Ku Chavelela Loku Humaka Eka Xikwembu Xa Ku Rhula

“Ma nga chavelelana hi marito wolawo.”—1 VATESALONIKA 4:18.

1. Hi swihi swikombelo swa Pawulo leswi kombisaka ku tsakela ka yena ku rhula?

PAWULO, muapostola,a a navela ngopfu leswaku bandlha ra Vukriste ri tsakela ku rhula. Xisweswo, mapapila ya yena ya 13, tanihi leswi hi hlayiseriweke wona eMatsalweni lawa ya huhuteriweke, ya sungula hi xikombelo xa leswaku onge lava ya kongomisiweke eka vona va nga tsakela ku rhula loku humaka eka Xikwembu. Hi xikombiso, eka bandlha leri kulaka eTesalonika, Pawulo wa tsala a ku: “Tintswalo ni ku rhula a swi ve na n’wina.” Eku heteleleni ka papila rolero, wa kombela a ku: ‘Ingi Xikwembu xa ku rhula xona ha xoxe, xi nga mi endla lava hlawulekeke hi matlhelo hinkwawo. Ingi mimoya ya n’wina, ni timbilu ta n’wina, ni miri wa n’wina, swi nga hlayiseka swi basile, swi nga ri na nandzu siku Hosi ya hina Yesu Kriste a vuyaka.”—1 Vatesalonika 1:1; 5:23.

2. (a) I ku khathalela kwihi loku Pawulo a ku kombisaka ehenhla ka bandlha? (b) Xana vakulu va Vukriste namuntlha va nga landzela xikombiso xa Pawulo hi ndlela yihi ke?

² Pawulo ni vanghana va yena a va titsetselelanga eka ‘ku tirha ni ku tikarhata’ exikarhi ka vapfumeri volavo lavantshwa. Pawulo u te: “Hi hanyisene na n’wina hi moya wa musa, kukotisa manana la hlayisaka swinene vana va yena. Hikokwalaho, hi ku navela ngopfu ku mi komba rirhandzu, hi tilunghiserile ku avelana na n’wina ku nga ri ntsena Evangeli ya Xikwembu, kambe na byona vutomi bya hina, hikuva mi hundzukile varhandziwa va hina swinene ngopfu.” Xana hi nga ka hi nga voni ku khathalela lokukulu eka marito wolawo, rirhandzu ra ntiyiso, leri enteke leri Pawulo a veke na rona eka bandlha rero ke? Hakunene, i xikombiso xa muxaka wa rirhandzu leri vakulu va Vukriste va ri kombisaka eka mabandlha lama nga vaka 50 000 ya Timbhoni ta Yehova emisaveni hinkwayo namuntlha.—1 Vatesalonika 2:7-9; Yohane 13:34, 35; 15:12-14.

3. (a) Xana Timotiya u swi kotise ku yini ku pfuna bandlha ra le Tesalonika? (b) Leswi swi fambisana na yini namuntlha?

³ Muringi, Sathana, u tise mahlomulo ehenhla ka Vakriste volavo va le Tesalonika. Kutani Pawulo u rhumele Timotiya eka vona, leswaku a ‘ya va tiyisa ni ku va khongotela eku pfumeleni ka vona.’ Timotiya u tlhelele eka Pawulo eAtena a ri ni xiviko lexi kufumelaka ehenhleni ka ku tshembeka ni rirhandzu ra vona. Hinkwavo a va chaveleriwe ngopfu hi ku tiva ripfumelo ni vutshembeki bya un’wana, naswona va hambetile va kombela Xikwembu hi matimba leswaku va lulamisa ku kayivela kun’wana ni kun’wana. (1 Vatesalonika 3:1, 2, 5-7, 10) Nakambe, leswi swi kombisa lunghiselelo ra le tilweni namuntlha, hi valanguteri lava famba-fambaka va aka mabandlha, hambi laha Timbhoni ta Yehova ti tirhaka ehansi ka ku yirisiwa kumbe ku xanisiwa ko vava.—Esaya 32:1, 2.

