“Ku Onhaka Loku Endliweke Ku Ta Va Loku Xiyekaka Swinene”

NYIMPI YO SUNGULA ya Misava yi ve ni xitiviso lexi dumeke evuton’wini bya vanhu ni nhundzu. Hambi swi ri tano, leswi tivekaka swintsongo, i ku onha loku nyimpi yi ku endleke eka xifaniso xa varhumiwa va Vujagana eAfrika. Hi ku ya hi murhumiwa wa Khatoliki Francis Schimlek ebukwini yakwe leyi nge Medicine Versus Witchcraft, mahungu ya vukari lebyikulu bya misava hinkwayo a “ya fana ni ku tsekatseka ka misava, ku tsekatseka loku ku twiweke ni le ka xitici xo hetelela xa vurhumiwa emakhwatini ya Afrika. . . . Varhumiwa va Kriste va khomiwe hi tingana, naswona Vakriste va Tiko va kanganyisekile.”

Ha yini swi ri tano? Schimlek u tshaha murhumiwa Albert Schweitzer tanihi loyi a hlamuselaka a ku: “Hinkwerhu ka hina, ha swi xiya leswaku Vanhu vo tala va Tiko va kanganyiseka ehenhleni ka xivutiso xa ndlela leyi swi nga kotekaka ha yona leswaku valungu, lava tiseke Evangeli ya Rirhandzu, sweswi va dlayana, naswona va ba milawu ya Hosi Yesu hi makatla. Loko va tisa xivutiso lexi eka hina a hi pfuni nchumu . . . , Ndzi chava leswaku ku onhaka loku endliweke ku ta va loku xiyekaka swinene.”