Xiviko Xa Vahuweleri Va Mfumo
Tinhlengeletano Ta “Vahlayisi Va Vutshembeki” ePhilippines
Nxaxamelo wa 1985 wa tinhlengeletano ta 23 ta “Vahlayisi Va Vutshembeki” leti khomeriweke ePhilippines wu humelele hi ndlela yo hlamarisa eka hinkwaswo. Ntsengo lowu hlanganisiweke wa lava veke kona va 213 734, ku engeteleka ka 27 wa tiphesente eka figara ya n’waxemu, a ku ri ku tlula ntsengo wa nhlayo ya vahuweleri va tiko kambirhi ni hafu. Leswi swi komba leswaku ku na vanhu vo tala lava tsakelaka lava vaka kona emintsombanweni. Nakambe, ku khuvuriwile 2 223, ku nga 14,5 wa tiphesente ku tlula n’waxemu.
Le Tuguegarao, eCagayan, a ku rindzeriwe leswaku ku ta va ni 12 000 lava nga ta va kona entsombanweni, kambe ku tile 24 327! Xitichi xa xiya-ni-moya xi vile ni nongonoko wa ku vulavurisana ni vamakwerhu ka timinete ta 30, leswi handle ko tilumaluma swi endleke leswaku lava va veke kona va tala. Loyi a a vulavurisana na vona u vutise leswi hi swi kotisaka swona ku hlayisa ku rhula ni ntirhisano emintsombanweni ya hina. U hlamuseriwe leswaku swirho hinkwaswo swa nhlengeletano ya hina swi ringeta ku hlakulela mihandzu ya Bibele ya rirhandzu ni ku rhula. Kutani loko hi va ni ntsombano wo tanihi lowu, ku hava ku holova. Muvutisi u hlamarile kutani a ku: “Nhlengeletano ya n’wina ya hlamarisa swonghasi! Tinhlengeletano tin’wana a ti swi koti ku endla leswi. Nkarhi na nkarhi loko va ri ni ntshungu wo fana ni lowu, minkarhi hinkwayo ku va ni swiendlo swo biha.”
Eka ntsombano wolowu, mudyondzisi eYunivhesiti ya Tiko ra Cagayan u te: “Lava veke kona a va tele; varhumiwa a va ri lava leteriweke kahle; a ku ri ni ntirhisano exikarhi ka vona; va kombise ku tinyikela loku heleleke evutirhelini. Hambi leswi a ku ri ni nhlayo leyikulu ya varhumiwa, a ku ri ni xivandla lexikulu; a ku ri ni ku rhula naswona a ku humelelanga swilo swo biha, leswi kombaka ntsena leswaku Timbhoni ta Yehova eka vukhongeri ti tirhisa leswi ti swi dyondzeke eMatsalweni.”
Muxavisi wa swakudya eRizal Memorial Stadium eManila hi nkarhi wa ntsombano u te: “Ndzi tsakisiwa hi malunghiselelo ya nhlengeletano ya n’wina. Sosayiti ya n’wina yi hlelekile, naswona ndza sungula ku vona ku hleleka ka muxaka lowu ka Timbhoni hikuva hi kona sweswi ntsena ndzi voneke nhlengeletano yo fana ni leyi.”
Entsombanweni wa Doroba-nkulu ra Calbayog, vahuweleri va 7 va ve kona va huma eka ntlawa lowu nga ekule naswona va te ni vanhu va 14 lava tsakelaka. Hi ku tlangela xilaveko xo va kona eka nkhuvo lowu wa moya, ndyangu wun’wana wo huma ePalawan wu tirhise tiphesente leti nga vaka 20 ta mali ya vona leyi va yi kumaka hi lembe leswaku wu va kona eMutini wa Puerto Princesa.
Varhumiwa vo tala lava humaka ematikweni mambe lava yeke entsombanweni wa Manila, ni lava nga vaka tiphesente ta 80 ta vona a va ri entirhweni wa nkarhi hinkwawo. A swi kufumeta mbilu ku vona hi laha vamakwerhu va khutaziweke ha kona hi drama leyi nge Vumundzuku Bya Wena—Mphikamakaneta, leyi vulaveleke hi ntirho wa nkarhi hinkwawo. EDorobeni ra lloilo, vanhu vanharhu lava a va tlanga drama leyi va susumetiwile swinene loko va ri karhi va endla mimpfuxeto lerova va rhumela swikombelo swa vuphayona bya nkarhi hinkwawo ni nhlengeletano yi nga si sungula. EDorobeni ra Ormoc, mutshami wa xitulu wa ntsombano u hlamusele leswaku endzhaku ka drama, vahuweleri va tsevu va kombele swikombelo swa vuphayona bya nkarhi hinkwawo.
Kunene moya wa Yehova wu susumetela vanhu vakwe ku ‘tinyikela hi ku swi rhandza’ emasikwini lawa ya makumu. (Psalma 110:3) Mintsombano ya “Vahlayisi Va Vutshembeki” ePhilippines yi va khutazile swinene vamakwerhu ni vanhu lava tsakelaka kona.