Ku Hlayisa Vun’we Bya Vukriste eVuxakeni Bya Bindzu
“Langutani! a hi ku ṭakisa ka ŝona, ni ku nanḍiha, Loko mašaka ma hanya ŝiṅwe, ma twanana.”—PSALMA 133:1.
1. Hikwalaho ka yini vun’we bya Vukriste byi laveka ngopfu?
HAKUNENE swa ‘tsakisa ni ku nandziha loko maxaka ya Vukriste ma hanya swin’we ma twanana,’ ngopfu-ngopfu namuntlha loko ku ri ni ku avana lokukulu emisaveni. Laha vun’we bya xiviri byi nga kona, byi va nchumu wo xonga, byi tisa xiboho lexikulu xa rirhandzu ra vamakwavo exikarhi ka vanhu, byi endla leswaku wu va ntsako ku va ni van’wana. Hi tlhelo rin’wana, ku avana swi bihile naswona swi vanga ku hlundzukela van’wana, rivengo ni ku tihambanisa ni vanghana.
2. Xana langutelo ra hina leri tolovelekeke ra milawu ya Bibele ri nga kurisa vun’we byerhu bya vamakwerhu hambi ku ri etimhakeni ta bindzu hi ndlela yihi?
2 Loko Vakriste va hlanganyela eka ku tirhisana ka bindzu ni malandza man’wana ya Yehova, langutelo ra vona leri tolovelekeke ra milawu ya Bibele ri fanele ku kurisa vun’we bya vona bya vamakwavo. Mulanguteri ebandlheni ra Timbhoni ta Yehova u swi veka hi ndlela leyi: “Tanihi leswi misava yi yaka yi pfumala vutshembeki, swa phyuphyisa ku tirha ni Vakriste-kulorhi lava hlayisaka nawu. A hi fanelanga ku tirindza minete yin’wana ni yin’wana. Vatirhisani va bindzu lava baseke ni lava tshembekaka va ya va karhi va kala eka mafambiselo lawa. Swi tsakisa swonghasi ku tirha ni vanhu lava tshembekaka lava va nga dzahiki kumbe ku tirhisa ririmi lero biha, vanhu lava nga ni ku tikhoma, lava xikongomelo-nkulu xa vona ku nga riki makwanga ya swilo leswi vonekaka!”
3. (a) Hi byihi vuxaka byin’wana bya bindzu lebyi katsaka vapfumeri-kulobye? (b) I milawu yihi leyi faneleke ku kongomisa mintirhisano ya bindzu?
3 Hi byihi byin’wana bya vuxaka bya bindzu lebyi nga ha katsaka vapfumeri-kulobye? Byi-n’wana hi loko Vakriste vambirhi kumbe ku tlula va kunguhata ku nghenela mhaka ya bindzu tanihi vatirhisani. Byin’wana hi loko un’wana a ri muthori ivi lon’wana a ri muthoriwa. Nakambe xiyimo xin’wana hi loko Mukriste a nyikela leswi bindzuriweke kumbe ku tirhela mupfumeri un’wana. Eka ku tirhisana kun’wana ni kun’wana ko tano ka bindzu, milawu ya vutshembeki ni vululami leyi rhekhodiweke eRitweni ra Yehova leri huhuteriweke yi fanele ku kongomisa swiendlo swa vona. Hi ndlela leyi vun’we bya vamakwerhu ni ntsako wa ku tirha swin’we swa kurisiwa.—1 Vakorinto 10:31.
4. I khombo rihi leri nga kona eka Vakriste lava nga ebindzwini?
4 Hambi swi ri tano, khombo ri va kona lerova van’wana va nga ha tsandzeka ku hlayisa langutelo leri tlakusiweke ra Vukriste. Va nga ha sungula ku ehleketa ngopfu hi timhaka ta vona vini. (Vafilipiya 2:4) Mali yi nga ha va ya nkoka ngopfu ku tlula vun’we bya Vukriste. Kambe vutitivi ebindzwini byi nga onha vuxaka bya vamakwavo ni vuxaka bya munhu na Yehova. Hi nge swi lavi leswaku sweswo swi humelela!—Yohane 13:34, 35; Vaheveru 13:5; 1 Timotiya 3:2, 3; 1 Yohane 3:16; 4:20, 21.
