Swivutiso Swa Vahlayi

◼ Xana Mukriste loyi a nga ni mintshembo ya la misaveni a nga vuriwa xiphemu xa “ntshungu lowukulu” sweswi, hi mhaka ya leswaku a nga si ponaka “nhlomulo lowukulu”?—Nhlavutelo 7:9, 14.

Ina, leswi swi fanerile hi mhaka ya ku langutela ka yena.

Nhlavutelo ndzima 7 yi boxa mintlawa mimbirhi. Wo sungula i 144 000 lava “va huma etinxakeni hinkwato ta Vaisrayele va ri lava funghiweke.” (Nhlavutelo 7:4) Hi ku ringanisa Nhlavutelo 14:1-5 yi komba leswaku 144 000 yi “kutsuriwe emisaveni,” leswaku va va “mihandzu yo sungula leyi humeseriwaka Xikwembu.” Hikwalaho, lava, hi lava va nga ta fuma etilweni na Kriste. (Vagalatiya 6:16; 2 Timotiya 4:18) Ntlawa wa vumbirhi i “ntshungu lowukulu wa vanhu, lava ku nga pfumaleka ni munhu ni un’we la koteke ku va hlaya,” lava “humaka eku xanisekeni lokukulu.”

Eku sunguleni ka yona, Nhlavutelo 7:9-17 yi hlamusela vaponi va la misaveni va nhlomulo lowu taka. Kutani un’wana loyi a laveke ku tikisa a nga tirhisa marito lama nge “ntshungu lowukulu” eka vanhu lava poneke nhlomulo wolowo ntsena. Kambe xana swa fanela ku tikisa hi ndlela yo tano? A hi pfumeli tano. Kahle-kahle, lava va nga ta pona va fanele ku va va hlengeletiwile emahlweni ka “nhlomulo lowukulu” leswaku va nga fanelekela ku pona. Xisweswo hi tirhise xiga lexi nge “ntshungu lowukulu” eka Vakriste lava tshembekaka lava eka nkarhi wa sweswi va tirhelaka Yehova Xikwembu va ri ni malangutelo yo pona ni ku ‘yisiwa eswihlobyeni swa mati ya vutomi’ emisaveni. (Nhlavutelo 7:17) Loko un’wana wa “ntshungu lowukulu” a nga fa sweswi, emahlweni ka “nhlomulo lowukulu,” ku na xivangelo lexi tiyeke xo rindzela ku va a pfuxeriwa vutomi emisaveni.

Tinhla leti fananaka ti nga endliwa mayelana ni xiga lexi nge “tinyimpfu tin’wana.” Eka Yohane 10:7-16 Yesu u vulavule hi “tinyimpfu” takwe ro sungula, leti hi twisisaka leswaku i “ntlhambinyana” lowu yimeleke vutomi bya le tilweni. Masala-ndzhaku Yesu u te: “Ndzi ni tinyimpfu tin’wana leti nga riki ta tshanga [ra le tilweni] leri; na tona ndzi fanele ku ti vuyisa; ti ta yingisa rito ra mina, kutani ti ta endla ntlhambi wun’we, ti va ni murisi un’we.” Hakanyingi hi nyikerile vumbhoni bya Matsalwa lebyi hlamuselaka “tinyimpfu tin’wana” tanihi leti ku langutela ka tona ku nga vutomi bya la misaveni.—Luka 12:32.

Un’wana a nga ha ku: Yesu a a kombetela eka ku hlengeletiwa ka nkarhi lowu taka ka “tinyimpfu tin’wana,” kutani xiga lexi xi tirha ntsena eka lava, endzhaku ka loko Yesu a vulavurile, a va ta amukela ntshembo wa Bibele wa vutomi lebyi nga heriki emisaveni. Hambi swi ri tano, swi vonaka swi nga faneli ku hlamusela xiga lexi hi mukhuva wolowo, tanihi loko onge Yesu a a hlamusela timhaka hi nandzelelano kumbe hi ku siyisana. Hi tshemba leswaku a a tiyisa leswaku i murisi wa tinyimpfu leti hlanganeke. Vanhu van’wana vo fana ni tinyimpfu va ta etshangeni leswaku va ya etilweni. Nakambe ku na tinyimpfu tin’wana leti ti nga ta n’wi amukela tanihi murisi; leti ti nga ta va ni vun’we ni leti ti hlamuseriweke ku sungula. Hi ku va ni langutelo leri, xiga lexi nge “tinyimpfu tin’wana” xi katsa vavanuna va ripfumelo lava feke Yesu a nga si pfula ndlela yo ya etilweni, tanihi Nowa, Abrahama, Yobo, Davhida na Yohane Mukhuvuri. (Matewu 11:11; Mintirho 2:29; Vaheveru 10:19, 20) Loko lava va pfuxiwa emafambiselweni lamantshwa ya swilo, va nga amukela Murisi Lonene kutani va va ni ku langutela ka vutomi lebyi nga heriki emisaveni ni “tinyimpfu tin’wana” hinkwato ta Yesu.