Vutomi Ni Vutirheli Bya Yesu

Dyondzo Leyi Tivekaka Swinene Leyi Tshameke Yi Nyikeriwa

XIVONO lexi hi lexi tsundzukekaka swinene eka matimu ya Bibele: Yesu u tshame etlhelo ka ntshava, a nyikela Dyondzo yakwe leyi tivekaka eNtshaveni. Ndhawu yi le kusuhi ni Lwandle ra Galeliya, kumbexana ekusuhi na Kapernawume. Yesu u hete vusiku hinkwabyo a khongela eka Xikwembu, naswona mixo lowu landzelaka u hlawule vadyondzisiwa vakwe va 12 ku va vaapostola. Kutani, xikan’we na hinkwavo ka vona, u rhelele na vona eripaleni leri ra ntshava.

Kutani sweswi, u nga ha ehleketa leswaku Yesu a a ta va a karhele swinene naswona u ta lava ku etlelanyana. Kambe vunyingi lebyikulu byi tile, van’wana va huma eGaleliya na Yerusalema, vukule bya tikhilomitara ta 100 ku ya ka 110. Van’wana va huma eribuweni ra Iwandle ra Tiri na Sidoni en’walungwini. Va tele ku ta yingisela Yesu ni ku hanyisiwa emavabyini ya vona. Hambi ku ri lava karhatiwaka hi mademona va kona.

Loko Yesu a rhelela, vanhu lava vabyaka va tshinela leswaku va n’wi khumba, kava loko a va hanyisa hinkwavo. Endzhaku ka sweswo, Yesu u vonaka a khandziya endhawini leyi tlakukeke entshaveni. Kwalaho u tshama ehansi kutani a sungula ku dyondzisa vunyingi lebyi tshameke eripaleni emahlweni ka yena. Kutani anakanya ha swona! Sweswi ku hava hambi ku ri munhu un’we eka vayingiseri hinkwavo loyi a xanisekaka hi vuvabyi lebyikulu!

Vanhu va hisekela ku yingisela mudyondzisi loyi a kotaka ku endla masingita lawa yo hlamarisa. Hambi swi ri tano, Yesu u nyikela dyondzo yakwe ngopfu-ngopfu ku pfuna vadyondzisiwa va yena, lava vonakaka va hlengeletane kusuhi na yena swinene. Kambe leswaku hi pfuneka, na hina, hi vambirhi ka vona Matewu na Luka va swi rhekhodile.

Mhaka ya Matewu ya dyondzo yi lehe makhamba ya mune ku tlula ya Luka. Ku tlula kwalaho, swiphemu swa leswi Matewu a swi rhekhodeke Luka u swi humelerisa tanihi leswi vuriweke hi Yesu enkarhini wun’wana evutirhelini byakwe, tanihi loko swi nga xiyiwa hi ku ringanisa Matewu 6:9-13 na Luka 11:1-4, na Matewu 6:25-34 na Luka 12:22-31. Kambe leswi a swi fanelanga swi hlamarisa. Kahle-kahle Yesu u dyondzise swilo leswi fanaka ku tlula kan’we, kutani Luka u hlawule ku tsala tin’wana ta tidyondzo leti hi mavekele lama hambaneke.

Lexi endlaka dyondzo ya Yesu yi va ya nkoka a hi timhaka ta ku enta ka yona ka swa moya ntsena kambe i ku olova ni ku twisiseka loku a andlaleke mintiyiso leyi ha kona. U humese mintokoto leyi tolovelekeke naswona u tirhise swilo leswi tolovelekeke eka vanhu, xisweswo ku endla leswaku mianakanyo yakwe yi twisiseka hi ku olova eka hinkwavo lava lavaka vutomi lebyi antswaka endleleni ya Xikwembu. Eka minkandziyiso ya hina leyi landzelaka hi ta kambisisa swin’wana swa swilo leswi a swi vuleke. Luka 6:12-20; Matewu 5:1, 2.

◆ Xana dyondzo leyi tsundzukekaka swinene ya Yesu yi nyikeriwe kwihi, i vamani lava a va ri kona, naswona ku humelele yini emahlweninyana ka ku yi nyikela kakwe?

◆ Hikwalaho ka yini swi nga hlamarisi leswi Luka a tsalaka tidyondzo tin’wana ta dyondzo hi mavekele man’wana?

◆ I yini lexi endlaka leswaku dyondzo ya Yesu yi va ya nkoka?