‘Eku Fikeni Ka Yena’

4, 5. (a) Hi xihi xikombelo lexi Pawulo a xi endlaka laha, naswona hikwalaho ka yini xi fanela ku va mhaka ya nkoka eka hina sweswi? (b) Hikwalaho ka yini siku ra hina ri ri ra nkoka ngopfu?

⁴ Muapostola Pawulo u dlayelela xiyenge lexi xa papila ra yena hi xikombelo lexi: ‘Ingi Hosi yi nga kurisa ni ku andzisa rirhandzu leri mi rhandzanaka ha rona ni ku rhandza van’wana ha rona, ku fana ni leswi na hina hi mi rhandzisaka swona; hi mukhuva wolowo, yi ta tiyisa timbilu ta n’wina, kutani mi ta pfumala nandzu, mi va lava hlawulekeke emahlweni ka Xikwembu Tata wa hina, siku Hosi ya hina Yesu a nga ta vuya ha rona, swin’we ni vahlawuriwa hinkwavo va yena.”—1 Vatesalonika 3:12, 13.

⁵ Pawulo laha a a languta swinene eka vumundzuku, enkarhini wa ku ‘vuya ka Yesu ni wa ku hela ka mafambiselo ya swilo’ loko ‘N’wana-wa-Munhu a ta hi ku kwetsima ka yena, ni tintsumi hinkwato ti ri na yena.’ Hosi ya hina ya le tilweni yi fike hi 1914. A ri exiluvelweni xa yena xo kwetsima lexi nga vonekiki, Yesu sweswi u avanyisa matiko ni vanhu va misava, u hlawula vanhu lava titsongahataka, lava fanaka ni tinyimpfu leswaku va pona eka “nhlomulo lowukulu” ni ku kuma vutomi lebyi nga heriki emisaveni ya paradeyisi.—Matewu 24:3-21; 25:31-34, 41, 46.

Swileriso Swo Hi Pfuna

6. I xikhutazo xihi xa Pawulo lexi hi faneleke ku xi yingisa sweswi?

⁶ Xana u un’wana loyi a fanelekelaka pakani yoleyo ya vutomi lebyi nga heriki ke? Loko swi ri tano, u fanele ku yingisa leswi Pawulo a swi tsalelaka Vatesalonika laha: “Sweswi ke, vamakwerhu, mi dyondzile eka hina hi laha mi fanelaka ku hanya ha kona, leswaku mi tsakisa Xikwembu, kutani mi hanyile hi mukhuva wolowo. Hikokwalaho, ha mi kombela hi matimba ni ku mi khongotela hi vito ra Hosi Yesu, leswaku mi ya mi kula, mi ri karhi mi hanyisa sweswo. Hikuva mi tiva leswi hi nga mi lerisa swona hi matimba ya Hosi Yesu.” (1 Vatesalonika 4:1, 2) Hi swihi swin’wana swa ‘swileriso’ leswi Pawulo a swi kandziyisaka laha?

7. (a) Hi xihi xileriso xa nkoka lexi xi nyikeriweke laha ke? (b) Loko hi amukele moya wa Xikwembu, hikwalaho ka yini hi nga fanelanga ku honisa ku tivonela ka hina?

⁷ ‘Xileriso’ xo sungula xi vulavula hi mahanyelo lamanene. Pawulo u vulavula hi ku kongoma a ku: “Ku rhandza ka Xikwembu hi loku: Hi leswaku mi endliwa lava tengeke, hi ku fularhela vuoswi hinkwabyo. Un’wana ni un’wana wa n’wina a a tive ku hlayisa miri wa yena hi ndlela leyo tenga ni leyo lulama, ku nga ri hi ku navela loku hisaka, ku fana ni vamatiko lava nga tiviki Xikwembu.” Lexi tsakisaka, hi “tivile” Xikwembu ni N’wana wa xona, Yesu Kriste, naswona hi fanelekela vutomi lebyi nga heriki. A swi ta khomisa gome swonghasi loko ho tipfumelela hi tlheriseriwa endzhaku endzhopeni wa misava wa vunghwavava! Lexi khomisaka gome, van’wana va pone malembe yo tala etikampeni ta nxaniso ni le makhotsweni, kumbe va hete nkarhi wo leha eka ntirho wo chivirika wa vurhumiwa, endzhakunyana va pfumelela Muringi a va khoma va nga ehleketanga nchumu malunghana ni mahanyelo. Loko hi amukela moya lowo kwetsima wa Xikwembu, onge hi nga ka hi nga wu ‘khomisi tingana’ hi mahanyelo yo biha ya rimbewu!—1 Vatesalonika 4:3-8; Yohane 17:3; 1 Vakorinto 10:12, 13; Vaefesa 4:30.

