U Kume Xiphephana eNtileni

LEMBE a ku ri 1921. Eka matiko yo tlakuka ya Transvaal, xifundza-nkulu xa Afrika Dzonga, ntlawa wa vavanuna va vuhlayisi bya xiporo va tirhe va longoloka ni ntila wa xitimela. Mulanguteri wa ntlawa wa vatirhi, Mubunu la vitaniwaka Christiaan Venter, u vone xiphephana xi nghene ehansi ka xiporo. A ku ri xiphephana lexi humesiweke hi Watch Tower Bible and Tract Society.

Endzhaku ka loko a lerise vavanuna va yena leswaku va yima, Christiaan u hlaye xiphephana hi ku tsakela lokukulu. U tsutsume a ya hlangana ni mukon’wana wa yena, Abraham Celliers, kutani a huwelela hi ku tsaka: “Abraham, namuntlha ndzi kume ntiyiso!”

Endzhakunyana ka sweswo, va tsalele vahangalasi va xiphephana leswaku va kuma rungula leri engetelekeke. Loko ri hlamula, rhavi ra Afrika Dzonga ra Sosayiti ya Watch Tower ri rhumele tibuku ta Bibele leti engetelekeke. Vavanuna lava vambirhi va ti hlaye swin’we hi minkarhi ya vona yo wisa ya swakudya swa ninhlikanhi na hi nkarhi wa vusiku. Hi ku hatlisa va sungule ku avelana ntiyiso ni vanghana ni valuveri.

Eku heteleleni, Christiaan na Abraham va ve Timbhoni leti tinyiketeleke ta Yehova. Hikwalaho ka ku chivirika ni ku tshembeka ka vona, vanhu vo tala va Afrika Dzonga va pfuniwile leswaku va kuma vutivi bya ntiyiso. Ku tlula kwalaho, ku tlula dzana wa vatukulu va vona i Timbhoni leti chivirikaka ta Yehova namuntlha! Un’wana wa vona u tirha eyindlu-nkulu ya misava ya Timbhoni ta Yehova eBrooklyn, New York, naswona un’wana eka tihofisi ta Sosayiti ya Watch Tower eAfrika Dzonga.

Namuntlha, kwalomu ka 70 wa malembe endzhaku, swiphephana swa Bibele swi ya emahlweni swi va ni xiphemu lexikulu eku hangalaseni ka rungula ra Mfumo.