Ku Tlangela—Kambe Ha Yini A Tshika?

HI November ya n’waxemu, enkarhini wa ntsombano wa vabixopo va Mantariyani lowu khomeriweke eBologna, eItaly, Kereke ya Khatoliki yi pfuxe nhlaselo wo lwisana ni Timbhoni ta Yehova. Ehansi ka nhloko-mhaka leyi nge “Kriste Xikwembu Xerhu Ni Ntshembo Wa Hina: Vakriste emahlweni ka Timbhoni ta Yehova,” muprista Giovanni Marinelli u kombe leswaku Timbhoni i “mhangu ya vukhongeri ni sosayiti.” Hikwalaho ka ku andza ka tona ka xihatla eItaly ti huma exikarhi ka Makhatoliki, u lumbete Timbhoni leswaku i ‘vuvabyi lebyi hlaselaka ngopfu lava nga ni xinghana swinene.’

Swifundza ni mabandlha ya Khatoliki eItaly hinkwayo swi byeriwe ku teka xiyimo lexi tiyeke xo Iwisana ni Timbhoni. Njhani? Hi ku vumba mintlawa emutini wihi na wihi leyi a yi ta “va tsakisa” entirhweni wa Timbhoni leswaku va ‘xalamukisa vanhu va vona lava tshembekaka.’

Xana nyimpi yo tano yo lwisana ni Timbhoni ta Yehova yi fambe njhani ke? Eka papila leri kandziyisiweke eka Piario Parish Magazine, muprista un’wana u tsarile a ku: “Mina hi ndzexe, ndzi rhandza Timbhoni ta Yehova; ndzi swi amukela khwatsi. Hinkwenu mi ntshunxekile ku anakanya hi laha ku hambaneke, naswona kumbexana, hambi ku ri ku ndzi hlongola. . . . I vanhu lava ndzi tivaka leswaku va ni mikhuva leyi nga hoxekangiki, va vulavula hi ku olova . . . [naswona] va ni nsusumeto lowukulu. Xana hi ta swi twisisa rini leswaku ntiyiso wu lava ku andlariwa loku amukelekaka? Leswaku lava huwelelaka ntiyiso a va fanelanga ku va ni mbilu leyi nga helelangiki, ku nun’hwela loku kanganyisaka, mpfilumpfilu, vusopfa?

“Nakambe, Timbhoni ta Yehova ti ku endzela ekaya. Ekaya u le matshamelweni ya wena n’wini naswona u ni mpfuno. . . . U nga fikelela ni ku teka Bibele ya wena . . . evuhirhini, naswona u nga kambisisa leswaku u vona loko ndzimana leyi tshahiweke yi ri yona, u kuma mongo wa yona, ni swin’wana.

“Kutani ndzi nga ha tlhela ndzi vula leswaku lexi ndzi tsakisaka hi xiviri i mhaka ya leswaku Timbhoni ta Yehova ti titwa ‘ti vitaniwile’ hi munhu hi xiyexe . . . evutirhelini bya rito. Wolowo i ntirho lowu hi wu rivaleke khale naswona sweswo swi vange ku onhaka loku nga hlayekiki eka vuvuri bya hina bya rito. ‘Va ta swi twisa ku yini loko ku ri hava loyi a va tivisaka swona?’ Eka mina Timbhoni ta Yehova ti vonaka ti ‘helerile’: hayi malunghana ni kaya, ntirho ni ku tiri vatisa ntsena, kambe malunghana ni dyondzo ya munhu hi xiyexe ya mintshembo ya vona ni ndlela yo pfuna van’wana ku yi twisisa. Kambe laha ndzi ku ‘tsakelaka’ hi le swilahlweni swa Timbhoni ta Yehova. Loko ndzi swi ringanisa ni swilahlo swa hina swa Khatollki, laha munhu la miyelaka ku nga loyi a feke, laha ku nga hava munhu loyi a nga ni Bibele emavokweni yakwe leswaku a ta yingisa ku hlaya ka mani na mani. . . . Mayana ku vonakala! Mawaku swikhongelo leswonghasi! Vona ripfumelo leronghasl! Mawaku ku hola lokonghasi! I mani la swi tivaka leswaku ndzi ta swi kota ku lwisana ni ndzingo wo tlhandlekela leswi endzhakeni ya mina: ‘Ndzi tsakela ku va ni xilahlo xa Timbhoni ta Yehova.’ I mani a tivaka!

