Misava Leyintshwa Yi Tshinele!

MAKUNGU ma tele yo herisa swiphiqo swa misava. Hi ntolovelo, ma lava ku tikarhata ni ntirhisano, kun’we ni matshalatshala lamakulu lama lunghiseleriweke hi matiko hinkwawo emisaveni hinkwayo. Swi vonaka onge leswi swiyimo swi yaka swi biha, xilaveko xa nhlayiso wa hinkwako-nkwako xi ta susumetela matiko ku tlhela ma hlahluvisisa swilo leswi ma swi rhangisaka emahlweni kutani ma tirha kun’we leswaku ma vumba misava leyintshwa ni leyi seketelekaka. Swi xiyiwile leswaku mali ya matlhari yi ta hungutiwa swinene leswaku ku tirhisiwa ka swikumiwa ku lwisana ni minxungeto ya mbango ni leswaku, hi laha swi tsariweke eka State of the World 1990, “ematshan’wini yo hlayisa ku akiwa ka fambiselo ra vona lerikulu ra vusirheleli, mimfumo yi ta titshega eka vandla leri hlayisaka ku rhula ni leri kurisiweke swinene ni ku tiyisiwa ra U.N., leri ri nga ta va ni matimba ni vuhosi bya ku lwela xirho xin’wana ni xin’wana xa tiko eka muhlaseri.”

Kambe makungu yo tano a ma swi koti ku tisa swiyimo leswi languteriweke leswi swi xaxametiweke eka matluka ya hina yo sungula. Marhengu ya vanhu ntsena a ma nge ku herisi nikantsongo ku homboloka ni makwanga ya vanhu; a ma xi herisi xihlawuhlawu ni ku avana ka tinxaka; a ma ri tisi rirhandzu ro pfumala vutianakanyi exikarhi ka vanhu hinkwavo; hambi ku ri ku tiyisa ku hela ka mavabyi ni rifu. Vugevenga a ku lwisaniwi na byona hi ndlela leyi humelelaka, hambi ku ri ku vulavula hi ku herisa ku hambana ni rivengo exikarhi ka vukhongeri. Naswona ku herisa timhangu ta ntumbuluko a ku nge vulavulariwi hi swona. Vutiko, ni vuswikoti bya byona byo vanga swiphiqo, byi pfumeleriwa ku va kona. Kutani, lexi khomisaka gome, hi fanele ku fikelela makumu ya leswaku vanhu va tsandzekile ku ta ni ntlhantlhlo lowu tirhaka.

Hambi swi ri tano, ku ni ntlhantlho! Hakunene, hinkwaswo swilo leswi rindzeriweke hi vanhu swi tshembisiwile, naswona xitshembiso xi huma eka Xikwembu “lexi nga riki na ku hemba.” (Tito 1:2) Xi swi tiva kahle leswi swi faneleke ku endliwa, naswona xi ni vutlhari, matimba, ni vuswikoti bya ku hetisisa leswi xi swi kunguhateke.—Nhlavutelo 7:12; 19:1.

Xikwembu xa tshembisa: “Ku sele nkarinyana, kutani lo’wo biha a nga ka a nga ha v̌i kona; u ta lav̌isisa šivandla ša yena, kutani a ta v̌a a nga ha ri kona. V̌a musa v̌a ta fuma misav̌a, v̌a ta tiṭakela e ku ruleni lo’kukulu ka v̌ona.”—Psalma 37:10, 11.

Leswi swi ta hetisisiwa njhani? Esaya 11:9 ya hlamula: “Ku nga ka ku nga endliwi ŝo biha, ni ku onhiwa e nṭhav̌eni hikwayo le’yi kwetsimaka ya mina; hikuv̌a ku tiv̌a Yehova ku ta eneta misav̌a, tani hi leŝi mati ma funengetaka v̌uento bya lwandle.” Ina, hinkwavo vanhu va ta leteriwa “ku tiv̌a Yehova,” naswona vanhu vahi ni vahi lava alaka ku fambisana na swona a va nge pfumeleriwi ku tshama kutani va kavanyeta ku rhula ka van’wana. Misava ya hina yo saseka a yi nge he onhiwi.

“Tanani, mi hlalela mitiro ya Yehova . . . O herise tinyimpi ku yisa e makuṅweni ya misav̌a,” ku tshembisa Psalma 46:8, 9. (Nakambe vona Mikea 4:3, 4.) Mhaka leyikulu eka ku endla ku rhula ka misava hinkwayo i ku hela ka ku hambana ka vutiko. Ntirhisano wu tiyile hikuva i hulumendhe yin’we leyi nga ta va kona emisaveni hinkwayo—liya ya Xikwembu. Naswona hulumendhe ya yena i Mfumo ‘lowu wu nga ta ka wu nga onhaki.’ (Daniel 2:44) Ku tlula kwalaho, Hosi ya wona i Yesu Kriste la pfuxiweke ni la nga riki na ku fa, loyi ku fuma ka yena ku nga ta va ni vululami ni vunene.—Esaya 9:6, 7; 32:1.

Kambe xana a wu ta onhiwa hi ku nga hetiseki ka vanhu loku ku kumiweke hi ndzhaka ni ku onhiwa hi switlhavi, vuvabyi, gome, ni rifu leswi yaka emahlweni? E-e, hikuva leswi naswona swi ta va swilo swa nkarhi lowu hundzeke. Nhlavutelo 21:4 ya hi tiyisekisa: “Xi ta sula mihloti hinkwayo emahlweni ya vona, ni rifu a ri nga ha vi kona; hambi ya ri mahlomulo kumbe ku rila kumbe ku vaviseka a swi nga ha vi kona, hikuva leswo sungula swi hundzile.” Xidyoho lexi kumiweke hi ndzhaka xi ta rivariwa exisekelweni xa gandzelo ra nkutsulo ra Yesu, naswona vanhu va ta tlheriseriwa eka xiyimo lexi hetisekeke. (Varhoma 6:23; Vaefesa 1:7) Naswona i mani loyi a nga lawulaka matimba ya Ntumbuluko hi ku olova kutani a ma sivela leswaku ma vavisa vanhu ku tlula Muvumbi wa wona?—Psalma 148:5-8; Esaya 30:30.

Swilo leswi munhu a nga swi langutela ni ku swi lorha ntsena, Xikwembu xi ta swi tisa. Kambe rini? Vuprofeta bya Bibele byi kombisa leswaku ku hundzuka ku ta ta hi nkarhi lowu matiko ma nga ta “hlundzuka” naswona vanhu va ta va lava “herisaka misava.” (Nhlavutelo 11:18) Masiku ya makumu ya misava ya khale ma ta xiyiwa hi “minkarhi yo nonon’hwa”—vuyelo bya kona ku va swiyimo leswi nyanyaka leswi hi swi vonaka swi hi rhendzerile sweswi. (2 Timotiya 3:1-5, 13) Naswona Yesu u vhumbe leswaku rixaka leri vonaka swilo swo tano ri ta va rixaka leri nga ta vona ku hetiseka ka switshembiso swa Xikwembu.—Matewu 24:3-14, 32-34.

Tinyike nkarhi wo kambisisa switshembiso sweswo leswi tsariweke eBibeleni. Hikuva eka yinhla leyi, havumbirhi vanhu lava nga ni vutivi ni Xikwembu va pfumela leswaku: Sweswi i nkarhi wa misava leyintshwa!