“Marito Lama Vulavuriweke Hi Nkarhi”
“Marito la’ma v̌ulav̌uriweke hi nkari, ma kotisa malamula ya nsuku e ntewaneni wa silver,” ku vula Swivuriso 25:11. Marito lama hlawuriweke ni swiendlo swa hina swa musa swi nga susumetela mbilu ya munhu lowo lulama hakantsongo endleleni ya ku amukeriwa hi Yehova. Nchumu lowu hi nga ha vaka hi wu vurile kumbe hi wu endlile, hambi ku ri malembe lama hundzeke, wu nga ha tsundzukiwa hi ntsako hi munhu un’wana. Hi xikombiso, loko a endzela bandlha, mulanguteri wa xifundza ni nsati wakwe a va ri vapfhumba va makwerhu wa xisati loyi a ha ku khuvuriwaka. Nsati wa mulanguteri wa xifundza u rhumele khadi ra ku nkhensa a tlangela malwandla lama kombisiweke. Endzhaku ka malembe lama tlulaka nkombo, u amukele papila leri landzelaka:
“Ndzi vone swi fanela ku tsala ndzi ku byela hi mpfuno lowu u veke wona eka mina hi malembe yo tala u nga swi xiyi nikantsongo. Ndzi rhambe wena na Jim eka swakudyanyana swa dina, kutani u ndzi rhumele khadi ro saseka swinene ra ku nkhensa. A ri kufumela swinene, kambe i tsalwa leri fikeleleke mbilu ya mina, naswona a ndzi kalanga ndzi swi rivala. A ku ri hi 1976. A ku ri mina ntsena endyangwini wa mina loyi a a tsakela ntiyiso hakunene. Ndzi dyondze ni vanhwanyana va mina ivi ndzi ringeta ku va nsati lonene. Kambe minkarhi yin’wana ndzi lave ku tshika, ndzi tshika ntiyiso, ndzi ntshunxeka eka vutihlamuleri—ndzi tshika ntsena. Kambe tsalwa leriya u ri tsaleke ri tlhavile embilwini ya mina, naswona a ndzi tibyela ndzi ku, ‘Ndzi ni vutianakanyi swonghasi,’ kutani ndzi ya emahlweni.
“Ku hava nchumu emalembeni wolawo hinkwawo ya nhungu lowu veke ni ku tirha ko tano eka mina, kutani ndzi lave ku ku byela ha swona. Handle ka tsalwa, ndzi anakanye leswaku a swi ri swinene swonghasi leswaku un’wana la nga bizi ku fana na wena a teka nkarhi a nkhensa mina hi ku endla nchumu lowu ndzi faneleke ku wu endla.
“Kavula—tsalwa—2 Yohane 8.
“Sandra”
Namuntlha, nuna wa Sandra u khuvuriwile naswona u hlanganyela na yena tanihi muhuweleri wa mahungu lamanene. Un’wana wa vanhwanyana va vona vambirhi i phayona ra nkarhi hinkwawo, naswona nhwanyana lon’wana i phayona ra nkarhinyana ku sukela loko a pasile sweswinyana exikolweni xa le henhla.
Eku heteleleni, 2 Yohane 8 yi ri yini xana? “Mi tivonela leswaku mi nga lahlekeriwi hi leswi mi nga tikarhatela swona, kambe mi kota ku kuma hakelo leyi ringanaka.”