Ntikelo Wa Ntwanano Wa Ximfumo
5. Xana ntokoto wa Abrahama eka ku xava tiko wu wu kombisa njhani nkoka wa ntwanano lowu endliwaka ximfumo?
5 Leswaku u sivela swidoledole eka ntirhisano wa bindzu, xiya ndlela leyi Abrahama a xaveke xiphemu xa tiko ha yona. A “pimela Efron hi šikalo e mali leyi a nga yi v̌ula, v̌ana v̌a Het v̌a ri kari v̌a ŝi twa, a nga mašikele ya silver ya mune wa madzana la’ma amukeriwaka e šikari ka v̌ašav̌i. Ŝeŝo nsimu ya Efron, le’yi nga Makpela . . . si ṭhamile ŝi ri ŝa Abraham, e mahlweni ka v̌ana v̌a Het, ne mahlweni ka hikwav̌o la’v̌a nga kari va nghenaka hi nyangwa ya muti wa yena.” Loku a ku nga ri ku pfumelelana ka le xihundleni ka vunjhinga. A ku ri ku pfumelelana ka ximfumo, loku tiyisiweke emahlweni ka timbhoni. A ku nga ri na xidoledole ehenhleni ka leswi xaviweke ni nxavo lowu kongomeke.—Genesa 23:2-4, 14-18.
6. Xana Vakriste va nga ti endlisa ku yini timhaka ta nkoka ta bindzu leswaku ti va enawini ke?
6 Hi ku fanana, i vutlhari eka Vakriste ku endla mintirhisano ya nkoka ya bindzu ximfumo. Loko ntirhisano lowu wa bindzu wu katsa ku xavisiwa ka xanchumu, vatirhisani va nga ha tsala lexi xavisiweke, nxavo, ndlela yo hakela, leswaku wu fanele ku yisiwa rini naswona hi yini, ni swiyimo swin’wana leswi ku pfumelelaniweke ha swona. Loko wu katsa ntirho lowu faneleke ku endliwa, vatirhisani va nga ha tsala ntirho lowu faneleke ku endliwa, leswaku wu fanele wu hetiwa rini, nxavo ni timhaka tin’wana. Tsalwa leri ri fanele ri tsariwa siku ni ku sayiniwa, naswona kopi yi fanele yi hlayisiwa hi vatirhisani lava hinkwavo. Ku pfumelelana ko tano loku tsariweke ngopfu-ngopfu i ka nkoka eka vunakulobye bya bindzu. Ku pfuna matlhelo lama hinkwawo ku twisisa vuxaka bya vona kahle naswona ku va pfuna ku hanya hi ku pfumelelana ni ndzayo ya Yesu leyi nge: “Eku vulavuleni ka n’wina Ina a a ve Ina, E-e a va E-e.” (Matewu 5:37) Etimhakeni to nonon’hwa ngopfu, swi nga va swinene ku lava mpfuno wa vutshila eku endleni ka ntwanano lowu tsariweke.
7. (a) Hi swihi swin’wana leswi faneleke ku xiyiwa malunghana ni mintwanano leyi tsariweke? (b) Hi wihi moya lowu Vakriste va faneleke va ya emahlweni ni timhaka ta bindzu ha wona?
