Ku Pfuxiwa Ka Yesu Kriste—A Hi Xitori

XANA mhaka ya Bibele ya ku pfuxiwa ka Yesu ku nga va ku ri ku hembetela kunene ke? Sweswinyana International Herald Tribune yi vike ehenhleni ka ndzavisiso lowu endliweke hi mutsari wa Muyuda la vuriwaka Pinchas Lapide. Hi wahi makumu ya yena ke? Ku pfuxiwa ka vafi a ku nga ri xitori.

Swilo swo hlayanyana swi yise Lapide eka makumu lawa. Hi xikombiso, timhaka ta Evangeli ti vula leswaku vavasati vanharhu va endzele sirha ra Yesu ivi va vona leswaku a ri nga ri na nchumu. Kambe eminkarhini ya khale, vavasati a va “xiyiwa va ri hava vumbhoni lebyi tiyeke,” ku vula xiviko xa Tribune. Hakunene, vadyondzisiwa va Yesu hi byakwe a va nga va tshembi vavasati lava! Xisweswo swi vonaka swi nga ri ntiyiso leswaku mhaka yo tano yi nga va yo hembetela hi laha ku heleleke.

Lapide u tlhele a vulavula hi ku tsema nhlana loku ku pfuxiwa ka Yesu ku veke na kona eka vadyondzisiwa va Yena. Ntlawa wa vanuna lava nga hava ntiya-nhlana lerova va landzula Yesu eku khomiweni ka yena, wu “hundzukile hi vusiku byin’we wu va vandla leri tiyisekaka ra varhumiwa, leri tshembaka ku ponisiwa.” Ku vika Tribune ehenhleni ka ku anakanyisisa ka Lapide, “Xivono kumbe norho a swi anelanga ku hlamusela ku hundzuka ko tano lokukulu.”

Xo hetelela, ku ni xihehlo xa leswaku vadyondzisiwa va Yesu va yive miri wa yena. Eka leswi, Mr. Lapide wa hlamula a ku: “Xana vakanganyisi va nga pfumelela ku yinga-yingisiwa ni ku xanisiwa hikwalaho ka vuxisi, ku kondza loko va dlawela ripfumelo hi ntsako ke? Hambi leswi Mr Lapide a nga kombisiki ripfumelo eka Yesu tanihi Mesiya, u ni ku kanakana kuntsongo ka leswaku leswi swi huweleriweke hi ntsumi hi magidi mambirhi ya malembe lama hundzeke a wu ri ntiyiso: ‘Kriste u pfuxiwile.’—Matewu 28:6.