Wa Tsundzuka Xana?

Xana u tsakerile ku hlaya minkandziyiso yi nga ri yingani yo hetelela ya Xihondzo xo Rindza? Kutani vona loko u nga tsundzuka tinhla leti landzelaka:

◻ Ku hi ndlela yihi Pawulo a swi koteke ku vula leswaku ‘a nga na nandzu engatini ya vanhu hinkwavo’? (Mintirho 20:26, 27)

Kahle-kahle, enkarhini wa vutomi byakwe Pawulo a nga halatanga ngati enyimpini, naswona a nga dyanga ngati. Kambe, xa nkoka swinene, u kombisile ku tsakela lokukulu ka vutomi bya van’wana hi laha byi yimeriwaka ha kona hi ngati ya vona. A a nga lavi leswaku va lahlekeriwa hi vutomi bya vona hi siku ra Xikwembu ra ku avanyisa hikwalaho ko hluleka kakwe ku va nyika vumbhoni lebyi aneleke.—9/1. Tluka 27.

◻ Hikwalaho ka yini dyondzo ya Yesu ya le ntshaveni yi ri ya nkoka?

Dyondzo ya Yesu a yi ri ya nkoka hayi hikwalaho ka ku anerisa ka yona ka moya ntsena kambe hikwalaho ka ku olova ni ku twisiseka ka yona.—9/15, tluka 9.

◻ I yini lexi xi endleke leswaku ndzayo ya Pawulo yi tirha?

Ku tirha ka yona ku le ka mhaka ya leswaku lava a yi kongomisiwe eka vona va swi tivile leswaku Pawulo a a va rhandza. Nakambe,a a tiseketela hi vutlhari bya Xikwembu, ku nga ri hi miehleketo ya yena n’wini, naswona u nyikele ndzayo hi moya wa musa. (2 Timotiya 3:16; Tito 3:1, 2)—9/15, matluka 12, 13.

◻ I yini leswi faniseriwaka hi swivandzana swa mune leswi voniweke hi Daniyele enorhweni wakwe lowu rhekhodiweke eka Daniel ndzima ya 7?

Swi fanisela mimfumo ya misava leyi hlayiweke ku sukela esikwini ra Daniyele ku ya emahlweni ku fikela enkarhini wa ku tlhomiwa ka Mfumo wa Xikwembu. Yona a ku ri: Babilona, Medo-Persia, Greece na Rhoma ni hluke ra wona, Mfumo wa Misava wa Anglo-Amerika.—10/1, tluka 7.

◻ Hikwalaho ka yini ku chumayela mahungu lamanene ya Mfumo ku ri ndlela leyi tirhaka yo komba rirhandzu eka munhukuloni?

Ntirho wo chumayela wa tirha hikuva wu pfuna vanhu ku tirhisa milawu leyinene. Hi tlhelo rin’wana, leswi swi va pfuna ku papalata swiphiqo swo tala evuton’wini.—10/1, tluka 23.

◻ Ha yini rito leri nge “N’wana-wa-Munhu’’ ri fanela Yesu?

Loko Yesu a tirhisile rito leri eka yena n’wini a a ri munhu, kutani hi xiviri a a ri “N’wana-wa-Munhu.” Nakambe u nyikele vutomi byakwe leswaku a kutsula vanhu, xisweswo a endla ntirho wa xaka lerikulu ra vanhu—“N’wana-wa-Munhu” hakunene. (Matewu 20:28; Vaheveru 2:11-17)—10/15, tluka 6.

◻ Hikwalaho ka yini ku vulavurisana lokunene exikarhi ka vatswari ni vana ku ri ka nkoka?

Ku vulavurisana ko tano ku vumba ku twisisa ka rirhandzu ni ku khathalelana. Loko vana va kombisa ku navela ku vulavula hambi ku ri hi timhaka letikulu, vatswari va vona va swi kota ku vona leswi nga etimbilwini ta vona. Nakambe, vana va sungula ku vona leswaku mintlhaveko ni minsusumeto ya vatswari va vona ya fana ni ya vona vini. Leswi hinkwaswo swi nyikela swo tala eka ndyangu lowu tsakeke, wa vun’we.—11/1, matluka 18, 19.

◻ Xana Mukriste a nga papalata ku nonon’hwa ko tala evuxakeni bya bindzu hi ndlela yihi?

Loko a nga si nghenela mhaka yihi na yihi ya bindzu, Mukriste u fanele hi vukheta a kambela minsusumeto ya yena. Xitsundzuxo xa Bibele eka Varhoma 14:19 xi fanele ku tsundzukiwa nkarhi na nkarhi, ku ‘lava leswi hi pfunaka ku hanya hi ku rhula, ni ku akisana.’—11/15, tluka 19.

◻ Hi yihi mimbuyelo yo landzela xitsundzuxo lexi huhuteriweke xo teka ‘ntsena eHosini’? (1 Vakorinto 7:39)

Vatekani va Vakriste va nga khutazana ehenhleni ka ku hlangavetana ni miringo yo hambana-hambana hi laha ku humelelaka ivi xisweswo va tshama va tshembekile eka Xikwembu. Hi vun’we, va nga alela mintshikilelo yo hambana-hambana leyi yi nga tsanisaka swiboho swa vukati. Matshalatshala ya vona yo tirhela Yehova ni ku hanya hi ku ya hi tindlela ta yena swi nga yisa eka vukati lebyi humelelaka lebyi xiximaka Yehova.—11/15, tluka 26.

◻ I miehleketo yihi leyinene malunghana ni minyikelo leyi muapostola Pawulo a yi nyikeke bandlha ra le Korinto?

Eka 1 Vakorinto 16:2 Pawulo u tsarile: “Hi siku ro sungula ra vhiki, un’wana ni un’wana wa n’wina . . . a a veke swin’wana hi tlhelo, eka leswi a swi bindzuriseke.” Ku swi endla nkarhi na nkarhi a ku ri murhi wa kona lowu kandziyisiweke, hayi ntsengo wo tala. Namuntlha, nawu lowu fanaka wu nga tirhisiwa hi vanhu va Yehova leswaku va hlangavetana ni tihakelo leti lavekaka ta Holo ya Mfumo kumbe ku endla minyikelo yin’wana ya timhaka ta Mfumo.— 12/1, tluka 30.