Vutomi Ni Vutirheli Bya Yesu

Ndlela Leyi Yaka Evuton’wini

NDLELA leyi yaka evuton’wini hi liya ya ku hanya hi tidyondzo ta Yesu. Kambe leswi a swi olovi ku swi endla. Hi xikombiso, Vafarisi va vonaka va avanyisa van’wana hi tihanyi, naswona hi ku fanana vo tala va va tekelela. Kutani loko Yesu a ya emahlweni ni dyondzo ya yena eNtshaveni u nyika xitsundzuxo lexi, “Mi nga avanyisi, leswaku na n’wina mi ta ka mi nga avanyisiwi; hikuva mi taavanyisiwa hi ku avanyisa loku mi avanyisaka van’wana ha kona.”

Swi ni khombo ku landzela vurhangeri bya Vafarisi lava xopaxopaka ngopfu swihoxo. Hi ku ya hi mhaka ya Luka, Yesu u kombisa khombo leri hi ku: “Xana lowo-femahlo a nga swi kota ku fambisa un’wana la feke mahlo ke? A va nga weli ekheleni hi vumbirhi bya vona xana?”

Ku va la xopaxopaka ngopfu swihoxo swa van’wana, u kurisa swihoxo swa vona ni ku swi paluxa, i nandzu lowukulu. Kutani Yesu wa vutisa: “U nga vurisa ku yini eka makwenu u ku: ‘Ndzi tshike ndzi susa xilavi etihlweni ra wena,’ xana? Kasi vona, ku ni ntsandza etihlweni ra wena! Mukanganyisi! Rhanga u susa ntsandza lowu nge tihlweni ra wena; hi kona u nga ta vona swinene kutani u susa xilavi etihlweni ra makwenu.”

Leswi a swi vuli swona leswaku vadyondzisiwa va Yesu a va fanelanga ku tirhisa vutlhari mayelana ni vanhu van’wana, hikuva u ri: “Mi nga nyiki timbyana swilo leswi hlawulekeke, na swona mi nga hoxi tidayimani ta n’wina emahlweni ka tinguluve.” Mintiyiso leyi humaka eRitweni ra Xikwembu yi hlawulekile. Yi fana ni tidayimani to fanekisela. Kambe loko vanhu van’wana, lava fanaka ni timbyana kumbe tinguluve, va kombisa ku ka va nga tlangeli mintiyiso leyi yo vangama, vadyondzisiwa va Yesu va fanele ku sukela vanhu volavo kutani va lava tindleve leti amukelaka ngopfu.

Hambi leswi Yesu a vulavuleke hi xikhongelo eku sunguleni edyondzweni ya yena, sweswi u kandziyisa xilaveko xo tiyisela eka xona. Wa khutaza a ku: “Kombelani, mi ta nyikiwa.” Leswaku a kombisa ku tiyimisela ka Xikwembu ku hlamula swikhongelo, Yesu wa vutisa: “Xana i mani exikarhi ka n’wina la nga nyikaka n’wana wa yena eribye, loko a kombela vuswa xana? . . . Kutani ke, leswi n’wina vanhu va tihanyi mi tivaka ku nyika vana va n’wina swilo leswinene, xana Tata wa n’wina la nge matilweni, a nge tlurisi ngopfu ku nyika leswinene eka lava kombelaka eka yena xana?”

Ku ya emahlweni Yesu u nyika leswi veke nawu lowu tivekaka ngopfu wa mahanyelo, lowu hi ntolovelo wu vitaniwaka Nawu Lowukulu. U ri: “Hikokwalaho hinkwaswo leswi mi lavaka leswaku vanhu va mi endla swona, va endleni swona na n’wina.” Ku hanya hi nawu lowu swi katsa xiendlo lexi kongomeke eka ku endla leswinene eka van’wana, u va khoma hi laha u lavaka leswaku va ku khoma ha kona.

Leswaku ndlela leyi yaka evuton’wini a yi olovi swi hlavuteriwe hi xiletelo xa Yesu lexi nge: “Nghenani hi nyangwa leyo khuma, hikuva nyangwa leyi yisaka eku loveni yi ahlamile, ni ndlela leyi yaka kona, yi anamile, kutani lava nghenaka hi yona va tele. Kasi nyangwa leyi yisaka evutomini yi khumile swinene, ni ndlela leyi yaka kona yi larile, kutani lava yi kumaka a va talanga.”

Khombo ra ku kanganyisiwa i rikulu, kutani Yesu wa tsundzuxa: “Tivoneleni eka vaprofeta va mavunwa lava taka ka n’wina va ambele tani hi tinyimpfu, kasi etimbilwini ta vona, i timhisi leti bvanyengetaka.” Kukotisa leswi mirhi leyinene ni mirhi leyo biha yi voniwaka hi mihandzu ya yona, Yesu u komba leswaku, vaprofeta vo hemba va nga voniwa hi mahanyelo ni tidyondzo ta vona.

Loko a ya emahlweni, Yesu u hlamusela leswaku a hi leswi munhu a swi vulaka leswi n’wi endlaka mudyondzisiwa wa Yena kambe leswi a swi endlaka. Vanhu van’wana va vula leswaku Yesu i Hosi ya vona, kambe loko va nga endli ku rhandza ka Tata wa yena, u ri: “Ndzi ta va byela erivaleni, ndzi ku: A ndzi mi tivanga, ni siku ni rin’we; sukani eka mina, n’wina lava endlaka leswo homboloka!”

Eku heteleleni, Yesu u nyika makumu lawa ya tsundzukekaka edyondzweni ya yena. U ri: “Un’wana ni un’wana la yingisaka marito ya mina lawa, a va a famba ha wona, ú ta fana ni wanuna lowo tlhariha la akeke yindlu ya yena eribyeni, kutani mpfula yi na, maboboma ma ta, timheho ti hunga, swi ba yindlu yoleyo; kambe a yi wanga, hikuva masungulo ya yona a ma ri eribyeni.”

Hi tlhelo rin’wana, Yesu u ri: “Un’wana ni un’wana la yingisaka marito ya mina lawa, kutani a nga fambi ha wona, ú ta fana ni wanuna wa xiphukuphuku, la akeke yindlu ya yena esaveni. Mpfula yi na, maboboma ma ta, timheho ti hunga, swi ba yindlu yoleyo, kutani yi wa, ku wa ka yona ku va lokukulu.”

Loko Yesu a heta dyondzo ya yena, mintshungu yi hlamala hi ku dyondzisa ka yena, hikuva u va dyondzisa tanihi munhu loyi a nga ni vuhosi ku nga ri tanihi varhangeri va vona va vukhongeri. Matewu 7:1-29; Luka 6:27-49.

◆ Xana Yesu u ri yini ehenhleni ka ku avanyisa van’wana; kutani hambi swi ri tano u kombisa njhani leswaku vadyondzisiwa va yena va fanele ku tirhisa vutlhari malunghana ni vanhu?

◆ Ku ya emahlweni Yesu u vula yini malunghana ni xikhongelo, naswona i nawu wihi wa mahanyelo lowu a wu nyikelaka?

◆ Xana Yesu u kombisa njhani leswaku ndlela leyi yaka evuton’wini a yi nga ta olova ni leswaku ku ni khombo ra ku kanganyisiwa ke?

◆ Yesu u hetelela dyondzo ya yena hi ndlela yihi, naswona i vuyelo byihi lebyi yi vaka na byona?