8, 9. (a) ‘Rirhandzu ra vamakwerhu’ i yini ke? (b) Xana hi nga ri hlakulela njhani rirhandzu ro tano, naswona hi ku pfuneka kwihi ke?

⁸ ‘Xileriso’ lexi landzelaka xa Pawulo i xa malunghana ni phil·a·del·phiʹa, ‘ku rhandzana ka vamakwavo.’ (1 Vatesalonika 4:9, 10) Lexi i xikombiso lexi hlawulekeke xa rirhandzu lerikulu, a·gaʹpe, leri Pawulo a tlhelaka a ri bumabumela laha ka ndzimana ya 9, kun’we na ndzima 3, tindzimana 6 na 12. Phil·a·del·phiʹa i rirhandzu lerikulu, ro fana ni leri entiyisweni ri veke kona exikarhi ka Yesu na Petro, ni le xikarhi ka Davhida na Yonathani. (Yohane 21:15-17; 1 Samuel 20:17; 2 Samuel 1:26) Hi xikombiso, ri nga engeteriwa eka a·gaʹpe eku akeni ka vunghana bya le kusuhi, hi laha swi voniweke ha kona eka ntsako lowukulu wa xinakulobye lowu Timbhoni ta Yehova to tala ti wu kumaka evutirhelini bya vuphayona ni ntirho wun’wana wa le tilweni.

⁹ Pawulo u ri: “Mi ya emahlweni, mi kula.” Minkarhi hinkwayo hi nga anamisa rirhandzu ra hina eka vamakwerhu. Ngopfu-ngopfu mfanelo leyi yinene ya kula loko vakulu ni malandza ya vutirheli va veka xikombiso eka ntirho wo chivirika wa Mfumo. Loko hinkwavo ebandlheni va gingiritekela ku ‘rhanga va lava Mfumo,’ ku hambana loku vangiwaka hi ku nga hetiseki ka vumunhu, ku Iwisana ka vumunhu ni swiphiqo leswi fanaka swi va swa vumbirhi. A hi languteni pakani leyi minkarhi hinkwayo!—Matewu 6:20, 21, 33; 2 Vakorinto 4:18.

10. Xana hina tanihi Vakriste, hi nga ‘famba hi mfanelo’ hi ndlela yihi ke?

¹⁰ Laha Pawulo u nghenisa ‘xileriso’ xin’wana—leswaku hi swi endla ku navela ka hina ku tshama hi ku rhula, hi tikarhatela bindzu ra hina, naswona hi tirha hi mavoko ya hina. Loko xisweswo hi ‘famba hi mfanelo’ eka vutomi bya hina bya siku na siku, hi kombisa rirhandzu lerikulu ni rirhandzu ra vamakwerhu, swilaveko swa hina hinkwaswo swi ta lulamisiwa.—1 Vatesalonika 4:11, 12; Yohane 13:35; Varhoma 12:10-12.

Va Chaveleriwe Hi Ntshembo Wa Ku Pfuxiwa Ka Vafi

11. (a) Hikwalaho ka yini Pawulo manuku a vulavula hi ku pfuka ka vafi? (b) Xana xitsundzuxo lexi xa Pawulo xi fanele xi hi khumba njhani?