7 Eku endleni ka mintwanano leyi tsariweke, vatirhisani a va fanelanga ku ehleketa hi tipakani ntsena kambe ni vuyelo lebyi nga vaka kona, tanihi ndlela yo herisa lunghiselelo ra kona loko leswi swi laveka. (Swivuriso 21:5) Timhaka hinkwato ta bindzu ti na khombo, naswona ku hava tsalwa leri nga lunghisaka xiyimo xin’wana ni xin’wana lexi nga ha tlhekekaka. Loko swiyimo swi cinca, ntwanano wu nga ha fanela ku hundzuriwa kumbe ku kanela ha wona. Hi nkarhi lowu faneleke swi nga ha vonaka eka munhu leswaku u nghenele xiboho xa bindzu hi vuhunguki naswona a nga ha fanela ku tintshunxa hi ndlela yo xiximeka. Hambi swi ri tano, leswi a swi fanelanga ku va ndlela yo balekela vutihlamuleri bya swikweleti leswi vangiweke hi futa ra munhu hi xiyexe ntsena kumbe vulanguteri lebyi hoxeke. Mhaka leyi ku fanele ku kaneriwa ha yona ku endlela ku vona loko ntwanano wu nga herisiwa ni leswaku i ku lulamisiwa kwihi ka swa timali, loko ku ri kona, loku faneleke ku endliwa. Hambi swi ri tano, entiyisweni, munhu la nga ni ripfalo lerinene u ta endla hinkwaswo leswi a nga swi kotaka khwatsi leswaku a xixima mindzhwalo ya ntirhisano, hambi loko a fanele ku cinca mahanyelo ya yena swa xinkarhana. (2 Vatesalonika 3:12) Loko Mukriste a lava ku famba a nga ri na xihoxo naswona a endla leswi lulameke, u ta ringeta ku hetisisa mindzhwalo ya yena eka ntwanano hambi loko sweswo swi nga ri leswi a swi tsakelaka ngopfu, kambe u ta endla leswi leswaku a hlayisa ku amukeleka eka Yehova. “Loko [a] hlambanyile, a nga hunḍuki, hambi a nga onhakeriwa.” (Psalma 15:1-4) Etimhakeni to tano hinkwato, malandza ya Yehova ma fanele ku endla ‘hinkwaswo leswi ma swi endlaka hi rirhandzu.’—1 Vakorinto 16:14.
8. Hikwalaho ka yini swi ri swinene ku hlayela nxavo emahlweni ko nghenela vuxaka bya bindzu?
8 Hikwalaho ka leswi, emahlweni ko nghenela xinakulobye xa bindzu, i swinene ku hlayela leswi lavekaka. (Luka 14:28-30) Van’wana va nga ha nghena etimhakeni ta bindzu va ri ni ku langutela ka leswi antswaka kambe va tikuma va ri eka swiphiqo swa rona. Hi xikombiso, van’wana va vone onge vuyelo lebyi kumiwaka hi vathori va vona ingi byi ri bya vona loko a vo va ni bindzu leri fanaka ra vona vini. Kambe va tsandzeke ku xiya leswaku ku fambisa bindzu a swi olovi emisaveni leyi ya mphikizano wa tihanyi. Lembe rin’wana ni rin’wana makume ya magidi ya mabindzu ya wa emisaveni hinkwayo. Xisweswo, endzhaku ka ku tokota ku tsandzeka loku vavisaka etimhakeni ta bindzu, Vakriste vo tala va ntshunxekile leswaku va tlhela va va vathoriwa lava kumaka muholo lowu tiyisekeke.
Ku Xixima Vuxaka Bya Bindzu
9. Hi tihi tindlela tin’wana leti Vakriste va nga kombisanaka xichavo entirhweni ha tona?
9 “Mi tlula van’wana hi ku komba xichavo,” ku vula Varhoma 12:10. Vathoriwa va Vukriste lava va endlaka leswi va nge ringeti ku dyelela muthori wa vona hikwalaho ka leswi a nga Mbhoni-kulobye, va tekelela langutelo ra misava ra leswaku leswi muthori a nga swi kotaka, u fanele ku tiyiselela swihoxo swa vathoriwa va yena. Ematshan’wini ya sweswo, va ta kombisa xichavo eka muthori wa vona hi langutelo ra vona ni ntirho wa vona wo gingiriteka. (1 Timotiya 6:2) Hi laha ku fanaka, vathori va Vukriste va ta kombisa xichavo eka vathoriwa lava nga Timbhoni-kulobye hi ndlela leyi va vulavulaka na vona ha yona ni ku tirhisana na vona. Muthori a nga fanelanga a vona onge u le henhla ka mupfumeri-kulobye loyi a n’wi tirhelaka kambe u fanele a tsundzuka leswaku ha vambirhi i mahlonga ya Yehova, va ringana emahlweni ka Yena. (Vaefesa 6:9) Nakambe, ha vambirhi muthori ni muthoriwa va fanele ku tsundzuka ndzayo leyi nga eka Vagalatiya 6:10: “A hi endleni vanhu hinkwavo leswinene, ngopfu-ngopfu va ndyangu wa lava pfumelaka.”
