Hi Lava La Nga Hi Yingisaka
TANIHI vanhu, hi ringeta ku kuma ntsako ni ku eneriseka evuton’wini. Kambe loko swiphiqo swa munhu hi xiyexe swi humelela, vona ndlela leyi swi pfunaka ni ku chavelela ha yona ku va ni loyi u nga n’wi byelaka swihinga swa wena!
Dr. George S. Stevenson u ri: “Ku boxa mhaka swi pfuna ku susa ku karhateka ka wena, swi pfuna leswaku u vona ku vilela ka wena hi langutelo lerinene, hakanyingi swi ku pfuna ku vona lexi u nga xi endlaka ha swona.” Dr. Rose Hilferding u xiyile: “Hinkwerhu hi fanele ku boxa ku karhateka ka hina. Hi fanele hi vulavula hi ku vilela ka hina. Hi fanele hi swi twa leswaku ku na un’wana emisaveni loyi a rhandzaka ku yingisa ni la kotaka ku twisisa.”
Kavula, ku hava munhu loyi a nga anerisaka xilaveko lexi hi laha ku heleleke. Hikwalaho ka ku koma ka nkarhi ni swilo swin’wana, vanghana va hina lava hi va tshembaka va nga pfumaleka enkarhini lowu hi va lavaka ngopfu ha wona, kumbe hi nga kanakana ku bula hi timhaka tin’wana ni vanghana va hina lavakulu swinene.
Hambi swi ri tano, Vakriste va ntiyiso a va yi pfumali ndleve leyi yingisaka hi laha ku heleleke, hikuva ndlela ya xikhongelo yi tshama yi ri kona. Bibele hi ku phindha-phindha yi hi khutaza ku khongela eka Xikwembu, Mutumbuluxi wa hina, loyi vito ra yena a nga Yehova. Hi kongomisiwa leswaku hi khongela hi mbilu hinkwayo, hi vito ra Yesu ni hi ku pfumelelana ni ku rhandza ka Xikwembu. Hambi ku ri timhaka ta munhu hi xiyexe kumbe ta xihundla swa fanela leswaku hi ti khongelela. Ha byeriwa eka Vafilipiya 4:6 leswaku: “Etimhakeni hinkwato . . . tivisa[ni] Xikwembu leswi mi swi pfumalaka.” Mawaku nyiko leyinene swonghasi! Mufumi wa hina Lonkulu wa vuako hinkwabyo minkarhi hinkwayo u lunghekele ku hoyozela ni ku amukela swikhongelo swa malandza ya yena lama titsongahataka loko ma lava ku n’wi tshinelela.—Psalma 83:18; Matewu 6:9-15; Yohane 14:13, 14; 1 Yohane 5:14.
Hambi swi ri tano, xana Xikwembu xa yingisa hakunene? Van’wana va nga ha tivutisa leswaku kumbexana ku humelela ka xikhongelo ku titshege hi vuswikoti bya munhu: Munhu loko a khongela, u hlela miehleketo ya yena ivi a yi vula hi marito. Xisweswo loko a vurile xiphiqo xa yena, u lava ntlhantlho lowu faneleke naswona ú tshama a xalamukele xin’wana ni xin’wana lexi nga pfunetaka leswaku a kuma ntlhantlho wolowo. Loko xiphiqo xa yena xi lulamisiwile, a nga ha khensa Xikwembu, kambe kahle-kahle i mianakanyo ni matshalatshala ya yena leswi nga tswala vuyelo lebyi lavekaka.
Vo tala namuntlha va ehleketa leswaku xikhongelo xo va na sweswo ntsena. Xana u ehleketa tano? Xana matimba ya xikhongelo ma helela kwalaho? Entiyisweni, matshalatshala ya munhu ya miehleketo ni ya miri lama pfumelelanaka ni xikhongelo xa yena ma pfuna swinene eku kumeni ka tinhlamulo. Hambi swi ri tano, ku vuriwa yini hi xiphemu xa Xikwembu emhakeni leyi? Xana Xikwembu xa yingisa loko u khongela eka xona? Xana xi teka swikhongelo swa wena swi ri swa nkoka, xi xiyisisa mongo wa swona ni ku swi hlamula?
Tinhlamulo ta swivutiso leswi i ta nkoka. Loko Xikwembu xi nga swi yingisi swikhongelo swa hina, swi vula leswaku xikhongelo xo va nchumu wa mianakanyo. Hi tlhelo rin’wana, loko Xikwembu xi swi amukela naswona xi yingisa swikhongelo swa hina hi ntsako, vona ndlela leyi hi faneleke ku nkhensa ha yona hikwalaho ka lunghiselelo ronghasi! Xi fanele xi hi susumetela ku tirhisa lunghiselelo rolero siku na siku.
Hikokwalaho, ha ku rhamba leswaku u ya emahlweni u hlaya, tanihi leswi timhaka leti ti hlamuseriwaka eka xihloko lexi landzelaka.