¹¹ Muapostola u ya emahlweni a kombetela eka ntshembo lowunene wa ku pfuxiwa ka vafi. Kambe hikwalaho ka yini Pawulo a humesa nhloko-mhaka leyi? A a lava ku tiyisa vamakwavo leswaku va tiyisela ku xaniseka loku a ku ri emahlweni ka vona. A va ri ekhombyeni ra ku lahlekeriwa hi vutomi bya vona. Swi vonaka onge enkarhini wolowo van’wana a va etlele eku feni. Vapfumeri-kulobye a va lava ku chaveleriwa. (1 Vatesalonika 2:14-20) Hi ku ehleketa leswaku “ku vuya” ka Kriste a ku tshinerile, va hlamarile leswaku a ku ta humelela yini eka lava ana se a va file. Leswi Pawulo a swi tsalaka sweswi a swi chaveleli lava va lahlekeriwaka hi varhandziwa va Vukriste ntsena kambe swi tlhela swi va xikhutazo xa ku tiyisela ku kondza “siku” ra Yehova ri fika. Xitsundzuxo xa Pawulo xi fanele ku pfuna hinkwerhu leswaku hi kombisa ku tiya ka moya loko hi ri karhi hi hambeta hi twarisa mahungu lamanene, hi ku langutela makumu yo hetelela ya mafambiselo lawa ya swilo.—2 Vatesalonika 1:6-10.

12. Xana i ku chavelela kwihi ka xiviri loku hi nga ha vaka na kona loko murhandziwa a fa, naswona ku huma eka xihlovo xihi ke?

¹² Pawulo u ri: “Vamakwerhu, ndzi lava leswaku mi tiva ntiyiso hi tlhelo ra lava va tietleleleke, mi ta ka mi nga vaviseki kukota van’wana lava nga riki na ku langutela.” (1 Vatesalonika 4:13) Mawaku ku chaveleriwa ni ku rhula ka mianakanyo leswi nga ta kumiwa eka ntshembo wa ku pfuxiwa ka vafi! Endzhakunyana ka malembe ya ntlhanu, Pawulo a a ta humesela Vakriste va le Korinto papila ra yena ra vumbirhi hi ku: “Tintswalo ni ku rhula a swi ve na n’wina, swi huma eka Xikwembu Tata wa hina, ni le ka Hosi Yesu Kriste! A ku vongiwe Xikwembu Tata wa Hosi ya hina Yesu Kriste, Tatana wa tintswalo, Xikwembu lexi ku chavelela hinkwako ku humaka eka xona; xa hi chavelela emaxangwini hinkwawo ya hina; hikokwalaho, na hina hi kota ku chavelela lava nge maxangwini ya tinxaka-nxaka, hi va chavelela hi ku chavelela loku na hina hi nyikiweke kona hi Xikwembu.”—2 Vakorinto 1:2-4.

13, 14. (a) Hikwalaho ka yini Pawulo a lave leswaku Vakriste va byeriwa leswi rifu ri vulaka swona? (b) Xana Matsalwa ya kombisa leswaku xiyimo xa vafi hi xihi?

¹³ Muapostola a a nga swi lavi leswaku hi pfumala vutivi malunghana ni xiyimo xa lava feke. Hi nkarhi lowu faneleke, vugwinehi lebyikulu a byi ta sungula eka lava tivulaka Vakriste, leswaku va ta tlhelela eka tifilosofi ta Babilona ni ta Griki. Vagwinehi vo tano a va ta amukela dyondzo ya Platon ya ku nga fi ka moya ka ndzhaka—leswi sweswi ku nga dyondzo ya xisekelo ya mfumo wa misava hinkwayo wa vukhongeri byo hemba. Matshamisekelo ya xihundla lawa ya nga kona “endzhaku ka rifu,” hambi ya vuriwa ya ri etilweni, ephagatori kumbe exivandleni xa nxaniso lowu nga heriki, ya hava ku chavelela ka ntiyiso. Nakambe, ku nga fi ka moya ka ndzhaka ku Iwisana ni dyondzo ya ku pfuxiwa ka vafi, hikuva xana munhu a nga tlhela a pfuxeriwa evuton’wini hi ndlela yihi loko moya wu nga fi ke?