10. Xana ku titsongahata ku pfuna njhani eka ku kombisana xichavo ke?
10 Xichavo a swi nonon’hwi ku xi kombisa laha ku titsongahata ku nga kona. Hi xikombiso, nkulu la titsongahataka ebandlheni ra Vukriste a nge swi kumi swi nonon’hwa ku titsongahatela vukongomisi bya Mukriste-kulobye ebindzwini la nga hava malunghelo lama fanaka ebandlheni. Hi laha ku fanaka, muthori la titsongahataka a nga swi kumi swi nonon’hwa ku titsongahata eka muthoriwa wa yena, nkulu, emintirhweni ya bandlha. Nakambe ku titsongahata ku ta sivela ha vambirhi ka vona ku va lava xopaxopaka ngopfu swihoxo kumbe ku langutela ku hetiseka eka un’wana, tanihi leswi ‘hinkwavo va dyoheke, kutani va pfumala ku kwetsima loku a va nyikiwile hi Xikwembu.’—Varhoma 3:23; 12:3.
11. Vakriste va nga kombisa ku twisisa hi ndlela yihi etimhakeni ta bindzu?
11 Nakambe Bibele ya tsundzuxa: “Vun’we bya n’wina a byi tiviwe hi vanhu hinkwavo.” (Vafilipiya 4:5) A swi nga ta va swinene eka Mukriste leswaku a langutela mintsetselelo yo hlawuleka kumbe ntirho wa le henhla kumbe a lava nxavo wa le hansi nkarhi hinkwawo hikwalaho ka leswi a tirhisanaka ni mupfumerikulobye. Naswona Mukriste a nga fanelanga ku swi endla mfanelo ku langutela nkarhi wo xwa entirhweni kumbe malunghelo man’wana, tanihi ku tirhisa michini kumbe mimovha, hikwalaho ka leswi muthori wa yena a nga mupfumeri-kulobye. Mintsetselelo ya ntirho wa le henhla, minxavo ya le hansi, kumbe nkarhi wo xwa entirhweni swi nga ha ta kambe a swi fanelanga swi laviwa. Ku langutela loku nga twisisekiki ku nga vanga rivengo exikarhi ka Vakriste, ku onha vuxaka bya vona.—Swivuriso 18:19.
12. Malunghana ni ku veka vumbhoni bya Mfumo, i vukheta byihi lebyi faneleke ku kombisiwa endhawini yo tirhela eka yona?
12 Loko Vakriste va ri karhi va lava ku twarisa mahungu lamanene ya Mfumo wa Xikwembu eka lava nga pfumeriki, endhawini ya ntirho va fanele ku xiya leswaku ku veka ko tano ka vumbhoni bya Mfumo ku endliwa hi nkarhi lowu faneleke. (Eklesiasta 3:1, 7) Loko ku endliwa hi nkarhi wa ntirho, ku fanele ku amukeriwa hi muthori. Loko swi nga ri tano muthori a nga ha swi venga, naswona leswi swi nga tisa xisolo eka Yehova ni vanhu va Yena. (1 Timotiya 6:1) Ku na minkarhi yin’wana, tanihi nkarhi wa swakudya swa ninhlikanhi kumbe wo wisa hi siku ra ntirho, laha ku veka ko tano ka vumbhoni ku nga endliwaka kona. Nakambe, laha ku nga ni Timbhoni to hlayanyana entirhweni, ti nge swi lavi ku heta nkarhi ti vulavurisana hi timhaka ta le tilweni loko ti fanele ku tirha.
