Xiviko Xa Vahuweleri Va Mfumo

Ntiyiso Wa Bibele Wu Tisa Vun’we Bya Ndyangu Ni Ntsako

MPATSWA lowu tekaneke elndiya lowu a wu ri swirho swa Kereke ya Vujagana a wu tshamela ku holova. Hakanyingi nuna wa kona a a himetela nsati wakwe. Va ringete ni ku dlayana! Eka khamba rin’wana nsati u virise phehlwa (rivomba ra ntswamba) ivi a ri tisa eka yena onge hi loko ku ri tiya kambe endzhaku a n’wi chela hi rona exikandzeni xakwe. Eku heteleleni, wansati u kunguhate ku tisunga.

Xana xi kona lexi nga tisaka vun’we ni ntsako eka mpatswa lowu? Vo tala a va ta ku doo. Kambe emahlweni ko tisunga, wansati u ye a ya endzela n’wana wakwe wanhwana ni mukon’wana. A va endla dyondzo ya Bibele ni Timbhoni ta Yehova. U kunguhate ku yingisela, naswona mbilu yakwe yi susumetiwe swinene hi leswi a swi tweke. Endzhaku ka dyondzo, u byele Timbhoni hi ta swiphiqo swa yena. Va n’wi kombe eBibeleni leswi vutihlamuleri byakwe a byi ri swona hakunene tanihi wansati. Wanuna na yena u endzeriwile naswona dyondzo ya Bibele yi sunguriwile na yena. Vuyelo-ke? Hi ku tirhisa ka nuna ni nsati milawu ya Bibele, swiphiqo swa ndyangu wa vona swi hluriwile. Sweswi mpatswa lowu wu endle nhluvuko ku fika eyinhleni yo nyikela vutomi bya wona eka Yehova, naswona va khuvuriwile.

Mimpatswa yin’wana leyi nga hlayekiki yi kume leswaku Rito leri huhuteriweke ra Xikwembu ri ni ntlhantlho wa swirhalanganya swa ndyangu. Hi ku tirhisa xitsundzuxo xa yona, xo fana ni lexi xi kumekaka eka Vakolosa 3:12-14 na Vaefesa ndzima 5, va hlula swirhalanganya leswi kutani va kuma vun’we ni ntsako.

◻ Xikombiso xin’wana xa ndlela leyi ntiyiso wa Bibele wu nga hlanganisaka ndyangu ha yona xi huma eLibanon. Hi 1973 un’wana wa Timbhoni ta Yehova u sungule dyondzo ya Bibele ni ndyangu exidorobanini. Vanhwanyana vambirhi, vamakwavo, lava humaka kwalaho na vona va ve kona edyondzweni leyi. Kambe loko muprista wa kwalaho a kanete dyondzo leyi, ndyangu wu tshikile. Vanhwanyana vambirhi va hambetile va dyondza hi ku tsalelana mapapila, va tirhisa adirese ya mihariva wa vona. Endzhaku ka loko va dyondze mapapila lama humaka eka Mbhoni, va ya nyike mihariva wa vona leswaku a ya hlaya, hambi leswi nuna wakwe hi nkarhi wolowo a a kaneta. Loko va ri ni swivutiso, va vutise Mbhoni hi papila.

Hambi swi ri tano, makwavo wa vona wa xinuna u hambetile a kaneta. U handzule tibuku ta Bibele leti vamakwavo va xisati ni nsati a va ri na tona ivi a hisa ni Tibibele ta vona. Kambe ku nga khathariseki ku xopa-xopa swihoxo loku vavisaka ka ndyangu, muprista ni van’wana edorobeni leri, vanhwanyana lava va hambetile va dyondza. Hi nkarhi lowu faneleke, va khuvuriwile. Maxaka man’wana na wona ma sungule ku dyondza Bibele ivi ya khuvuriwa. Makwavo wa xinuna loyi a kanetaka wa vanhwanyana lava vambirhi na yena u dyondze ntiyiso naswona u khuvuriwile. Sweswi u tirha tanihi nandza wa vutirheli ebandlheni, naswona i phayona leri pfunaka nkarhi na nkarhi. Eku heleni ka 1985, 23 wa swirho swa ndyangu lowu a wu dyondza ntiyiso naswona swi khuvuriwile!

I ntsako muni wonghasi lowu vamakwavo lava vambirhi va nga na wona hikwalaho ko namarhela ntiyiso ku nga khathariseki nkaneto! Mayana ntsako wa vona wo vona vun’we ni ntsako wa ndyangu wa vona hikwalaho ka ku amukela ka vona ntiyiso wa Bibele! Swi tiyisekisa marito ya mupisalema loko a te: “Ku katekile tiko leri Yehova a nga Šikwembu ša rona!”—Psalma 144:15.

◻ Kambe ntokoto wun’wana wu huma eNew York City, U.S.A. Munhu loyi u sungule ku tirhisa mahlungu loko a ri ni 13 wa malembe hi vukhale naswona ya n’wi gondzombele ngopfu lerova a nga swi koti ku dya ku kondza loko a dzahe mbangi! Mukhuva lowu wa khokhayini wu durha R200 hi siku, naswona loko a ri karhi a xavisa mahlungu minkarhi hinkwayo a a rhwala swibalesa swimbirhi swa voko. U catile ivi a va tatana wa mune wa vana. Loko nsati wakwe a ve un’wana wa Timbhoni ta Yehova, u n’wi kanetile. Kambe eku heteleleni u phirhiwe hi mahanyelo yakwe yo va ehenhla ni ku “tsutsuma-tsutsuma eswitarateni,” a endla vuoswi.

Hi xikhutazo xa nkarhi na nkarhi lexi humaka eka nsati wa yena ni mpfuno wa rirhandzu lowu humaka eka vakulu, u pfumerile ku dyondza Bibele endzhaku ka loko nsati wakwe a vile ni lembe a khuvuriwile. Leswi swi n’wi pfune ku hambana ni swirhalanganya leswikulu leswi katsaka ni mihahamu. U endle nhluvuko ku fika eyinhleni yo khuvuriwa naswona sweswi u ni ntsako wo vona ndyangu wakwe wu hlangane hi ntsako naswona vana vakwe va mune va endla nhluvuko entiyisweni. Hikwalaho ka leswi va nga ni ntirho lowu tiyeke ni muholo lowunene, yena ni nsati wakwe va languta emahlweni eku hlanganyeleni entirhweni wa vuphayona lebyi pfunaka.

[Rito leri tshahiweke eka tluka 21]

“Ku katekile tiko leri Yehova a nga Šikwembu ša rona!”—Psalma 144:15