Ku Ta Humelela Yini Hi Tindhawu To Kwetsima Ta Vujagana?

VAKANDZIYISI va buku leyi nge Holy Places of Christendom, hi muyimburi Stewart Perowne, va vutisa: “I mani, ku nga khathariseki leswaku u huma eka ndhavuko wa vukhongeri byihi, loyi a nga yimaka eCalvary, eKerekeni ya ku Pfuxiwa, [kumbe Kereke ya Masirha yo Kwetsima] eYerusalema handle ko chava: hikuva yona ndhawu leyi leyi xiximiwaka ni leyi lweriweke hi malembe xidzana yo tala, i ntsindza wa Vujagana.”

Ku hava munhu la swi koteke ku kombisa leswaku kereke leyi yi akiwile eCalvary, laha Yesu Kriste a feleke kona. Entiyisweni, Constantine mufumi wa Rhoma a nga si kunguhata ku aka kereke kwalaho, tempele ya vuhedeni yi teke ndhawu yoleyo. Ku tlula kwalaho, Yesu u te: “Xikwembu i moya; kutani lava xi gandzelaka, va fanele ku xi gandzela hi moya ni ntiyiso.” (Yohane 4:24) Vagandzeri vo tano a va xiximi tindhawu to “kwetsima” leti vonakaka.

Enkarhini wun’wana, Yerusalema a a yi ri ndhawu ya tempele ya Xikwembu, xisweswo yi ri ntsindza wa vugandzeri lebyi tengeke. Hambi swi ri tano, hikwalaho ka ku nga tshembeki ka vaaki va tiko rolero, Yehova Xikwembu u ri tshikile, hi laha Yesu a vhumbeke ha kona. (Matewu 23:37, 38) Nakambe Yesu u vhumbe ku lovisiwa ka xivandla xexo xa vukhongeri, lexi vo tala va hambeteke va xi languta tanihi ndhawu yo kwetsima. Marito yakwe ma hetisekile loko Varhoma va lovise Yerusalema ni tempele ya rona hi 70 C.E.—Matewu 24:15, 21.

Vuprofeta bya Yesu ku nga ri khale byi ta hetiseka hi xitalo eka xivandla hinkwaxo xa vukhongeri bya Vujagana, lebyi tivulaka ndhawu yo kwetsima. Vujagana ni tindhawu ta byona to kwetsima sweswi byi langutane ni ndzoviso wa vandla leri kanetanaka ni vukhongeri leri vitaniwaka ‘nchumu wo nyenyetsa lowu onhaka.’ (Daniel 11:31) Hi ntsako Timbhoni ta Yehova ti ta ku nyika rungula mayelana ni ndlela leyi xiendlakalo lexi xi tsemaka nhlana xi nga ta endleka ha yona.

[Xifaniso lexi nga eka tluka 32]

Ndhawu yo kwetsima endzeni ka Kereke ya Masirha yo Kwetsima

[Xihlovo Xa Kona]

Pictorial Archive (Near Eastern History) Est.