Ku Rindza Minsusumeto Ya Bindzu
13. Xana Pawulo ni lava a a va endzerile eKorinto va langutise ntirho wa vona wo tihanyisa hi ndlela yihi?
13 Loko a ri eKorinto, muapostola Pawulo u nghenele vuxaka bya bindzu ni vaendzeriwa va yena va Vukriste, Akwila na Prisila. (Mintirho 18:1-3) A va tirhela ku kuma swilaveko swa vutomi, kambe sweswo a swi ri swa vumbirhi eka xikongomelo xa vona lexikulu—ku kurisa vugandzeri bya Yehova. Entiyisweni a va nga ta sandzeriwa ku “ehleketa leswaku vukhongeri i ndlela yo kuma [rifuwo].” (1 Timotiya 6:5) Hi vunharhu bya vona va katekisiwe ngopfu hi Yehova naswona va bumabumeriwa kahle eBibeleni.—Varhoma 16:3-5.
14. (a) Hikwalaho ka yini swi ri swinene ku kambisisa minsusumeto emahlweni ko nghenela mhaka ya bindzu? (b) Xana Timbhoni tinharhu ti xi tlhantlhise ku yini xiphiqo xa tona?
14 Hi ku kambisisa minsusumeto hi rixaladza emahlweni ko nghena emhakeni ya bindzu, Mukriste a nga papalata swihinga swo tala. Hi xikombiso, Mukriste un’wana a nga ha lava nkarhi wo tala leswaku a yisa timhaka ta Mfumo emahlweni, kasi mutirhi-kulobye a nga ha lava ku hluvukisa mahanyelo ya yena. Un’wana a nga ha lava ku pfuxeta mimbuyelo leswaku a kurisa bindzu, kambe lon’wana u tiyimisele ku hakela swibalo swo tika naswona a nga pfuxeti mimbuyelo leswaku a papalata ku katseka loku engetelekeke. Etikweni rin’wana, Timbhoni ta Yehova tinharhu leti a ti ri maxaka ya nyama ti ve vatirhisani-kulobye ebindzwini. Kambe hi nkarhi lowu faneleke malangutelo ya vona ya hambanile malunghana ni mpimo lowu un’wana ni un’wana wa vona a laveke ku tikatsa ku fika eka wona ebindzwini. Ntlhantlho wa vona a ku ri kungu ro twanana leswaku va hambanisa mimbuyelo ya vona ya bindzu ni ku avelana vaxavi va vona hi le xikarhi. Hi ndlela leyi va hlayise vuxaka bya vona bya moya ni bya nyama. Va yingise xitsundzuxo xa Bibele xo “lava leswi hi pfunaka ku hanya hi ku rhula, ni ku akisana.”—Varhoma 14:19.
15. Hikwalaho ka yini ngopfu-ngopfu hi fanele ku rindza minsusumeto ya hina malunghana ni mali?
15 Vukheta lebyi hlawulekeke byi fanele ku kombisiwa ehenhleni ka nsusumeto wa munhu emhakeni ya mali. Bibele ya hi tiyisekisa yi ku: “Munhu l’a thembekaka o fuwele mikateko, kambe l’a nav̌elaka ku fuwa hi ku hatlisa, a nga ka a nga pfumali nanḍu.” (Swivuriso 28:20) Hi “ku nav̌ela ku fuwa hi ku hatlisa,” Mukriste a nga va la nga wu voniki nchumu wo vangama ngopfu—vunakulobye bya Vukriste. Leswi swi nga vanga ku avana ebandlheni, tanihi leswi van’wana va nga ha vengaka ku rhangisa ka yena mali emahlweni ka timhaka ta Mfumo. Xisweswo Bibele ya tsundzuxa: “Lava navelaka rifuwo, va wela endzingweni, emintlhan’wini ya ku navela leswo tala leswi nga pfuniki nchumu, ku nga ku navela loku ku dlayisaka vanhu, ni ku va peta ekhombyeni ni le ku loveni. Hikuva ku rhandza ngopfu mali i rimitsu ra leswo biha hinkwaswo; hi yo mhaka ya ku navela mali ngopfu leyi yi nga yisa van’wana kule, va tshika vupfumeri, kutani timbilu ta vona ti ngheniwa hi mivilelo leyo tala.”—1 Timotiya 6:9, 10.
