Ku Rhumela Xilamulela-mhangu eUkraine

NAKAMBE swiviko leswi chavisaka swi tele eka mahungu man’wana ni man’wana lama nga kona. Ku wa ka ikhonomi, ku pfumelaka ka swakudya ni ndlala, swi hlasela misava—sweswi swi le ka swiyenge swa khale ka Soviet Union. Huvo leyi Fumaka ya Timbhoni ta Yehova ya ha ku kombela hofisi ya rhavi ya Sosayiti ya Watch Tower le Denmark leswaku yi hlela xilamulela-mhangu xa Timbhoni leti pfumalaka le Ukraine. I yini leswi vamakwerhu va le Denmark va swi endleke?

A va ha yimayimanga, va sungule ku tirha! Hofisi ya rhavi hi ku hatlisa yi rhumele vamakwerhu leswaku va ya kamba mbhukuto eka timakete leti xavisaka swakudya. Mabandlha hinkwawo ya vanhu va Yehova eDenmark ma tivisiwile hi xilaveko lexi. Rhavi ra vika: “Mabandlha hinkwawo ma nyikerile swinene. Eku heteleleni, hi swi kotile ku nyikela vumbhoni lebyi vonakaka bya ntwela-vusiwana lowu a hi ri na wona hi lava xanisekaka.” Tilori ta ntlhanu swin’we ni tivheni timbirhi ni vachayeri va ku tirhandzela va 14, va fike erhavini ra le Denmark hi Mugqivela, December 7, 1991. Vatirhi va le rhavini va tate tilori leti hi swakudya leswi va swi xaveke.

Ni nhlikanhi hi Musumbunuku, December 9, va teke riendzo ro leha va tsemakanya Yuropa va ya eUkraine. Rhavi ra tsala: “A swi twisa ku vava loko ndyangu hinkwawo wa Bethele wu va tlakusela mavoko ku kombisa ku va lela. Hi ku tiva leswaku vanhu vo tala lava ringeteke ku heleketa swilamulela-mhangu a a va hlaseriwa, hi va khongelele swinene vamakwerhu va hina.”

Hi December 18 hi wisile. Rhavi ra le Denmark ri tivisiwe leswaku vatleketli va nhundzu va fike kahle le Lviv, eUkraine. Vamakwerhu va le Ukraine va xi amukerile xilamulela-mhangu. Vona ndlela leyi a va tsake ha yona loko va xixa maphakithi ya 1 100 ya tikhilogiramu ta 20 lawa a a ma ringana ndyangu,—rin’wana ni rin’wana ri ri na nyama, fulawa, rhayisi, chukele ni swin’wana! Loko swi hlanganile a ku ri nundzu ya 22 wa tithani. Rhavi ra le Denmark ra tsala: “Ntsako wa hina i wukulu, loko hi nkhensa Yehova hi nsirhelelo wa yena ni ku hi nyika lunghelo leri ro pfuna.”

Nakambe ku kunguhatiwa ku rhumela swiambalo. Rhavi ri vika leswaku ni le mhakeni leyi, “mabandlha ma angule hi ndlela leyi hlamarisaka.” Ina, Yehova wa va ‘fuwisa vanhu vakwe hi ku hanana ka tinxaka hinkwato.’ (2 Vakorinto 9:11) Na vona, va kuma ntsako lowu vangiwaka hi ku nyika vamakwavo va vona va xinuna ni va xisati hi ku ntshunxeka. Rirhandzu leri va ri kombiseke i mfungho lowu hlawulaka valandzeri va Yesu. (Yohane 13:35) Rirhandzu ro tano ra kala emisaveni leyi leyi pfumalaka.