¹⁴ Pawulo laha u tsala “hi tlhelo ra lava va tietleleleke.” Ina, lava “tietleleleke.” Munhu la etleleke a nga twi nchumu naswona a nga swi koti ku endla ntirho wihi na wihi. (Ringanisa Eklesiasta 9:5, 10.) Ku ve ni xiendlakalo enkarhini wa vutirheli bya Yesu laha a nga vula leswaku Lazaro “u etlele” ni leswaku yena, Yesu, u ta n’wi “pfuxa evurhongweni!” Loko vadyondzisiwa va Yesu va nga ma twisisanga marito wolawo, “Yesu a va byela erivaleni a ku: ‘Lazaro u file.’” Vamakwavo va Lazaro va xisati, Marta na Mariya va chaveleriwile hi ntshembo wa ku pfuxiwa ka vafi, kutani Yesu u va nyike ku chavelela loku yaka emahlweni. Kambe ripfumelo ra vona ri fanele ri tiyisiwe swinene swonghasi loko Yesu a pfuxe munghana wa yena, loyi ana se a a file hi masiku ya mune, a huma eku etleleni ka rifu!—Yohane 11:11-14, 21-25, 43-45.

15. (a) Xana ntshembo wa hina wa ku pfuka ka vafi wu tiyisiwa hi ndlela yihi ke? (b) Xana hi nga ha pfuniwa hi ndlela yihi leswaku hi tolovela loko ku fe un’wana la rhandzekaka?

¹⁵ Hlori rero, kun’we ni mintirho yin’wana ya Yesu eka ku pfuxa vafi, naswona ngopfu-ngopfu ku pfuxiwa ka Yesu hi yexe hi Yehova—swiendlakalo leswi hinkwaswo leswi tsariweke khwatsi swi tiyisa ku langutela ka hina ka ntshembo lowu hlamarisaka wa ku pfuxiwa ka vafi. (Luka 7:11-17; 8:49-56; 1 Vakorinto 15:3-8) I ntiyiso, rifu ri tisa gome ni mihloti, naswona swa tika ku tolovela ku nga vi kona ka la rhandzekaka. Kambe mawaku ku chavelela ni matimba leswi hi swi kumaka eka xitiyisekiso xa leswaku Yehova Hosi Leyikulu “o ta lov̌isa rifu hi laha ku nga heriki; . . . o ta hlangula mihloti e mimombyeni hikwayo”! (Esaya 25:8; Nhlavutelo 21:4) Vutshunguri byin’wana byo antswa bya gome i ku tshama u gingiriteka entirhweni wa Xikwembu xa ku rhula, u nyika van’wana ntshembo lowu tsakisaka wa Mfumo lowu hina hi hexe hi wu amukeleke hi ku tlangela lokukulu swinene.—Ringanisa Mintirho 20:35.

Xileriso Xa Ku Pfuxiwa Ka Vafi

16, 17. (a) Xana “nala lowo hetelela” u ta herisiwa njhani? (b) I xileriso xihi xa ku pfuxiwa ka vafi lexi manuku Pawulo a xi hlamuselaka?

¹⁶ Ripfumelo ra hina ri tiyile leswaku Kriste, “širhangana” xa ku pfuxiwa ka lava feke naswona loyi sweswi a tshamisisiweke exiluveIweni evokweni ra xinene ra Xikwembu etilweni, u ta hetisisa swikongomelo leswi vangamaka swa Mfumo wa Yehova. (Vaheveru 6:17, 18; 10:12, 13) Hi laha Pawulo a vulaka ha kona eka papila ra yena rin’wana u ri: “[Yesu] Kriste u fanele ku fuma, Xikwembu xi kondza xi veka valala hinkwavo ehansi ka mikondzo ya yena. Kutani nala lowo hetelela la nga ta herisiwa i rifu.” Hi ndlela yihi ke? Hi ku pfuxiwa ka vafi ni ku susiwa ka vuyelo bya rifu ra Adamu. Muapostola a a ha ku swi hlamusela hi ndlela leyi: “Leswi rifu ri nga vangiwa hi munhu un’we, ku pfuka ka vafi na kona ku vangiwe hi munhu un’we. Kukotisa leswi hinkwavo va faka hikwalaho ka Adamu, hi mukhuva wolowo, hinkwavo va ta tlhela va pfuxiwa hikwalaho ka Kriste. Kambe un’wana ni un’wana hi ndhawu ya yena: Wo rhanga i Kriste xi nga xitshembiso; kutani loko Kriste a ta, lava nga va yena va ta landza.” (1 Vakorinto 15:20-26) Hi le ka xileriso lexi xa ku pfuxiwa ka vafi laha Pawulo a hambetaka a kombetela eka papila ra yena ro sungula eka Vatesalonika, a ku:

¹⁷ “Hikuva leswi hi pfumelaka leswaku Yesu ú file, a tlhela a pfuka eku feni, hi mukhuva wolowo, hi pfumela leswaku lava tietleleleke, Xikwembu xi ta va pfuxa eku feni ha Yesu, xi va vuyisa swin’we na yena. Hikuva lexi hi mi byelaka xona i rito ra [Yehova]: Hi leswaku hina lava hi nga ta sala ha ha hefemula loko Hosi yi vuya, hi nga ka hi nga rhangeli lava tietleleleke; hikuva Hosi hi xiviri xa yona yi ta xika hi le tilweni, hi mpfumawulo wa rito ra ku lerisa, hi ku huwelela ka ndhuna ya tintsumi, ni ku ba ka mhalamhala ya Xikwembu, kutani lava feleke ka Kriste, va ta rhanga va pfuka eku feni.”—1 Vatesalonika 4:14-16.

18. Xana lava totiweke lava “tietleleleke” va pfuxiwe rini eku feni ke?

¹⁸ Endzhaku ka 1914, enkarhini wa ‘vukona’ bya Yesu hi matimba ya Mfumo, yena, tanihi ntsumi leyikulu, u humesela lava “feleke ka Kriste” nawu wa le tilweni leswaku va hlangana. Emhakeni ya vatotiwa vo tano lava “tietleleleke,” mpfumawulo lowu wo fana ni wa mhalamhala wu vula ku pfuxeriwa ka vona ka moya etilweni. Xihondzo xo Rindza i khale xi nyikele langutelo ra leswaku, ku pfuxiwa loku ka Vakriste lava totiweke ku sungule hi lembe ra 1918.

19. Hi rini naswona njhani laha lava ha saleke va nga ta ‘tlakuriwa va ya emapapeni,’ naswona hi xikongomelo xihi?

¹⁹ Hambi swi ri tano, ku vuriwa yini hi Vakriste lava totiweke lava ha seleke emisaveni, lava sweswi ku nga ntlawa lowu hungutekaka wa lava nga ehansi ka 10 000 ke? Lava na vona, va fanele ku heta pfhumba ra vona ra vutomi ra laha misaveni hi ku tshembeka. Onge hi loko a a ri na vona enkarhini wa vukona bya Kriste, Pawulo wa tsala: “Kutani hina lava hi nga ta sala ha ha hefemula, hi ta tlakuriwa hi ya ehenhla emapapeni swin’we na vona, ku ya hlangana na Hosi empfhukeni. Kutani hi mukhuva wolowo, hi ta va na Hosi hi laha ku nga heriki.” (1 Vatesalonika 4:17; ringanisa Nhlavutelo 1:10.) Xisweswo, hi nkarhi lowu faneleke, lava 144 000 hinkwavo va ta pfuxeriwa ku ya tirha tanihi vaprista ni tihosi eNtshaveni ya Siyoni ya le tilweni ni Xinyimpfana, Yesu Kriste. “Loku i ku pfuka ko rhanga eku feni.” (Nhlavutelo 14:1, 4; 20:4, 5) Kambe xana ku ta humelela yini eka tibiliyoni ta vanhu leti sweswi ti nga emasirheni ya tona?