16. Xana timhaka hinkwato ta bindzu ti fanele ti fambisiwa njhani?
16 Ndlela yin’wana leyi “ku rhandza ngopfu mali” ku nga lahlekisaka Mukriste ha yona i ku n’wi ringa leswaku a amukela swiendlo swa bindzu leswo biha kumbe leswi nga tshembekiki hi laha ku heleleke. Loko Vakriste-kulobye va katseke ni munhu wo tano, ku avana ku nga va kona. Naswona swiendlo swo tano swi onha vuxaka bya munhu na Yehova. Leswaku vuxaka bya bindzu byi famba khwatsi, i swa nkoka ku tsundzuka leswaku vuxisi ebindzwini “byi v̌engiwa i Yehova.” (Swivuriso 11:1; 20:23) Kambe, Vakriste va lava ku kota ku vula, hi laha muapostola Pawulo a endleke ha kona va ku: “Hi titwa swinene leswaku hi ni ripfalo leri tengeke, hi ri karhi hi navela ku endla leswi lulameke minkarhi hinkwayo.”—Vaheveru 13:18.
Ku Tlhantlha Swiphiqo Swa Bindzu
17. Xana swiphiqo swin’wana leswintsongo swa bindzu swi nga tlhantlhiwa njhani?
17 Eka vuxaka byin’wana ni byin’wana bya bindzu exikarhi ka vamakwerhu, swiphiqo swi nga tlhekeka. Swin’wana swa swiphiqo leswintsongo swi nga tlhantlhiwa hi ku olova hi ku tirhisa nawu lowu nga eka 1 Petro 4:8, lowu nge: “Ku tlula leswi hinkwaswo, tiyani eku rhandzaneni, hikuva rirhandzu ri funengeta swidyoho leswo tala.” Loko swiphiqo swi nga tlhantlheki hi ndlela yoleyo, a swi fanelanga ku pfumeleriwa swi kula ni ku nyanya. Leswi swi nga vanga ku lahlekeriwa hi xichavo lexikulu ni rivengo. Ntlhantlho hakanyingi wu le ka ku vulavurisana ka musa, loku kongomeke xiyimo xi nga si kula ngopfu. Rito ra Xikwembu ri hi tsundzuxa ku lunghisa madzolonga hi ku hatlisa.—Matewu 5:23-25; Vaefesa 4:26, 27.
18. Xana Mukriste a nga endla yini loko a ehleketa leswaku u hoxeriwe ngopfu ebindzwini hi Mukriste-kulobye?
18 Hambi swi ri tano, loko Mukriste a ehleketa leswaku u hoxeriwe ngopfu hi mupfumeri-kulobye ebindzwini, magoza lawa ya xaxametiweke eka Matewu 18:15-17 ya fanele ku landzeleriwa hi vukheta. Goza ro sungula kumbe ra vumbirhi ri fanele ku lunghisa mhaka. Loko ri nga yi lunghisi, goza ra vunharhu ku ta va ra leswaku vakulu lava vekiweke va kambisisa mhaka. Loko leswi swo endleka, vakulu va ta sivela vamakwerhu lava katsekaka hi laha ku tiyeke leswaku va nga yisani ekhoto. Hi laha Pawulo a vuleke ha kona, ku yisa mupfumeri-kuloni ekhoto a swi ta vula “ku hluleka ka n’wina sweswi.” U engeterile a ku: “Hikwalaho ka yini mi nga pfumeri ku endliwa hi ku homboloka; ha yini mi nga pfumeri ku dyeleriwa-ke?” (1 Vakorinto 6:1-8) Swa antswa ku xaniseka hi ku lahlekeriwa hi mali ku tlula ku tisa xisandzu evitweni ra Yehova ni le bandlheni ni ku onha vun’we bya hina hi ku yisa mupfumeri ekhoto. Kavula, hambi loko xiendlo xa khoto xi nga tekiwi, xivumbeko xin’wana xa xiendlo xa bandlha xi nga ha laveka loko ku nga tshembeki ku katsekile.