“Manghenelo ya vona ya fanela swinene. Kumbexana i mhaka ya leswi na mina ndzi nga anerisekiki, leswi ndzi twisisaka ku soriwa ka vona erivaleni. Va ri, ‘Misava leyi hi hanyaka eka yona yi tele hi vukari ni vunghwavava.’ Xana u titwa u lava ku ringeta ku kombisa ku hoxa ka vona? A ndzi titwi tano. . . . ‘Kereke ya Khatoliki, yi nga yin’wana ya vukhongerl lebyi amukeriwaka ngopfu hinkwako ni ya khale swinene, yi na vutihlamuleri lebyikulu bya ku tsongahatiwa ko tano.’ Xana u ta kaneta? Mina ndzi nge kaneti. I vanhu lavanene, va mikhuva ley nene, . . . lava tinyiketeke. Timbhoni ta Yehova ti na xivindzi lexi fambisanaka ni vunene. Va hetelela hi ku, ‘Tshikani tikereketa n’wina ivi mi famba na hina.’

“Ndza swi xiya leswaku eka mina ku tshika vukhongeri lebyi ndzi byi tiveke ku sukela loko ndza ha an’wa meleka wa manana, kutani ndzi amukela byin’wana, a swi ta khomisa gome. Kambe loko sweswo a swi twisiseka ha yini u nga teki goza leri? Anakanya ha swona, ku cinca vukhongeri a swi tsongahati nikantsongo. . . . A swi ta va leswi tsongahataka ku tshika vukhongeri leswaku u kuma swa hava ntsena, ku tshika ku namarhela nsinya leswaku u sungula ku tlhelela endzhaku handle ka xikongomelo. Kambe xana ku vuriwa yini loko ndzi ehlekete leswaku mpahla ya mina yi basile hikwalaho ka leswi ndzi nga yi vonangiki ya wena? Swi vonaka swi twala eka mina ku hlawula muchini lowu antswaka, lowu hlantswaka swi basa ku tlula leswi baseke! Xikongomelo xa varhumiwa i xin’we, naswona i xin’we ntsena: ku cinca vukhongeri bya vanhu. . . . Hikwalaho ka yini ndzi nga fanelanga ku cinca vukhongeri loko ripfalo ra mina ri ndzi byela ku endla tano? Loko muchumayeri a ndzi khorwisa ke? Loko swi twala ku endla tano xana? Loko vukhongeri bya Timbhoni ta Yehova byi ri byinene ngopfu. . . , kona . . . ndzi ta fambisana ni Timbhoni ta Yehova. . . . Ndzi lava ku tiva loko Timbhoni ta Yehova ti vula swona.”

Loko a dlayelela papila ra yena, muprista u kandziyise leswaku ku tirhisa ka Timbhoni Yehova ematshan’wini ya Yahweh loko ti vitana vito ra Xikwembu a “hi xivangelo xa mina xo lahlekeriwa hi rirhandzu leri tiyeke leri ndzi nga na rona eka Timbhoni ta Yehova.” Ha yini? “Hikwalaho,” wa tlhandlekela, “i Timbhoni ta Xikwembu naswona yoleyo hi yona mhaka leyikulu!”

Xiya: Papila ra muprista ri pfuxe hasahasa eka swikhundla leswi tlakukeke swa vafundhisi. Enkandziyisweni wa le ndzhakunyana wa magazini wa vafundhisi, u tshike tinhlamuselo takwe ehenhleni ka Timbhoni ta Yehova.