Ku Tivula Ka Mu-Jesuit

VO TALA namuntlha va ha tshemba leswaku December 25 i siku ro hlawuleka, siku ra ku velekiwa ka Yesu. Hambi swi ri tano, mhaka ya leswaku nkoka wa vukhongeri bya ntiyiso wa namuntlha i khale wu ri karhi wu tiviwa hi varhangeri va vukhongeri wu kombisiwa hi ku tshaha loku landzelaka loku humaka eka ntirho wa Urbanus Holzmeister, mudyondzi wa mu-Jesuit (Mulandzeri wa Ignatius Loyola):

“Namuntlha swi amukeriwa hi laha ku tolovelekeke leswaku nkarhi wa ku tlangela siku ra December 25 a ku ri nkhuvo lowu vahedeni a va wu tlangela hi siku leri. Petavius [mudyondzi wa mu-Jesuit wa Mufurwa, 1583-1652] ana se a a swi xiyile hi laha ku faneleke leswaku hi December 25 a ku tlangeriwa ‘siku ra ku velekiwa ka dyambu leri nga hluriwiki.’

“Timbhoni ta nkhuvo lowu i:

(a) Khalendara ya Furius Dionysius Filocalus, leyi endliweke hi lembe ra 354 [C.E.], laha ku xiyiweke leswi: ‘December 25, S(iku ra ku velekiwa) ka (Dyambu) leri nga hluriwiki.’ (b) Khalendara ya mungoma wa tinyeleti Antiochus (leyi endliweke kwalomu ka 200 [C.E.]): ‘N’hweti ya December . . . 25 . . . Siku ra ku velekiwa ka Dyambu; ku vonakala ka nhlikanhi ku andza.’ (c) Caesar Julian [Mugwinehi Julian, mufumi wa Rhoma 361-363 C.E.] u bumabumele mintlangu leyi a yi tlangeriwa eku heleni ka lembe ku xixima dyambu, leri a ri vuriwa ‘dyambu leri nga hluriwiki.”’—Chronologia vitae Christi (Ntivo-swa-khale wa Vutomi bya Kriste), Pontificium Institutum Biblicum, Rhoma, 1933, tluka 46.