20, 21. (a) I yini lexi rindzeleke tibiliyoni ta lava nga emasirheni ya vona? (b) Hi wihi ntlawa lowu nga ta ka wu nga kali wu fanela ku fa emisaveni, naswona hikwalaho ka yini? (c) Loko vanhu va ntlawa lowu vo fa, hi rihi langutelo ro tsakisa leri va nga na rona?

²⁰ Hambi leswi Pawulo a nga va boxiki hi ku kongoma lava epapileni ra yena ro sungula ro ya eka Vatesalonika, Nhlavutelo 20:12 yi hi tiyisekisa leswaku “vafi, lavakulu ni lavantsongo,” va ta pfuxiwa leswaku va yima emahlweni ka xiluvelo xa ku avanyisa xa Xikwembu. (Nakambe vona Yohane 5:28, 29.) Hambi swi ri tano, namuntlha “ntshungu lowukulu” lowu ntsengo wa wona wu nga timiliyoni ana se wu hlengeletiwile emahlweni ka xiluvelo xexo. Tanihi ntlawa, lava va ta ponisiwa va ri karhi va hanya eka “nhlomulo lowukulu” lowu tshinelaka. Va risiwa hi Xinyimpfana naswona va yisiwa “eswihlobyeni swa mati ya vutomi,” leswaku va nga ha tlheli va fa emisaveni. Kambe hikwalaho ka xiendlakalo xa vudyuhari kumbe lexi nga voniwangiki, van’wana va vona va nga ha fa enkarhini wa ‘vukona’ bya Hosi. (Nhlavutelo 7:9, 14, 17; Eklesiasta 9:11) Ku vuriwa yini hi lava?

²¹ Ntshembo wo tsakisa wa ku pfuxiwa ko rhanga ka vafi wu le mahlweni ka ‘tinyimpfu to tano tin’wana hinkwato.’ (Yohane 10:16) Ripfumelo ni mintirho ya vona, ku fana na liya ya Abrahama wa khale, ana se yi va tise eka xiyimo xa vunghana ni Xikwembu. Ku fana ni vavanuna ni vavasati lavaya va ripfumelo lava hlamuseriweke eka Vaheveru ndzima ya 11, ‘tinyimpfu leti tin’wana’ ta manguva lawa ti tiyisele miringo. Entiyisweni, na vona, va ta tokota “ku pfuka ka vafi ko antswa,” handle ko kanakana hi ku hatlisa enkarhini wa le ndzhaku ka Armagedoni. (Vaheveru 11:35; Yakobo 2:23) Hakunene, un’wana ni un’wana loyi hi ripfumelo a ‘dyeke nyama, a nwa ngati ya Yesu’ u ta hlanganyela eku hetisekeni ka xitshembiso xakwe: “U . . . ni vutomi lebyi nga heriki, kutani mina ndzi ta n’wi pfuxa hi siku ra makumu.”—Yohane 6:54; Varhoma 5:18, 21; 6:23.

²² Endzhaku ka ku kanela hi ntshembo lowu kwetsimaka wa ku pfuxiwa ka vafi, Pawulo wa tsundzuxa: “Ma nga chavelelana hi marito wolawo.” (1 Vatesalonika 4:18) Kutani u ya emahlweni a vulavula hi timhaka ta nkoka malunghana ni “ku vuya ka Hosi ya hina Yesu.” (1 Vatesalonika 5:23) Leswi i yini ke? Vona xihloko lexi nge: “Ku Rhula Loku Humaka Eka Xikwembu—Rini?”

Hi Nkatsakanyo—

◻ Hi swihi swikombelo leswi Pawulo a swi endleleke Vakriste?

◻ I “swileriso” swihi swo hi pfuna leswi Pawulo a hi nyikaka swona?

◻ Xana Rito ra Xikwembu ri hi chavelela njhani malunghana ni lava feke?

◻ Hi xihi xileriso xa ku pfuxiwa ka vafi lexi Pawulo a xi hlamuselaka?

22. Xana hi nga chavelelana hi ndlela yihi?