“Ku Dyondzisa Ka Vona Ku Twakale eMisaveni Hinkwayo”

EKA PSALMA 19, Davhida u tlakusa ku kwetsima ka ku tumbuluxa ka Xikwembu loku vonekaka kutani a ya emahlweni a phofula ku tlangela loku kufumelaka ka nawu, switsundzuxo, swileriso, milawu ni makungu ya vuavanyisi swa Yehova. Muapostola Pawulo na yena u kombise ku tlangela swilo leswi. U tshahe eka Psalma leyi ivi a ndlandlamuxa ku tirha ka yona eka ntirho wa nkoka wa Vakriste va ntiyiso. Ha vona u te: “Ku dyondzisa ka vona ku twakale emisaveni hinkwayo, ni marito ya vona ma fikile emakun’wini ya misava.”—Varhoma 10:18.

“Marito” lawa ma vula vutomi ni rifu eka vanhu hinkwavo namuntlha, hikuva makungu ya ku avanyisa ka Yehova ya le kusuhi ni ku tisiwa ehenhla ka mafambiselo layo biha ya swilo emisaveni. (Sofonia 2:2, 3; 3:8) Entiyisweni vanhu va fanele ku tiva hi ta mahungu lamanene ya Mfumo wa Yehova. Kwihi na kwihi laha u langutaka kona namuntlha, ku ni ku avana, vuhomboloki, vugevenga, vunghwavava, mindyangu leyi hahlukeke. Oho, ina, ku vulavuriwa hi ku rhula, kambe mimfumo leyikulu yi ya emahlweni ni ku endla matlhari lama ma rharhanganeke swinene, loko ku va xirho xa ‘ntlawa wa nyutliya’ ku hambeta ku ndlandlamukela eka matiko layo tala. Swiyimo emisaveni entiyisweni swi fanela ‘masiku ya makumu’ lama hlamuseriweke hi Pawulo eka 2 Timotiya 3:1-5.

I vamani lava nga ta ponisiwa ekhombyeni leri, naswona njhani? Pawulo u hlamula hi ndlela leyi twalaka, hi ku tshaha vuprofeta bya Yoel 2:32 a ku: “Un’wana ni un’wana la khongelaka hi vito ra [Yehova], u ta ponisiwa.” (Varhoma 10:13) Kambe vanhu va misava ‘va nga ri vitanisa ku yini vito ra Yehova’? Phela, vo tala swinene a va swi tivi hambi ku ri leswaku Yehova i vito ra Xikwembu! Vanhu lava va nga pfunisiwa ku yini xana? Pawulo u hlamula leswaku vachumayeri va fanele ku rhumeriwa eka vona.—Varhoma 10:14-16.

Lexi tsakisaka, Yehova u rhume Timbhoni ta yena ku tivisa vanhu leswaku Mfumo wa Xikwembu wu tshinele ni leswaku wu ta vula ku ponela evuton’wini lebyi nga heriki eka lava va tivaka Xikwembu ni N’wana wa xona, Yesu Kriste. (Esaya 43:10, 12; Luka 21:25, 26, 31; Yohane 17:3) Mahungu lawa lamanene ma karhi ma twarisiwa “emisaveni hinkwayo.”

Timiliyoni ta ku yingisa ku chumayela loku, hi laha swi kombisiwaka ha kona hi ntsengo wa misava hinkwayo wa 9 201 071 wa lava veke kona enhlanganweni lowu tsundzukeke rifu ra Yesu, hi April 1, 1988. Hi lembe rero, nhlohlorhi ya 3 592 654 ya vahuweleri va Mfumo yi fikeleriwile ensin’wini ya misava hinkwayo, naswona 239 268 wa vatirheli lavantshwa va khuvuriwile—ku andza ka tiphesente ta 3,6 ku tlula lembe leri hundzeke. Varhumiwa lava tshembekaka va endle ntirho wo tala wa masungulo eka ku andza loku, hi laha swi hlamuseriweke ha kona endzhakunyana eka magazini lowu. Kambe emalembeni ya sweswinyana, madzana ya magidi ya Timbhoni ta kwalaho, leti ti ‘vekeke ripfumelo eka leswi ti swi tweke,’ na vona va tswonge moya wa vuphayona naswona siku rin’wana ni rin’wana ‘va twarisa mahungu lamanene ya swilo leswinene.’ Avhareji ya Timbhoni ta 455 561 a yi vika tanihi maphayona, ku andza elembeni ka tiphesente ta 4,4. Hikwalaho, ntsengo lowukulu wa tiawara ta 785 521 697 ti tirhisiwile eku chumayeleni, ku tlula ntsengo wa tiawara lowu wa ha ku endliwaka malembe ya 6 lama hundzeke wu andzisiwe kambirhi.

Chati leyi nga ematlukeni ya mune lama landzelaka ya magazini lowu yi komba hi vuxokoxoko ndlela leyi ku chumayela ku kuleke ha yona. Hi ku rhambela leswaku u dyondza xiviko lexi xa 1988 xa ntirho wa Vukriste wa misava hinkwayo.

[Chati leyi nga eka tluka 4-7]

XIVIKO XA NTIRHO WA LEMBE RA 1988 WA TIMBHONI TA YEHOVA EMISAVENI HINKWAYO

(See bound volume)