya Babilona! (Daniel, tindzima 1 na 3) Ntukulu wa Pawulo, wa “jaha,” hi xivindzi u pfune kokwa wakwe. (Mintirho 23:16-22) Kutani a ku ri na mufana Timotiya, loyi ku sukela evuhlangini a a tiva matsalwa yo hlawuleka ni ku tirhisa vuntshwa bya yena entirhweni wa Yehova.—2 Timotiya 3:15; Vafilipiya 2:19-23; 1 Vakorinto 4:17.

Ku Tsakisa Mbilu Ya Yehova Namuntlha

17. Hikwalaho ka yini namuntlha hi fanela ku rindzela ku kuma vantshwa lava tsakisaka Yehova, nakona swi tano ke?

¹⁷ Naswona a hi vantshwa va nkarhi lowu nga hundza ntsena lava tsakiseke mbilu ya Yehova hi ntirho wa vona wo tshembeka. “‘Hi masiku ya makumu, ndzi ta chela Moya wa mina ehenhla ka vanhu hinkwavo, ku vula Xikwembu; vana va n’wina va xinuna ni va xisati va ta vula Rito; vana va n’wina va majaha va ta vona mahlori; ni lavo dyuhala va n’wina va ta lorha milorho.’” (Mintirho 2:17; Yoel 2:28) Kutani sweswi hi fanele ku rindzela ku kuma vantshwa vo tala va Vakriste emasikwini lawa ya makumu lava tsakisaka Yehova. Futhi swi tano! Hambi loko vantshwa va Timbhoni va swi endla swihoxo, tanihi loko ku ri hava eka hina loyi a nga hoxiki, vo tala va endla kahle tanihi Vakriste. Va tikarhatela ku tsakisa mbilu ya Yehova.—Swivuriso 27:11; 3:1, 2.

18, 19. I ntirho wihi wu lavaka ku endliwa namuntlha, naswona ha yini vantshwa va wu fanela kahle?

¹⁸ Emasikwini lawa ya makumu, ku rhandza ka Yehova hi leswaku vumbhoni bya xirhendzevutana lexikulu xa misava hi ta Mfumo wa yena byi nyikeriwa, leswi katsaka matshalatshala lamakulu. (Matewu 24:14) Tiholo ta Mfumo ta vugandzeri ti fanele ku akiwa, kun’we ni miako leyikulu ya tinhlengeletano ta swifundza. Ematikweni yo tala, ku laveka tindhawu to tala ta tifektri to gandlisa tibuku ta Bibele, kun’we ni tindhawu leti engetelekeke ta makaya ya Bethele. Ku lunghiselela miako leyi yintshwa ku laveka ntirho wa vuaki wo tika, naswona tanihi le ku akiweni ka makhumbi ka siku ra Nehemiya, vantshwa lava nga ni matimba ni ntamu va endla ntirho wo tala.

¹⁹ Nakambe vantshwa vo tano va endla xiphemu lexikulu xa ntirho wa mavoko lowu lavaka ku gandlisa, ku boha ni ku rhumela magidi ya tithani ta tibuku ta Bibele lembe na lembe. Kahle-kahle, eyindlu-nkulu ya Timbhoni ta Yehova aNew York, ku katsa ni Mapurasi ya Watchtower, ku na vantshwa lava tlulaka 1 400 va malembe ya 25 hi vukhale ni lavantsongo. Naswona ntirho wa vona a wu heleli eka ntirho lowu va wu endlaka exikarhi ka vhiki; hi mahelo-vhiki va hlanganyela entirhweni wo chumayela hi yindlu na yindlu ni le minhlanganweni ya Vukriste ni mabandlha ya ka vona. Mawaku ndlela leyi va tsakisaka mbilu ya Yehova ha yona!

20. (a) I xiphemu xihi lexi vantshwa va nga na xona evutirhelini bya vuphayona? (b) I swivutiso swihi leswi vantshwa lava nga riki evutirhelini bya nkarhi hinkwawo va faneleke ku tivutisa swona?

²⁰ EUnited States, lava tirhisanaka ni vantshwa lava hi van’wana lava tlulaka 12 700 va ntlawa wa vukhale lebyi fanaka lava tirhaka tanihi vatirheli va maphayona ya nkarhi hinkwawo. Eswiphen’wini swin’wana swa misava, makume man’wana ya magidi ya vantshwa va phayona. Loko u ri muntshwa loyi a nga si va ka mutirheli wa nkarhi hinkwawo, xana u nga tivekela tipakani ha wexe leti ti nga ta rhangisa Yehova evuton’wini bya wena, ku ri na ku ringeta ku kuma ntirho wo tihanyisa lowu hakelaka swinene, kutani u teka kumbe ku tekiwa se u va na ndyangu? Xana wa yi twisisa mphikamakaneta leyikulu ya misava hinkwayo? Xana hi ntiyiso wa swi navela ku vona vito ra Muvumbi wa hina Lonene ri susiwa ndzhukano hinkwawo? Loko swi ri tano, xana a swi fanelanga leswaku u endla hinkwaswo leswi kotekaka entirhweni wa Yehova? Naswona xana sweswo, eka van’wana vo tala va n’wina, a swi katsi ku ya pfuneta mi tirha emakaya ya Bethele kumbe ku tirha eka ntirho wa vuphayona?

21. (a) I xirhambo xihi xa Yehova lexi u faneleke ku xi hlamula, naswona hi ndlela yihi? (b) Hikwalaho ka yini hi nga tiyisekaka leswaku vo tala va vantshwa va ta hlamula xirhambo xa Yehova tanihi leswi Esaya a endliseke swona?

²¹ Yingisani! Yehova wa mi rhamba, ina, u mi kombela ku n’wi nyika nhlamulo ya mindzhukano yo biha ya Sathana. Xana wena, tanihi Esaya, u twa Yehova a vutisa a ku: “Nḍi ta ruma mani, i mani l’a nga ta famba e maṭhaṅweni ya hina?” Ha yini u nga tlharihi kutani u hlamula hi laha Esaya a endleke ha kona: “Hi mina loyi, nḍi rume.” (Esaya 6:8) Ha tiyiseka leswaku vo tala va n’wina vantshwa mi ta hlamula hikuva Rito ra Xikwembu ra tshembisa: “Tiko ra wena ri ta v̌a le’ra mapfunḍa siku u hlengeletaka nyimpi ya wena. . . . Lav̌antŝha v̌a ta huma ka wena, Kukotisa mbera le’yi humaka e v̌ušeni.” (Psalma 110:3; 148:12, 13) Kutani loko mi hlamula, mi nga va ni ntsako wo tiva leswaku Yehova wa xiya ni ku swi amukela leswaku mi tsakisa mbilu ya yena!

BOKISI RA MPFUXETO

◻ Hikwalaho ka yini ndlela leyi hi hanyaka ha yona yi ri ya nkoka eka Yehova?

◻ Hikwalaho ka yini byi ri vutlhari ku tsakisa mbilu ya Yehova?

◻ Hi nga kombisisa ku yini leswaku hi nyike Yehova mbilu ya hina?

◻ I vamani lava khale va tsakiseke mbilu ya Yehova, naswona hi ndlela yihi?

◻ I vamani lava tsakisaka mbilu ya Yehova namuntlha, naswona njhani?

[Rito leri tshahiweke eka tluka 17]

Loko vantshwa va tlula milawu ya Xikwembu, va tshovela mimbuyelo yo vava endzhaku

[Xifaniso eka tluka 18]

Vantshwa va tsakisile mbilu ya Yehova hi ku pfuneta ku pfuxa makhumbi ya Yerusalema