“Mihloti Ya Ku Tlangela”

“KU RILA mihloti ya ku tlangela, ndza ha ku heta ku hlaya xihloko lexi nge ‘Ndlela Yo Pfuna Lava Nga Ni Gome Leswaku Va Kuma Ntsako.’” (Xihondzo xo Rindza March 15, 1990, matluka 26-30) Rin’wana ra mapapila yo tala yo tlangela laya amukeriweke hi Sosayiti ehenhleni ka swihloko leswi vulavulaka hi gome leswi humelelaka eka minkandziyiso ya March 1 na March 15, 1990 ri sungurise xisweswo. Hambi swi ri tano, marito lawa wona ma huma eka makwerhu wa le Japani loyi n’wana wa yena lontsongo wa jaha sweswinyana a khomeke hi vuvabyi bya mianakanyo. Wa hlamusela:

“Ku chavelela ni ku khutaza moya-xiviri lowu nga ni gome siku na siku, minkarhi yo tala ndzi titwa ndzi hela matimba. Loko ri pela, n’wana wa mina u karhatiwa hi ku chava ni ku vilela. Kutani ndzi n’wi nyika tiphilisi to n’wi etlerisa kutani ndzi tshama etlhelo ka mubedo wa yena ndzi n’wi rhaba mavoko ni ku vekela xandla xa mina emombyeni wa yena kukondza loko a etlela. Swi fana ni loko u etlerisa n’wana, naswona endzhaku ka awara, eku heteleleni u khomiwa hi vurhongo lebyikulu. Kwalaho ndzi kuma ntshunxeko, kambe hi nkarhi wu ri wun’we, ndzi tibyela leswaku mixo lowu landzelaka wu ta tisa siku rin’wana ra ntirho.

“N’wana wa mina u ri, ‘a ndzi pfuni nchumu. A ku na ntshembo eka mina.’ Siku rin’wana ni rin’wana hi laha swi vavisaka u vutisa a ku, ‘Xana ndzi ta hola eka vuvabyi bya mina? Ndzi ta tshika rini ku tirhisa mirhi? Xana muxaka lowu wa vutomi wu ta hambeta ku fika kwihi?’ Hi minkarhi yo tano ndzi tirhisa swivutiso ku cinca ku anakanya ka yena hi laha timagazini ti ringanyeteke ha kona, naswona leswi swi n’wi pfuna ku kuma nchavelelo. Kambe hi ya emahlweni hi ndlela leyi fanaka siku na siku.

“Ku ni minkarhi yin’wana leyi n’wana wa mina a vitanaka vakulu [va le bandlheni ra kwalaho] exikarhi ka vusiku loko a vilela swinene kutani a kombela leswaku va n’wi khongelela. Leswi swi vonaka swi ri mpfuno lowukulu eka yena naswona swi endla leswaku mianakanyo ya yena yi hola. . . . Hi minkarhi yo tala, xiyimo xa n’wana wa mina xi va lexi nyanyaka loko nuna wa mina (la nga pfumeriki) a ri eka maendzo ya mabindzu. Loko ndzi kombela mpfuno hi riqingho, vamakwerhu vo tala va tsutsumela ekaya ra hina.

“Ndza mi nkhensa vamakwerhu ku sukela etshakwini ra mbilu ya mina hi ku humesa swihloko swa muxaka lowu nkarhi na nkarhi ni ku kombisa leswaku ma swi khathalela swilaveko swa lava tsaneke.”

[Nsayino] H. H.