19. I swikombiso swihi leswinene ngopfu swa Bibele leswi vakulu va nga kombetelaka eka swona loko va tsundzuxa ehenhleni ka swiphiqo swa bindzu?
19 Loko va tsundzuxa lava va nga ni swihinga swa bindzu, vakulu va nga va kombisa xikombiso lexi nga hava vutianakanyi lexi vekiweke hi Abrahama loko vuxaka bya yena na Lot byi ri ekhombyeni. Abrahama, hambi leswi a a ri lonkulu, u tshike Lot a sungula a hlawula tiko hi musa ematshan’wini yo ringeta ku onha vuxaka. (Genesa 13:5-11) Vakulu va nga tlhela va kombetela eka xikombiso lexinene xa Zakiya. A a swi lava ku nyika hafu ya swilo swa yena eka swisiwana naswona hi hafu leyin’wana a tlherisela ka mune leswi a swi kumeke eka vanhu hi mavunwa.—Luka 19:1-10; nakambe vona 1 Vakorinto 10:24.
20, 21. I yini lexi faneleke ku tsundzukiwa swinene ehenhleni ka ntirho wo tihanyisa?
20 I swinene swonghasi loko Vakriste va lunghisa swiphiqo swa bindzu hi laha ku humelelaka hi ku landzelela ndzayo ya Bibele hi vukheta! Hi ndlela leyi va tshama va ri ni vun’we hambi loko timhaka ta bindzu ti nga humeleli. Sweswo ku ta va vuyelo lebyi tsakisaka loko hi tsundzuka minkarhi hinkwayo leswaku, eka Vakriste, ntirho wo tihanyisa i wa vumbirhi eka Timhaka ta Mfumo ni vun’we bya vamakwerhu. Naswona i swinene loko timhaka ta bindzu ti lunghiseleriwa leswaku ti pfumelela nkarhi lowu engetelekeke wa swilo swa nkoka ngopfu leswi yelanaka ni ntirho wa Mfumo.—Matewu 6:33; ringanisa Vafilipiya 1:9, 10.
21 Xisweswo, leswi swi nga swa nkoka wa xiviri evuton’wini bya hina i vuxaka bya hina na Yehova ni vunakulobye bya hina bya Vukriste. (Matewu 22:36-39) Hi nge swi lavi leswaku leswi swi onhiwa hi minkucetelo ya misava kumbe timhaka ta bindzu, hikuva entiyisweni ku hava lexi nga ringanisiwaka ni vuxaka bya hina na Yehova kumbe lexi nga fanaka ni ku xonga ka vunakulobye bya hina lebyi hlanganeke!
Swivutiso Swa Mpfuxeto
◻ Xana ku yingisa Rito ra Xikwembu ku kurisa vuxaka bya bindzu hi ndlela yihi?
◻ Hikwalaho ka yini ku ri vutlhari ku endla timhaka ta nkoka ti va enawini?
◻ Xana Vakriste va nga kombisana xichavo entirhweni hi ndlela yihi?
◻ Hikwalaho ka yini hi fanele ku kambisisa minsusumeto ya hina ebindzwini?
◻ I langutelo rihi leri faneleke ku kombisiwa eku tlhantlheni ka swiphiqo swa bindzu?
[Xifaniso eka tluka 16]
Abrahama u tiyisise ku xaviwa ka tiko hi ntwanano wa ximfumo na Efron
[Xifaniso eka tluka 18]
Ku tirha leswaku va lunghiselela vutomi a ku nga ri swa nkoka ngopfu eka Pawulo, Akwila na Prisila